(ភ្នំពេញ)៖ លោក អ៉ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ និងជាសមាជិកគណៈកម្មាធិការលទ្ធកម្ម (គ.ល) នៅថ្ងៃទី១០ ខែកញ្ញា ឆ្នាំ២០២៦នេះ បានដឹកនាំគណៈកម្មការអន្តរក្រសួងរួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ និងវាយតម្លៃលទ្ធផលការងារស្ថាបនាស្ពានបេតុងចំនួន ១កន្លែង ប្រវែង ៣៦ម៉ែត្រ ទទឹង ៨ម៉ែត្រ ស្ថាបនាផ្លូវសងខាង ក្បាលស្ពានប្រវែងសរុប ២៣០ម៉ែត្រ និងសំណង់សិល្បការ្យផ្សេងៗ ស្ថិតនៅភូមិស្លែង ឃុំកំពង់ក្តី ឆ្លងទៅភូមិសាលា ឃុំគោកធ្លកលើ ស្រុកជីក្រែង ខេត្តសៀមរាប។

លេីកឡេីងនាឱកាសនោះ លោករដ្ឋលេខាធិការបានបញ្ជាក់ជុំវិញការអភិវឌ្ឍនៅតាមជនបទនេះថា ក្រសួងអភិវឌ្ឍន៍ជនបទ ដែលជាសេនាធិការរបស់ រាជរដ្ឋាភិបាលបាននិងកំពុងផ្ដោតការយកចិត្តទុកដាក់យ៉ាងខ្លាំង នៅលើការងារស្ថាបនាហេដ្ឋារចនាសម្ព័ន្ធនានា ដែលស្ថិតក្រោមក្របខ័ណ្ឌក្រសួង ជាក់ស្តែងផ្លូវជនបទជាច្រើនដូចជា ផ្លូវដីស ផ្លូវល្បាយក្រួស ផ្លូវកៅស៊ូពីរជាន់ និងផ្លូវក្រាលបេតុង បាននិងកំពុងផ្តល់ អត្ថប្រយោជន៍ដល់ប្រជាជននៅទូទាំងប្រទេស។

ជាក់ស្តែងស្ពានបេតុងនេះជាដើម គឺជាសមិទ្ធផលថ្មីបន្ថែមមួយទៀតរបស់ រាជរដ្ឋាភិបាលដែលបានផ្តល់ជូនប្រជាពលរដ្ឋរស់នៅក្នុងឃុំទាំងពីរខាងលើ សម្រាប់ការធ្វើដំណើរ មិនថាពេលថ្ងៃ ឬពេលយប់ ការដឹកជញ្ជូនកសិផល និងការដឹកជញ្ជូនទំនិញឆ្លងកាត់ស្ពាននេះជាដើម។

ជុំវិញការចុះពិនិត្យស្ពាននេះដែរលោករដ្ឋលេខាធិការ និងគណៈកម្មាធិការអន្តរក្រសួង ក៏បានចុះជួបសំណេះសំណាល ជាមួយអាជ្ញាធរមូលដ្ឋាន និងប្រជាពលរដ្ឋជាច្រើនគ្រួសារ ដោយក្នុងនោះក៏បានសំណូមពរដល់អាជ្ញាធរ និង ប្រជាពលរដ្ឋនៅមូលដ្ឋាន សូមចូលរួមថែទាំសមិទ្ធផលទាំងនេះទាំងអស់គ្នាដូចជា ការហាមឃាត់ឡានដែលដឹកលើសចំណុះ និងការកាប់គោះដែលប៉ះពាល់ដល់គ្រឹះស្ពានជាដើម ដើម្បីជាប្រយោជន៍សម្រាប់ការប្រើប្រាស់យូរអង្វែង។

ជុំវិញសមិទ្ធផលខាងលើនេះ អាជ្ញាធរ និងប្រជាពលរដ្ឋ បានសម្តែងនូវការសប្បាយរីករាយ និងថ្លែងនូវដឹងគុណជានិច្ចចំពោះរាជរដ្ឋាភិបាល ដែលបានផ្តល់សមិទ្ធផលជាប្រវត្តិសាស្រ្តមួយនេះនៅក្នុងមូលដ្ឋានរបស់ពួគគាត់ ដែលនេះគឺជា ការចូលរួមចំណែកដ៏សំខាន់ ក្នុងការលើកកម្ពស់ជីវភាពរស់នៅ ខណៈដែលកន្លងមកប្រជាពលរដ្ឋនៅមូលដ្ឋាននេះ តែងតែជួបការលំបាកក្នុងការធ្វើដំណើរ ការដឹកជញ្ជូនកសិផល ជាពិសេសនៅពេលមានបញ្ហាជំងឺដង្កាត់ ត្រូវដឹកជញ្ជូនទៅកាន់មន្ទីរពេទ្យជាដើម៕