(កំពង់ឆ្នាំង)៖ ជនល្មើសដែលបានបាញ់គ្រាប់កង់បណ្តាលឲ្យស្ត្រីម្នាក់រងរបួសធ្ងន់លើផ្ទៃមុខ នៅស្រុកកំពង់ត្រឡាច ខេត្តកំពង់ឆ្នាំង កាលពីព្រលប់ថ្ងៃទី៣ ខែកញ្ញា ត្រូវបាននគរបាលឃាត់ខ្លួនបានហើយ និងកំពុងសាកសួរនៅស្នងការដ្ឋាននគរបាលខេត្តកំពង់ឆ្នាំង ដើម្បីបន្តនីតិវិធី។

លោក ប៉ុល វុទ្ធី ស្នងការរងទទួលផែនព្រហ្មទណ្ឌ នៃស្នងការដ្ឋាននគរបាលខេត្តកំពង់ឆ្នាំង បានបញ្ជាក់នៅព្រឹកថ្ងៃទី៧ ខែកញ្ញាថា ជនសង្ស័យដែលបានធ្វើសកម្មភាពបាញ់ទៅលើស្ត្រីម្នាក់បណ្ដាលឲ្យរងរបួស នៅក្នុងស្រុកកំពង់ត្រឡាច កាលពីប៉ុន្មានថ្ងៃមុននេះ ត្រូវបានសមត្ថកិច្ចឃាត់ខ្លួនបានហើយ។

ប្រតិបត្តិការស្រាវជ្រាវ ហើយឈានដល់ការចាប់ខ្លួនជនល្មើស បានធ្វើឡើងក្រោមការបញ្ជាផ្ទាល់ពីលោកឧត្តមសេនីយ៍ទោ តេង ច័ន្ទណាត ស្នងការនគរបាលខេត្ត។

បើតាមចម្លើយសារភាពរបស់ជនសង្ស័យ, ករណីបាញ់ប្រហារនេះ គឺកើតឡើងដោយសារគំនុំចាស់ រឿងទំនាស់ព្រំដី ដែលបានកើតឡើងតាំងពីយូរណាស់មកហើយ។

សូមបញ្ជាក់ថា កាលពីព្រលប់ថ្ងៃទី៣ ខែកញ្ញា ឆ្នាំ២០២៦ ស្ត្រីម្នាក់ឈ្មោះ លៀង ពិសី អាយុ៣៦ឆ្នាំ រស់នៅភូមិសំរោង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង បានរងរបួសក្រោមភ្នែក និងច្រមុះធ្ងន់ធ្ងរ ដែលត្រូវបានជនមិនស្គាល់មុខលបបាញ់ និងឧបករណ៍ម្យ៉ាងដែលប្រើ (គ្រាប់កង់) ដែលបានរងរបួសលើផ្ទៃមុខហើយត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យរាជធានីភ្នំពេញ៕