(តាកែវ)៖ លោក វ៉ី សំណាង អភិបាលខេត្តតាកែវ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត នៅព្រឹកថ្ងៃទី០៩ ខែកញ្ញា ឆ្នាំ២០២៦ បានអញ្ជើញចុះសួរសុខទុក្ខ និងនាំយកអំណោយមនុស្សធម៌របស់សាខាកាកបាទក្រហមខេត្ត ទៅផ្តល់ជូនគ្រួសារប្រជាពលរដ្ឋរងគ្រោះ និងងាយរងគ្រោះចំនួន ៥០គ្រួសារ។ ក្នុងចំណោមនោះ មាន ១១គ្រួសារជាជនចាស់ជរា ទីទ័លក្រ រស់នៅសង្កាត់បារាយណ៍ ក្រុងដូនកែវ និង ៣៩គ្រួសារទៀតរស់នៅស្រុកអង្គរបូរី ដែលក្នុងនោះមានចាស់ជរាទីទ័លក្រងាយរងគ្រោះចំនួន ២៨គ្រួសារ និងរងគ្រោះដោយខ្យល់កន្ត្រាក់ចំនួន ១១គ្រួសារ។

ក្នុងឱកាសនោះ លោក វ៉ី សំណាង បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចតែងតែយកចិត្តទុកដាក់ខ្ពស់ចំពោះសុខទុក្ខ និងជីវភាពរស់នៅរបស់ប្រជាពលរដ្ឋរងគ្រោះ និងងាយរងគ្រោះគ្រប់ទីកន្លែង ស្របតាមទិសស្លោក “ទីណាមានការលំបាក ទីនោះមានកាកបាទក្រហមកម្ពុជាចាំជួយជានិច្ច”។
លោកអភិបាលខេត្តក៏បានក្រើនរំលឹកដល់ប្រជាពលរដ្ឋឱ្យថែរក្សាសុខភាព ប្រើប្រាស់ទឹកដោយសន្សំសំចៃ ដាំដើមឈើឱ្យបានច្រើន និងប្រុងប្រយ័ត្នចំពោះគ្រោះធម្មជាតិ ដោយសារការប្រែប្រួលអាកាសធាតុ។

អំណោយដែលបានប្រគល់ជូនក្នុងមួយគ្រួសារៗ រួមមាន៖ អង្ករ ២៥ គីឡូក្រាម ត្រីខ១យួរ មី១កេស ប្រេងឆា១លីត្រ នំ១កញ្ចប់ ទឹកត្រី៣ដប ទឹកស៊ីអ៊ីវ៣ដប កន្ទេល១ មុង១ ភួយ១ សារុង១ ក្រម៉ា១ និងថវិកា ៥ម៉ឺនរៀល។ កាយវិការមនុស្សធម៌នេះបានឆ្លុះបញ្ចាំងពីការយកចិត្តទុកដាក់របស់ថ្នាក់ដឹកនាំចំពោះសុខុមាលភាពរបស់ប្រជាពលរដ្ឋដែលកំពុងជួបការលំបាក៕