(កំពង់ធំ)៖ លោក សាយក គឹមឡម អភិបាលស្រុកស្ទោង បានជំរុញយ៉ាងមុតមាំដល់គណៈកម្មការលទ្ធកម្មឃុំ និងអ្នកទទួលការសាងសង់ទាំងអស់ ឱ្យយកចិត្តទុកដាក់ខ្ពស់បំផុតលើគុណភាពគ្រឹះសំណង់ គុណភាពទូទៅ និងតម្រូវការជាអាទិភាពរបស់ប្រជាពលរដ្ឋ។ ការជំរុញនេះបានធ្វើឡើងក្នុងពិធីដេញថ្លៃកិច្ចសន្យាសំណង់ ដែលជាថវិកាមូលនិធិឃុំសំព្រោជ កាលពីព្រឹកថ្ងៃទី ១០ ខែកញ្ញា ឆ្នាំ ២០២៦។

អភិបាលស្រុកបានសង្កត់ធ្ងន់ថា ដើម្បីធានាបាននូវការអភិវឌ្ឍហេដ្ឋារចនាសម្ព័ន្ធមូលដ្ឋានប្រកបដោយគុណភាព និងប្រសិទ្ធភាពខ្ពស់ ក្រុមការងារត្រូវយកចិត្តទុកដាក់លើការកសាងគ្រឹះសំណង់ឱ្យបានរឹងមាំ ដែលជាកត្តាអាទិភាពចម្បងក្នុងការធានាសុវត្ថិភាព និងភាពធន់នៃសំណង់។

លោកបានបន្ថែមថា ការសាងសង់តាមបទដ្ឋានបច្ចេកទេស គ្រប់គម្រោងអភិវឌ្ឍន៍ទាំងអស់ ជាពិសេសការរៀបចំលូជ្រុងធំ ត្រូវតែមានការចាក់គ្រឹះឱ្យបានត្រឹមត្រូវ និងមាំទាំបំផុត ដើម្បីជៀសវាងការស្រុត ឬខូចខាតមុនអាយុកាល។ គណៈកម្មការលទ្ធកម្មឃុំ និងភាគីពាក់ព័ន្ធត្រូវមានភាពម្ចាស់ការខ្ពស់ ក្នុងការចុះតាមដាន ត្រួតពិនិត្យសកម្មភាពសាងសង់ជាប្រចាំ ដើម្បីធានាថាអ្នកទទួលការអនុវត្តបានត្រឹមត្រូវតាមកិច្ចសន្យា និងស្តង់ដារដែលបានកំណត់។

ទន្ទឹមនឹងនេះ គ្រប់សកម្មភាពអភិវឌ្ឍន៍ត្រូវយកតម្រូវការចាំបាច់របស់ប្រជាពលរដ្ឋក្នុងមូលដ្ឋានជាធំ ដើម្បីឱ្យសមិទ្ធផលដែលសាងសង់រួចបម្រើប្រយោជន៍បានចំទិសដៅ និងទាន់ពេលវេលា។

លោកក៏បានអំពាវនាវឱ្យប្រជាពលរដ្ឋចូលរួមគោរពច្បាប់ ដោយជៀសវាងដាច់ខាតនូវការសាងសង់ ឬប្រកបអាជីវកម្មរំលោភលើដីចំណីផ្លូវ ដែលនាំឱ្យប៉ះពាល់ដល់សោភ័ណភាព និងការងាយស្រួលក្នុងការពង្រីកផ្លូវនាពេលអនាគត។ លើសពីនេះ ការថែរក្សាសមិទ្ធផលឱ្យបានយូរអង្វែងក្រោយពេលកសាងរួចរាល់ គឺជាភារកិច្ចរបស់អាជ្ញាធរដែនដី និងប្រជាពលរដ្ឋទាំងអស់ត្រូវរួមគ្នាថែរក្សា ការពារ និងប្រើប្រាស់សមិទ្ធផលទាំងនោះដោយស្មារតីទទួលខុសត្រូវ ដើម្បីធានាថាវាអាចប្រើប្រាស់បានយូរអង្វែងជាប្រយោជន៍រួម។

សូមបញ្ជាក់ថា គម្រោងដែលបានដេញថ្លៃក្នុងឱកាសនេះ រួមមានការសាងសង់ផ្លូវបេតុងប្រវែង ៦០០ម៉ែត្រ ទទឹង ៦ម៉ែត្រ កម្រាស់ ០,១៥ម៉ែត្រ ការចាក់ដីលុបស្រះ ១កន្លែង និងស្លាកគម្រោង ១ផ្ទាំង ជាមួយថវិកាតម្លៃប៉ាន់ស្មាន ៤០០,១២៩,៤៥៣ រៀល។ ក្រៅពីនេះ ក៏មានគម្រោងសាងសង់ផ្លូវក្រួសក្រហមប្រវែង ៤គីឡូម៉ែត្រ ទទឹង ៦ម៉ែត្រ កម្រាស់ក្រួស ០,១៥ម៉ែត្រ និងស្លាកសញ្ញាគម្រោង ១កន្លែង ជាមួយតម្លៃប៉ាន់ស្មានសរុប ៤៣២,៤៣៨,៧៣៧ រៀលផងដែរ៕