(ព្រះវិហារ)៖ មន្ទីរពេទ្យបង្អែកខេត្ត ១៦ មករា ខេត្តព្រះវិហារ នៅថ្ងៃទី១០ ខែកញ្ញា ឆ្នាំ២០២៦ បានអនុវត្តការព្យាបាល និងវះកាត់ជូនអ្នកជំងឺជាស្ត្រីម្នាក់ អាយុ២៨ឆ្នាំ ដែលត្រូវបានធ្វើរោគវិនិច្ឆ័យថា មាន Symptomatic cholecystolithiasis (គ្រួសក្នុងថង់ទឹកប្រមាត់ដែលបង្កឱ្យមានរោគសញ្ញាធ្ងន់ធ្ងរ) និងបានធ្វើការវះកាត់ទទួលបានជោកជ័យ។

លោកវេជ្ជបណ្ឌិត ជូ ប៉ូនីណា ប្រធានមន្ទីរពេទ្យបង្អែក ១៦ មករា ខេត្តព្រះវិហារ បានថ្លែងថា ក្នុងការវះកាត់នេះ ក្រុមគ្រូពេទ្យជំនាញបានធ្វើការវះកាត់ យកថង់ទឹកប្រមាត់ដែលមានគ្រួសចេញ ដើម្បីព្យាបាលជំងឺ និងការពារផលវិបាកដែលអាចកើតមានបន្តទៀត។ ការវះកាត់បានប្រព្រឹត្តទៅដោយជោគជ័យ និងអ្នកជំងឺត្រូវបានក្រុមគ្រូពេទ្យបន្តតាមដាន និងថែទាំក្រោយការវះកាត់។

លោកថ្លែងទៀតថា អ្នកជំងឺឈ្មោះ គ ស ណ ភេទស្រី អាយុ២៨ឆ្នាំ មានទីលំនៅនៅភូមិម្លូរព្រៃ ឃុំម្លូរព្រៃមួយ ស្រុកឆែប ខេត្តព្រះវិហារ។ បន្ទាប់ពីទទួលការពិនិត្យ និងវាយតម្លៃពីក្រុមគ្រូពេទ្យជំនាញ អ្នកជំងឺត្រូវបានសម្រេចធ្វើការវះកាត់យកថង់ទឹកប្រមាត់ចេញ និងបន្តតាមដានស្ថានភាពអ្នកជំងឺយ៉ាងយកចិត្តទុកដាក់ ដើម្បីធានាសុវត្ថិភាព និងការស្តារសុខភាពរបស់អ្នកជំងឺ។

លោកបានបន្តថា ករណីនេះក៏ជាសក្ខីភាពមួយបង្ហាញពីការរីកចម្រើននៃសមត្ថភាព និងបច្ចេកទេសវះកាត់របស់ក្រុមគ្រូពេទ្យនៅមន្ទីរពេទ្យបង្អែកខេត្ត ១៦ មករា ដែលអាចផ្តល់សេវាព្យាបាល និងវះកាត់ជូនប្រជាពលរដ្ឋនៅក្នុងខេត្តព្រះវិហារ ដោយមិនចាំបាច់ធ្វើដំណើរទៅកាន់មន្ទីរពេទ្យនៅរាជធានី ឬខេត្តផ្សេងៗ ក្នុងករណីដែលអាចព្យាបាលបាននៅក្នុងមូលដ្ឋាន។

លោកប្រធានមន្ទីរពេទ្យបានថ្លែងអំពាវនាវដល់ប្រជាពលរដ្ឋ ប្រសិនបើមានរោគសញ្ញាមិនប្រក្រតីពាក់ព័ន្ធនឹងប្រព័ន្ធរំលាយអាហារ ឬមានការឈឺចាប់នៅតំបន់ពោះ ជាពិសេសផ្នែកខាងស្តាំខាងលើ គួរទៅពិនិត្យ និងពិគ្រោះជាមួយគ្រូពេទ្យជំនាញឱ្យបានទាន់ពេលវេលា ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ។

លោកថាការវះកាត់នេះ ត្រូវបានអនុវត្តដោយក្រុមវះកាត់ជំនាញ រួមមាន៖

*Surgeon: លោកវេជ្ជបណ្ឌិត គល់ គោរព
*Anesthesia: លោកស្រី សេម សុភ័ណ្ឌ
*Anesthesia: លោក ហង្ស សីហា
*Instrumentist: លោក ជៀន និរោ។

មន្ទីរពេទ្យបង្អែកខេត្ត ១៦ មករា នឹងបន្តពង្រឹងសមត្ថភាពក្រុមគ្រូពេទ្យ បច្ចេកទេសវេជ្ជសាស្ត្រ និងគុណភាពសេវាសុខាភិបាល ដើម្បីឆ្លើយតបតម្រូវការរបស់ប្រជាពលរដ្ឋ និងផ្តល់សេវាព្យាបាលប្រកបដោយគុណភាព សុវត្ថិភាព និងប្រសិទ្ធភាព៕