(ភ្នំពេញ)៖ លោកអភិសន្តិបណ្ឌិត ស សុខា ឧបនាយករដ្ឋមន្រ្តី និង​រដ្ឋមន្រ្តីក្រសួងមហាផ្ទៃ បានណែនាំមន្រ្តីថ្នាក់ក្រោមជាតិ​ត្រូវមានតម្លាភាព និងប្រសិទ្ធភាពក្នុងការដេញថ្លៃគម្រោងអភិវឌ្ឍន៍នៅថ្នាក់ឃុំ-សង្កាត់ ដើម្បីធានាថាថវិការដ្ឋត្រូវបានប្រើប្រាស់ប្រកបដោយគណនេយ្យភាព និងបម្រើផលប្រយោជន៍ប្រជាពលរដ្ឋពិតប្រាកដ​ ហើយមិនប្រើខុសគោលដៅ។​

លោកអភិសន្តិបណ្ឌិត ស សុខា ណែនាំបែបនេះ ធ្វើឡើងក្នុងពិធីសន្និបាតបូកសរុបសមិទ្ធផលការងាររបស់ក្រុមប្រឹក្សាឃុំ សង្កាត់ អាណត្តិទី៥ ​នាថ្ងៃទី៨ ខែកញ្ញា ឆ្នាំ២០២៦ នៅសណ្ឋាគារ សុខាភ្នំពេញ។ ​​​

នាឱកាសនេះ លោកឧបនាយករដ្ឋមន្រ្តី បានលើកឡើងផងដែរពី ភាពមិនប្រក្រតីមួយចំនួនក្នុងការកំណត់តម្លៃ និងបញ្ហាប្រឈមមួយចំនួនទៀត រួមមានការពន្យារពេលក្នុងការអនុវត្តការដេញថ្លៃលទ្ធកម្មនៅថ្នាក់ក្រោមជាតិ ដោយសារកត្តាដូចជាការផ្ទេរថវិកាយឺតយ៉ាវ ​។ លោកបានកត់សម្គាល់ថា ជារឿយៗតម្លៃគម្រោងមួយចំនួន ដូចជាប្រព័ន្ធលូបង្ហូរទឹក ត្រូវបានកំណត់ខ្ពស់ហួសហេតុ ដែលខុសពីគុណភាពជាក់ស្តែង ខណៈគម្រោងផ្លូវថ្នល់អាចត្រូវបានទម្លាក់តម្លៃដើម្បីដេញថ្លៃបាន ប៉ុន្តែត្រូវបានដំឡើងតម្លៃលើសេវាបំពេញបន្ថែមផ្សេងទៀត។

អភិសន្តិបណ្ឌិត ស សុខា បានសង្កត់ធ្ងន់ថា ថវិកាដែលបានផ្ទេរទៅថ្នាក់ក្រោមជាតិ គឺជាថវិការបស់ប្រជាពលរដ្ឋទាំងអស់ ដែលបានមកពីការបង់ពន្ធ។ ដូច្នេះ ការប្រើប្រាស់ថវិកានេះត្រូវតែមានការទទួលខុសត្រូវខ្ពស់។ លោកបានអំពាវនាវដល់រដ្ឋបាលរាជធានី-ខេត្តទាំងអស់ ឱ្យយកចិត្តទុកដាក់ធ្វើជាភ្នែកច្រមុះក្នុងការតាមដាន និងត្រួតពិនិត្យដំណើរការ​ដេញថ្លៃ និងការអនុវត្តគម្រោងនានា។

ជាមួយគ្នានេះ លោកបានក្រើនរំលឹកដល់អភិបាលខេត្តទាំងអស់ ឱ្យមានការប្រុងប្រយ័ត្នខ្ពស់ចំពោះការស្នើសុំថវិកាបន្ថែម ឬឥណទានបន្ថែម ដែលអាចនាំឱ្យមានផលវិបាកនៅពេលក្រោយ។​​

​សូមស្តាប់ប្រសាសន៍បន្ថែមរបស់ ​ឧបនាយករដ្ឋមន្រ្តី ស សុខា​​៖