(ភ្នំពេញ)៖ គណៈកម្មការអង្កេត បោសសម្អាត និងប្រឆាំងអំពើពុករលួយ នៃព្រឹទ្ធសភា ដឹកនាំដោយលោក ម៉ម ប៊ុននាង ប្រធានគណៈកម្មការ បានអញ្ជើញប្រគល់អំណោយមនុស្សធម៌ដ៏ថ្លៃថ្លារបស់ព្រឹទ្ធសភានៃកម្ពុជា រួមជាមួយ មូលនិធិចែករំលែកសង្គ្រោះជីវិតសកលនៃសាធារណរដ្ឋកូរ៉េ (Global Life Sharing) ដែលសុទ្ធសឹងជាឱសថសចម្រុះ ចំនួន២៩មុខ ក្នុងទំហំទឹកប្រាក់ ជាង១លានដុល្លារអាម៉េរិក ប្រគល់ជូនមន្ទីរពេទ្យកាល់ម៉ែត មន្ទីរពេទ្យបង្អែកស្រុកក្រូចឆ្មារ នៃខេត្តត្បូងឃ្មុំ និងមន្ទីរបង្អែកស្រុកស្រីសន្ធរ ខេត្តកំពង់ចាម ស្ថិតនៅវិមានព្រឹទ្ធសភា នាថ្ងៃទី៨ ខែកញ្ញា ឆ្នាំ២០២៦។

មានប្រសសាន៍សំណេះសំណាលនាឱកាសនោះ លោក ម៉ម ប៊ុននាង បានពាំនាំនូវបណ្តាំផ្ញើនូវការសាកសួរសុខទុក្ខប្រកបដោយក្តីនឹករលឹកពីសំណាក់ សម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត, លោក អ៊ុច បូររិទ្ធ អនុប្រធានទី១ និងលោកបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា ជូនដល់ថ្នាក់ដឹកនាំមន្ទីរពេទ្យកាល់ម៉ែត់ និងមន្ទីរពេទ្យបង្អែកស្រុកក្រូចឆ្មារ និងស្រុកស្រីសន្ធរ ព្រមទាំងក្រុមគ្រូពេទ្យទាំងអស់ ដែលជានិច្ចកាលតែយកចិត្តទុកដាក់ ក្នុងការពិនិត្យ និងព្យាបាលជំងឺជូនប្រជាពលរដ្ឋដោយមិនរើសអើង។

លោកប្រធាន បានមានប្រសាសន៍បន្តថា ព្រឹទ្ធសភានីតិកាលទី៥ ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន បានកំណត់យកអាទិភាពការងារចម្បងចំនួនពីរគឺ ១.ការរួមប្រាស្រ័យឱ្យកាន់តែជិតស្និទ្ធជាមួយប្រជាពលរដ្ឋ និង២.ការពង្រឹងកិច្ចអនុវត្តការទូតសភា។
ឆ្លើយតបនឹងការងារជាអាទិភាពទាំងពីរនេះ គណៈកម្មការទី១០ បានខិតខំពង្រឹងពង្រីកកិច្ចសហប្រតិបត្តិការ ជាមួយមូលនិធិចែករំលែកសង្គ្រោះជីវិតសកលនៃសាធារណរដ្ឋកូរ៉េ ដើម្បីកៀរគរជំនួយមនុស្សធម៌ជួយលើកកម្ពស់ជីវភាព និងសុខុមាលភាពដល់ប្រជាពលដ្ឋក្រីក្រ និងជនងាយរងគ្រោះនៅតាមមូលដ្ឋាននៅកម្ពុជាឱ្យបានកាន់តែប្រសើរ។

សូមរំលឹកថា គណៈកម្មការទី១០ព្រឹទ្ធសភា និងមូលនិធិចែករំលែកសង្គ្រោះជីវិតសកល បានចុះហត្ថលេខាលើអនុស្សរណៈនៃការយោគយល់គ្នា ស្តីពីការប្រគល់-ទទួលជំនួយមនុស្សធម៌ ដែលរួមមាន ឱសថ គ្រឿងបរិក្ខាពេទ្យ សម្លៀកបំពាក់ និងសម្ភារៈប្រើប្រាស់ប្រចាំថ្ងៃ ចំនួន ៣លើក រួចមកហើយ ក្នុងទំហំទឹកប្រាក់សរុបចំនួន ៦៥លានដុល្លារអាមេរិក។ នៅត្រឹមខែសីហា ឆ្នាំ២០២៦នេះ មូលនិធិចែករំលែកសង្គ្រោះជីវិតសកល បានផ្តល់ជំនួយមនុស្សធម៌មកព្រឹទ្ធសភាកម្ពុជា បានចំនួន ២៣លើក ក្នុងទំហំទឹកប្រាក់សរុបចំនួន ៣៤,៤១៩,៥៥០.៨៥ដុល្លារអាមេរិក ។

ជំនួយមនុស្សធម៌ទាំងអស់ ត្រូវបានថ្នាក់ដឹកនាំព្រឹទ្ធសភា គ្រប់គ្រង និងបែងចែកទៅតាមបណ្តា រាជធានី ខេត្ត មន្ទីរពេទ្យ មន្ទីរពេទ្យបង្អែក មណ្ឌលសុខភាព ជនងាយរងគ្រោះ ពិសេសប្រជាជនភៀសសឹកនៅតាមបណ្តោយព្រំដែនកម្ពុជា-ថៃ ប្រកបដោយតម្លាភាព គណនេយ្យភាព និងចំគោលដៅ ដើម្បីរួមចំណែកលើកកម្ពស់សុខុមាលភាពរបស់ប្រជាពលរដ្ឋកម្ពុជា ឱ្យបានកាន់ប្រសើរឡើង ស្របតាមបំណងប្រាថ្នាដ៏ថ្លៃថ្លា របស់ព្រឹទ្ធសភា និងមូលនិធិចែករំលែកសង្គ្រោះជីវិតសកល៕