(ភ្នំពេញ)៖ ព្រឹកថ្ងៃពុធ ទី៩ ខែកញ្ញា ឆ្នាំ២០២៦ បណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានអញ្ជើញសំណេះសំណាល និងផ្ដល់អនុសាសន៍តម្រង់ទិសការងារជូនគ្រូបង្រៀនជនជាតិចិន នៅវិទ្យាស្ថានខុងជឺនៃរាជបណ្ឌិត្យសភាកម្ពុជា សម្រាប់ឆ្នាំសិក្សា ២០២៦–២០២៧។

នៅក្នុងឱកាសនោះបណ្ឌិតសភាចារ្យ សុខ ទូច បានមានប្រសាសន៍ថា៖ «ការបង្រៀនភាសា មិនមែនគ្រាន់តែជាការផ្ទេរចំណេះដឹងនោះទេ ប៉ុន្តែជាការកសាងស្ពានតភ្ជាប់ពីមនុស្សទៅមនុស្ស និងពីវប្បធម៌ទៅវប្បធម៌។ លោកគ្រូ អ្នកគ្រូថ្មីទាំងអស់ បានធ្វើដំណើរយ៉ាងឆ្ងាយពីមាតុប្រទេសមកកាន់កម្ពុជា ដោយនាំមកជាមួយនូវចំណេះដឹង កម្លាំងចិត្ត និងក្តីស្រឡាញ់ចំពោះវិស័យអប់រំ»។

សម្រាប់លោកប្រធានរាជបណ្ឌិត្យសភាកម្ពុជា វត្តមានរបស់លោកគ្រូ អ្នកគ្រូជនជាតិចិន មកកាន់កម្ពុជា ដើម្បីបង្រៀនភាសាចិន នាពេលនេះ មិនត្រឹមតែបានបន្ថែមថាមពល និងភាពរស់រវើកថ្មីដល់បេសកកម្មបង្រៀនភាសាចិននៅកម្ពុជាប៉ុណ្ណោះទេ ប៉ុន្តែក៏បានរួមចំណែកដល់ការផ្លាស់ប្តូរវប្បធម៌ និងការយល់ដឹងកាន់តែស៊ីជម្រៅរវាងប្រជាជនកម្ពុជា និងប្រជាជនចិនផងដែរ។

សម្រាប់បេសកកម្មបណ្ដុះបណ្ដាលនេះ បណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានថ្លែងស្វាគមន៍ចំពោះការអញ្ជើញរបស់គ្រូបង្រៀនជនជាតិចិនទាំងអស់មកកាន់កម្ពុជា និងបានថ្លែងជូនពរឱ្យការបំពេញបេសកកម្មក្នុងឆ្នាំសិក្សាថ្មីនេះទទួលបានជោគជ័យ និងបន្សល់ទុកនូវអនុស្សាវរីយ៍ដ៏ល្អនៅកម្ពុជា៕