អនុសាខាកាកបាទក្រហមកម្ពុជាស្រុកមោងឬស្សី ចុះចែកអំណោយមនុស្សធម៌ដល់ពលរដ្ឋងាយរងគ្រោះ១៣គ្រួសារ
09-09-2026 16:58
(បាត់ដំបង)៖ នៅព្រឹកថ្ងៃទី៩ ខែកញ្ញា ឆ្នាំ២០២៦ លោក ឡុង សុភឺន ប្រធានស្តីទីគណៈកម្មាធិការអនុសាខាកាកបាទក្រហមកម្ពុជា ស្រុកមោងឬស្សី និងសហការី បានចុះសួរសុខទុក្ខ និងនាំយកអំណោយមនុស្សធម៌របស់សប្បុរសជន ផ្តល់ជូនគ្រួសារប្រជាពលរដ្ឋងាយរងគ្រោះបំផុតចំនួន ១៣គ្រួសារ ដែលកំពុងជួបការលំបាកក្នុងជីវភាពរស់នៅប្រចាំថ្ងៃ។ សកម្មភាពនេះធ្វើឡើងតាមអនុសាសន៍របស់លោក សុខ លូ ប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង ដោយគ្រួសារទាំងនោះមកពីភូមិចំនួន៦ ក្នុងឃុំមោង និងឃុំគារ ស្រុកមោងឬស្សី ខេត្តបាត់ដំបង។
ក្នុងឱកាសនោះ លោក ឡុង សុភឺន បានពាំនាំនូវប្រសាសន៍ផ្តាំផ្ញើសួរសុខទុក្ខ ក្តីនឹករលឹក អាណិតស្រឡាញ់យ៉ាងជ្រាលជ្រៅ និងគិតគូរជានិច្ចចំពោះសុខទុក្ខរបស់បងប្អូនប្រជាពលរដ្ឋដែលជួបការលំបាក ពីលោក សុខ លូ អភិបាលខេត្ត និងជាប្រធានគណៈកម្មាធិការសាខាខេត្ត ពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាមាតាមនុស្សធម៌។ លោកក៏បានផ្តាំផ្ញើឱ្យបងប្អូនទាំងអស់យកចិត្តទុកដាក់ថែទាំសុខភាព រក្សាអនាម័យឱ្យបានល្អ បរិភោគស្អាត ផឹកស្អាត រស់នៅស្អាត និងចូលរួមថែរក្សាបរិស្ថាន។ ជាមួយគ្នានេះ លោកបានជំរុញឱ្យប្រជាពលរដ្ឋខិតខំជម្នះការលំបាក តស៊ូជំរុញកូនឱ្យទៅសាលារៀន ទទួលបានការអប់រំ មានចំណេះដឹងខ្ពង់ខ្ពស់ ដើម្បីកាត់បន្ថយភាពក្រីក្រ។
ជាការឆ្លើយតប ប្រជាពលរដ្ឋទាំង១៣គ្រួសារ បានថ្លែងអំណរគុណយ៉ាងជ្រាលជ្រៅចំពោះក្រុមការងារអនុសាខាកាកបាទក្រហមកម្ពុជាស្រុកមោងឬស្សី និងថ្នាក់ដឹកនាំទាំងអស់ ដែលតែងតែយកចិត្តទុកដាក់គិតគូរពីសុខទុក្ខរបស់ប្រជាពលរដ្ឋរងគ្រោះ និងងាយរងគ្រោះដោយគ្មានការរើសអើង។ អំណោយដែលបានផ្តល់ជូនរួមមាន អង្ករ២៥គីឡូក្រាម ទឹកត្រី១យួរ ទឹកស៊ីអ៊ីវ១យួរ មី១កេស ឃីត១កញ្ចប់ (មុង១ ភួយ១ កន្ទេល១ ខ្នើយ១ ក្រមា១ សារ៉ុង១) និងថវិកាមួយចំនួន។
ពិសេស កុមារីឈ្មោះ ម៉ន វណ្ណា អាយុ១៣ឆ្នាំ រស់នៅភូមិកោះថ្កូវ ឃុំគារ ក៏បានទទួលកង់១គ្រឿងបន្ថែម ដែលឧបត្ថម្ភដោយអង្គការ OEC ផងដែរ។ សកម្មភាពមនុស្សធម៌នេះបានបង្ហាញពីការយកចិត្តទុកដាក់ខ្ពស់របស់កាកបាទក្រហមកម្ពុជា ក្នុងការជួយសម្រាលការលំបាករបស់ប្រជាពលរដ្ឋងាយរងគ្រោះនៅទូទាំងប្រទេស៕
