(កូរ៉េខាងត្បូង)៖ លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ នៅថ្ងៃទី៧ ខែកញ្ញា ឆ្នាំ២០២៦ បានអញ្ជើញជួបសំណេះសំណាល និងពិភាក្សាការងារជាមួយលោកបណ្ឌិត O-Bong Yang សាកលវិទ្យាធិការនៃសាកលវិទ្យាល័យជាតិឆុនប៊ុក (Jeonbuk National University) នៅសាកលវិទ្យាល័យជាតិឆុនប៊ុក ក្នុងខេត្តឆុនប៊ុក សាធារណរដ្ឋកូរ៉េ។

សាកលវិទ្យាល័យជាតិឆុនប៊ុក ជាសាកលវិទ្យាល័យជាប់លំដាប់ថ្នាក់ទី៣ ក្នុងចំណោមសាកលវិទ្យាល័យជាតិរបស់កូរ៉េ មានជំនាញឯកទេសផ្នែកផលិតផលពាក់កណ្តាលសម្រេចសឺម៉ីកុងឌុចទ័រ (Semi-conductor) បញ្ញាសិប្បនិម្មិតរូបវន្ត (Physical AI) និងកសិកម្ម។ សាកលវិទ្យាល័យនេះ ក៏ជាសាកលវិទ្យាល័យដែលមាននិស្សិតកម្ពុជាបន្តការសិក្សាច្រើនជាងគេ ក្នុងចំណោមសាកលវិទ្យាល័យទាំងអស់នៅប្រទេសកូរ៉េផងដែរ។

ក្នុងឱកាសនៃជំនួប លោកបណ្ឌិត Yang បានជម្រាបជូនលោកឯកអគ្គរាជទូតថា សាកលវិទ្យាល័យមានកិច្ចសហប្រតិបត្តិការជាមួយសាកលវិទ្យាល័យមួយចំនួននៅក្នុងប្រទេសកម្ពុជា និងបានបង្ហាញពីបំណងចង់ពង្រីកកិច្ចសហប្រតិបត្តិការបន្ថែមជាមួយសាកលវិទ្យាល័យដទៃទៀតនៅកម្ពុជា។

លោកបណ្ឌិត Yang បានបញ្ជាក់ថា លោកចង់ឃើញនិស្សិតកម្ពុជាកាន់តែច្រើនអាចបន្តការសិក្សារបស់ខ្លួននៅសាកលវិទ្យាល័យជាតិឆុនប៊ុក ពិសេសលើមុខវិជ្ជា Semi-conductor និង Physical AI។

លោកឯកអគ្គរាជទូត បានថ្លែងអំណរគុណចំពោះសាកលវិទ្យាល័យ ដែលបានផ្តល់ឱកាសសិក្សាសម្រាប់និស្សិតកម្ពុជាទាំងអាហារូបករណ៍ និងការបង់ថ្លៃសិក្សា។

លោកបានជម្រាបលោកបណ្ឌិតថា មុខវិជ្ជា Semi-conductor និង Physical AI គឺជាមុខវិជ្ជាដែលប្រទេសកម្ពុជាត្រូវការក្នុងការអភិវឌ្ឍសេដ្ឋកិច្ចជាតិនាពេលបច្ចុប្បន្ន និងអនាគត។ លោកសង្ឃឹមថា និស្សិតកម្ពុជាកាន់តែច្រើនអាចមកសិក្សាលើមុខវិជ្ជាទាំងពីរនេះ នៅសាកលវិទ្យាល័យជាតិឆុនប៊ុកផងដែរ។

ឆ្លៀតក្នុងឱកាសនោះ លោកបានអញ្ជើញលោកបណ្ឌិតសាកលវិទ្យាធិការ ទៅបំពេញទស្សនកិច្ចនៅប្រទេសកម្ពុជា ហើយបានជម្រាបថា ស្ថានទូតរីករាយនឹងជួយសម្របសម្រួលជំនួបរវាងសាកលវិទ្យាល័យ និងក្រសួង-ស្ថាប័នកម្ពុជា ក្នុងឱកាសទស្សនកិច្ចរបស់លោកបណ្ឌិតនៅប្រទេសកម្ពុជាផងដែរ។

បន្ទាប់ពីជំនួបខាងលើ លោកឯកអគ្គរាជទូត ក៏បានជួបសំណេះសំណាល និងសួរសុខទុក្ខប្អូនៗនិស្សិតកម្ពុជា ដែលកំពុងបន្តការសិក្សានៅសាកលវិទ្យាល័យជាតិឆុនប៊ុក ប្រមាណ ៧០នាក់ ដែលភាគច្រើនកំពុងសិក្សាថ្នាក់មូលដ្ឋានភាសាកូរ៉េ មុននឹងបន្តឈានទៅជ្រើសរើសមុខជំនាញសិក្សានៅឆ្នាំក្រោយ។

លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានលើកឡើងថា សាកលវិទ្យាល័យជាតិឆុនប៊ុក គឺជាសាកលវិទ្យាល័យដែលមានជំនាញ Semi-conductor និង Physical AI ហើយមុខវិជ្ជាទាំងពីរនេះ ក៏ជាមុខវិជ្ជាដែលកម្ពុជាត្រូវការសម្រាប់ការអភិវឌ្ឍប្រទេសផងដែរ។ ដូច្នេះ លោកសង្ឃឹមថា ប្អូនៗនឹងជ្រើសរើសយកមុខវិជ្ជាទាំងពីរ សម្រាប់ការសិក្សាជំនាញរបស់ខ្លួន។

លោកបានលើកទឹកចិត្តនិស្សិតកម្ពុជា ឱ្យខិតខំរៀនសូត្រទាំងភាសាកូរ៉េ និងជំនាញឯកទេស ព្រមទាំងឆ្លៀតពេលធ្វើកម្មសិក្សានៅតាមស្ថាប័ននានា ដើម្បីទទួលបានបទពិសោធន៍ការងារជាក់ស្តែង។ ជាមួយគ្នានេះ លោកក៏បានណែនាំឱ្យនិស្សិតយកចិត្តទុកដាក់ថែរក្សាសុខភាព និងមើលថែគ្នាទៅវិញទៅមកផងដែរ៕