(កំពង់ធំ)៖ លោក ហាក់ ម៉ុងហួត អភិបាលស្រុកតាំងគោក រួមជាមួយអាជ្ញាធរឃុំស្រឡៅ នាព្រឹកថ្ងៃទី០៩ ខែកញ្ញា ឆ្នាំ២០២៦នេះ បានដឹកនាំក្រុមការងារចុះពិនិត្យដោយផ្ទាល់នូវស្ថានភាពជាក់ស្តែងនៃដំណាំស្រូវ និងដំណាំហូបផ្លែ ជាពិសេសដំណាំត្រសក់ របស់ប្រជាកសិករនៅក្នុងភូមិសាស្ត្រឃុំស្រឡៅ ស្រុកតាំងគោក ខេត្តកំពង់ធំ។ ការចុះពិនិត្យនេះធ្វើឡើងបន្ទាប់ពីដំណាំកសិកម្មទាំងនេះ កំពុងប្រឈមមុខនឹងហានិភ័យយ៉ាងខ្លាំង ដោយសារអាកាសធាតុអាក់ខានភ្លៀងអស់មួយរយៈចុងក្រោយនេះ ដែលបណ្តាលឱ្យខ្វះខាតទឹកសម្រាប់ស្រោចស្រព។

នាឱកាសនោះលោកអភិបាលស្រុក បានពិនិត្យមើលស្ថានភាពស្រែដែលកំពុងខ្វះខាតទឹក ដែលអាចបង្កឱ្យមានផលប៉ះពាល់ និងហានិភ័យនៅថ្ងៃខាងមុខ ប្រសិនបើគ្មានភ្លៀងធ្លាក់ទាន់ពេលវេលានោះទេ។ លោកក៏បានចុះពិនិត្យចម្ការត្រសក់របស់ប្រជាកសិករ និងបានធ្វើការលើកទឹកចិត្តយ៉ាងខ្លាំងដល់បងប្អូនកសិករឱ្យខិតខំកែប្រែផ្ទៃដីពីការធ្វើស្រូវ មកជាការដាំត្រសក់វិញ ព្រោះដំណាំត្រសក់ប្រើប្រាស់រយៈពេលខ្លី និងកំពុងមានតម្រូវការទីផ្សារខ្ពស់ អាចជួយបង្កើនប្រាក់ចំណូលគ្រួសារបានលឿនជាងមុន។

នៅក្នុងឱកាសនោះ លោក ហាក់ ម៉ុងហួត បានសម្តែងការព្រួយបារម្ភយ៉ាងខ្លាំងចំពោះផលប៉ះពាល់ដែលបណ្តាលមកពីការប្រែប្រួលអាកាសធាតុ និងបានណែនាំដល់ក្រុមការងារជំនាញ ក៏ដូចជាអាជ្ញាធរមូលដ្ឋាន ឱ្យបន្តតាមដានស្ថានភាពដំណាំរបស់ប្រជាកសិករឱ្យបានដិតដល់។ ​ដើម្បីដោះស្រាយបញ្ហាប្រឈមចំពោះមុខ និងចាត់វិធានការបានទាន់ពេលវេលា។

លោក ហាក់ ម៉ុងហួត បានណែនាំឱ្យអាជ្ញាធរឃុំ សហការជាមួយមន្ត្រីជំនាញកសិកម្ម ប្រមូលទិន្នន័យជាក់ស្តែង និងធ្វើរបាយការណ៍លម្អិតឱ្យបានច្បាស់លាស់ ដើម្បីរាយការណ៍ជូនថ្នាក់ដឹកនាំ ស្ថាប័នពាក់ព័ន្ធ ក្នុងការស្វែងរកការអន្តរាគមន៍ និងដំណោះស្រាយសង្គ្រោះផលដំណាំរបស់ប្រជាកសិករឱ្យបានទាន់ពេលវេលា។

​នាឱកាសនោះលោក ហាក់ ម៉ុងហួត បានលើកឡើងដែរថា ដំណាំត្រសក់ នាពេលបច្ចុប្បន្នមានតម្រូវការទីផ្សារខ្ពស់ និងប្រើប្រាស់រយៈពេលខ្លីក្នុងការប្រមូលផល, ដូច្នេះការកែប្រែដីស្រែមួយផ្នែកមកដាំត្រសក់ មិនត្រឹមតែជួយបំពេញតម្រូវការទីផ្សារក្នុងស្រុក និងបង្កើនប្រាក់ចំណូលជូនគ្រួសារប៉ុណ្ណោះទេ ប៉ុន្តែថែមទាំងជួយឱ្យកសិករមានភាពធន់ទៅនឹងវិបត្តិស្ងួតហួតហែងទៀតផង៕