(គុនមីង-ចិន)៖ តបតាមការអញ្ជើញរបស់ភាគីចិន, ក្រុមអ្នកសារព័ត៌មានកម្ពុជាចំនួន ៣ ស្ថាប័ន រួមមាន លោក ប៉ា ជេដ្ឋា ពីបណ្តាញព័ត៌មាន Fresh News, លោក ជា វណ្ណៈ ពីទីភ្នាក់ងារព័ត៌មានជាតិកម្ពុជា (AKP) និងលោក ញ៉ែម សុផល ពីសារព័ត៌មាន AMS បានធ្វើទស្សនកិច្ចរយៈពេល ៤ ថ្ងៃ ចាប់ពីថ្ងៃទី ១០ ដល់ ១៣ ខែកញ្ញា ឆ្នាំ ២០២៦ នៅទីក្រុងគុនមីង ខេត្តយូណាន ប្រទេសចិន។

ក្នុងឱកាសនោះ ក្រុមអ្នកសារព័ត៌មានកម្ពុជា បានជួបប្រជុំពិភាក្សាជាមួយអ្នកស្រាវជ្រាវចិន រួមមាន លោកស្រីបណ្ឌិត Zhao Shulan នាយកវិទ្យាស្ថានសិក្សាស្រាវជ្រាវអាស៊ីអាគ្នេយ៍ នៃបណ្ឌិត្យសភាវិទ្យាសាស្ត្រសង្គមខេត្តយូណាន និងសហការីរបស់លោកស្រីចំនួន ២ រូបផ្សេងទៀត ព្រមទាំងមានការចូលរួមពីតំណាងសមាគមមិត្តភាពអន្តរជាតិខេត្តយូណាន ២ រូបផងដែរ។ កិច្ចពិភាក្សា ដើម្បីផ្លាស់ប្តូរទស្សនៈ និងជំរុញកិច្ចសហប្រតិបត្តិការរវាងស្ថាប័នព័ត៌មានទាំងពីរប្រទេស ក្នុងការពង្រឹងទំនាក់ទំនងមិត្តភាពកម្ពុជា-ចិន។

ក្នុងកិច្ចប្រជុំ ភាគីកម្ពុជាបានលើកឡើងពីទំនាក់ទំនងមិត្តភាពដែកថែបដ៏យូរអង្វែងរវាងប្រទេសទាំងពីរ ព្រមទាំងកិច្ចសហប្រតិបត្តិការរវាងអង្គភាពព័ត៌មានកម្ពុជា ជាមួយសារព័ត៌មានចិន។

ក្រុមអ្នកសារព័ត៌មានកម្ពុជា ក៏បានពន្យល់បំភ្លឺ ដល់ភាគីចិនអំពីការយល់ឃើញរបស់ប្រជាជនកម្ពុជា ចំពោះប្រទេសចិន ពិសេសក្នុងពេលមានជម្លោះព្រំដែនកម្ពុជា-ថៃ និងការប្រយុទ្ធប្រឆាំងនឹងបទល្មើសឆបោកតាមប្រព័ន្ធអនឡាញ (Scams) នៅកម្ពុជា ដោយបានបដិសេធចំពោះការលើកឡើងមិនពិតមួយចំនួន។ ភាគីចិនបានយល់កាន់តែច្បាស់ពីបញ្ហានេះ និងស្នើឱ្យកម្ពុជាផ្សព្វផ្សាយព័ត៌មានជាភាសាចិនឱ្យបានច្រើន ដើម្បីជៀសវាងការយល់ច្រឡំ និងទទួលបានព័ត៌មានមិនពិតណាមួយ ប៉ះពាល់ដល់ទំនាក់ទំនងនៃប្រទេសទាំងពីរ។

ក្រៅពីកិច្ចប្រជុំ ក្រុមអ្នកសារព័ត៌មានកម្ពុជា ក៏បានធ្វើទស្សនកិច្ច នៅក្រុមហ៊ុនបច្ចេកវិទ្យាចិនចំនួនពីរ រួមមានក្រុមហ៊ុន Inspur ដែលជាក្រុមហ៊ុនបច្ចេកវិទ្យាធំមួយ ផ្តោតលើ Cloud Computing, Big Data, AI និង Digital Solutions និងក្រុមហ៊ុន Shanhai Luijuan Technology ដែលជាក្រុមហ៊ុនផលិតវីដេអូដោយ AI។ ដំណើរទស្សនកិច្ចនេះ បានបង្ហាញពីសក្តានុពលនៃកិច្ចសហប្រតិបត្តិការបច្ចេកវិទ្យា និងព័ត៌មានរវាងប្រទេសទាំងពីរ។

ដំណើរទស្សនកិច្ចនេះ បានរួមចំណែកយ៉ាងសំខាន់ ក្នុងការបង្កើនការយល់ដឹងគ្នាទៅវិញទៅមក រវាងអ្នកសារព័ត៌មាន និងអ្នកស្រាវជ្រាវនៃប្រទេសទាំងពីរ ព្រមទាំងបានពង្រឹងមូលដ្ឋានគ្រឹះនៃទំនាក់ទំនងមិត្តភាព និងកិច្ចសហប្រតិបត្តិការរវាងកម្ពុជា-ចិន ឱ្យកាន់តែរឹងមាំ៕