(ភ្នំពេញ)៖ ក្រសួងរ៉ែនិងថាមពល និងក្រសួងបរិស្ថាន នៅថ្ងៃទី៩ ខែកញ្ញា ឆ្នាំ២០២៦នេះ បានចេញសេចក្តីបំភ្លឺ ដោយបដិសេធចំពោះការផ្សព្វផ្សាយថា ការឈូសឆាយដីព្រៃ និងកាប់ឈើ នៅគម្រោងវារីអគ្គិសនីស្ទឹងឫស្សីជ្រុំកណ្តាល និងគម្រោងវារីអគ្គិសនីស្ទឹងវាលថ្មកំបុតហួសពីបរិវេណអាងស្តុកទឹក ដែលទទួលបានការអនុញ្ញាតពីរាជរដ្ឋាភិបាល។

សេចក្តីប្រកាសព័ត៌មានបញ្ជាក់ថា តាមរយៈសារព័ត៌មានវិទ្យុបារាំង RFI ដែលយោងតាមរបាយការណ៍ចុះផ្សាយរបស់សារព័ត៌មាន Mongabay ចុះថ្ងៃទី២ ខែកញ្ញា ឆ្នាំ២០២៦ បានចុះផ្សាយអត្ថបទពាក់ព័ន្ធនឹងគម្រោងវារីអគ្គិសនីស្ទឹងឫស្សីជ្រុំកណ្តាល ដែលមានអានុភាពផលិតថាមពលអគ្គិសនី ៧០មេហ្គាវ៉ាត់ និងគម្រោងវារីអគ្គិសនីស្ទឹងវាលថ្មកំបុត ដែលមានអានុភាពផលិតថាមពលអគ្គិសនី ១០០មេហ្គាវ៉ាត់ ដោយបានលើកឡើងអំពីការឈូសឆាយដីព្រៃ និងកាប់ឈើហួសពីបរិវេណអាងស្តុក ទឹកដែលទទួលបានការអនុញ្ញាតពីរាជរដ្ឋាភិបាល។

ពាក់ព័ន្ធនឹងករណីនេះ ក្រសួងរ៉ែ និងថាមពល និងក្រសួងបរិស្ថានសូមធ្វើការបំភ្លឺដូចខាងក្រោម៖

១-ការអភិវឌ្ឍគម្រោងវារីអគ្គិសនីទាំងពីរ បានចូលរួមចំណែកបង្កើនសន្តិសុខថាមពល កាត់បន្ថយការពឹងផ្អែកលើ ការនាំចូលអគ្គិសនីពីប្រទេសជិតខាង និងគាំទ្រការអភិវឌ្ឍសេដ្ឋកិច្ច-សង្គម ដោយធានាការគោរពបទប្បញ្ញត្តិ និងការ អនុវត្តការវាយតម្លៃហេតុប៉ះពាល់បរិស្ថាន និងសង្គមយ៉ាងខ្ជាប់ខ្ជួន។

ស្ថាប័នមានសមត្ថកិច្ចពាក់ព័ន្ធបានធ្វើការចុះពិនិត្យ និងតាមដានជាប្រចាំនៅទីតាំងគម្រោងទាំងពីរ លើវឌ្ឍនភាពនៃការសាងសង់ ការអនុវត្តតាមស្តង់ដារ សុវត្ថិភាព និង លក្ខណៈបច្ចេកទេស ព្រមទាំងការអនុវត្តវិធានការគ្រប់គ្រងហេតុប៉ះពាល់បរិស្ថាន និងសង្គម។

២-ការឈូសឆាយផ្លូវចូល រៀបចំទីតាំងស្តុកឈើ ទីតាំងយកថ្ម ទីតាំងយកដីគ្រួសក្រហម នៅក្នុងបរិវេណទីតាំង គម្រោងវារីអគ្គិសនីស្ទឹងវាលថ្មកំបុត និងគម្រោងវារីអគ្គិសនីស្ទឹងឫស្សីជ្រុំកណ្តាល គឺសម្រាប់ធ្វើការប្រមូល និងដឹកជញ្ជូនផល អនុផលព្រៃឈើពីអាងស្តុកទឹកមុនទឹកលិចជាចំណូលរបស់រដ្ឋ ដែលទទួលបានការអនុញ្ញាតពីរាជរដ្ឋាភិបាល និងសម្រាប់បម្រើដល់ការងារសាងសង់គម្រោងវារីអគ្គិសនីទាំងពីរតែប៉ុណ្ណោះ ។

ក្រសួងសង្កត់ធ្ងន់ថា ការចុះផ្សាយព័ត៌មានរបស់ Mongabay គឺជាការសន្និដ្ឋានដែលមានរបៀបវារៈនយោបាយនៅ ពីក្រោយ និងមិនបានផ្ទៀងផ្ទាត់ឱ្យបានគ្រប់ជ្រុងជ្រោយជាមួយទិន្នន័យបច្ចេកទេស ផែនទី និងឯកសារច្បាស់លាស់ ដោយពឹងផ្អែកតែលើរូបភាពផ្កាយរណប មិនបានយល់ដឹងពីវិសាលភាព និងបរិវេណគម្រោងជាក់ស្តែងនៃប្លង់សាងសង់ គម្រោងវារីអគ្គិសនីទាំងពីរនេះ ដែលរាជរដ្ឋាភិបាលបានអនុម័តឡើយ។

ក្រសួងរ៉ែ និងថាមពល និងក្រសួងបរិស្ថាន សូមបដិសេធចំពោះការផ្សព្វផ្សាយព័ត៌មាននេះ ដែលជាព័ត៌មាននាំឱ្យ មានការយល់ច្រឡំ និងទស្សនៈអវិជ្ជមានចំពោះការអភិវឌ្ឍគម្រោងវារីអគ្គិសនី ដែលជាប្រភពថាមពលស្អាតរបស់កម្ពុជា។

ជាមួយគ្នានេះ ក្រសួងរ៉ែនិងថាមពល និងក្រសួងបរិស្ថានសូមអំពាវនាវឱ្យការផ្សព្វផ្សាយ និងចែករំលែកព័ត៌មានប្រកាន់ ខ្ជាប់នូវគោលការណ៍ តម្លាភាព ការទទួលខុសត្រូវ និងការគ្រប់គ្រងប្រកបដោយប្រសិទ្ធភាព ដើម្បីធានាការអភិវឌ្ឍ វិស័យថាមពលប្រកបដោយចីរភាព និងតុល្យភាពជាមួយការការពារបរិស្ថាន ដើម្បីបម្រើជីវភាពរបស់ប្រជាជនកម្ពុជានាពេលបច្ចុប្បន្ន និងទៅអនាគត៕