(បន្ទាយមានជ័យ)៖ នៅថ្ងៃទី១៥ ខែកញ្ញា ឆ្នាំ២០២៦ គណៈបញ្ជាការឯកភាពរដ្ឋបាលក្រុងប៉ោយប៉ែត ខេត្តបន្ទាយមានជ័យ បានចុះអនុវត្តការងាររដ្ឋបាល នៅតាមបណ្តាសង្កាត់នានា ក្នុងភូមិសាស្ត្រក្រុងប៉ោយប៉ែត សរុបចំនួន១១ទីតាំង រកឃើញជនបរទេសស្នាក់នៅសរុបចំនួន ១០៤នាក់ ក្នុងនោះមានស្រី ៣១នាក់។

ប្រតិបត្ដិការនេះ ធ្វើឡើងក្រោមការបញ្ជារផ្ទាល់ពីលោក អ៊ុំ រាត្រី អភិបាលខេត្ដបន្ទាយមានជ័យ និងសម្របសម្រួលពីលោក កើត វណ្ណារ៉េត ព្រះរាជអាជ្ញាអមសាលាដំបូង ខេត្ដបន្ទាយមានជ័យ។

ជនបរទេសទាំងនោះមានច្រើនសញ្ជាតិ រួមមាន ជនជាតិថៃ ៣៣នាក់ ជនជាតិឥណ្ឌូនេស៊ី ២៤នាក់ ជនជាតិបង់ក្លាដេស ២៣នាក់ ជនជាតិឡាវ ៧នាក់ ជនជាតិប៉ាគីស្ថាន ៧នាក់ ជនជាតិឥណ្ឌា ៦នាក់ ជនជាតិហ្វីលីពីន ១នាក់ ជនជាតិមីយ៉ាន់ម៉ា ១នាក់ ជនជាតិនេប៉ាល់ ១នាក់ និងជនជាតិចិន ១នាក់។

ក្នុងចំណោមជនបរទេសសរុប ១០៤នាក់ គឺមាន ៨៩នាក់ មានឯកសារត្រឹមត្រូវ ហើយ១៥នាក់ទៀត មិនមានឯកសារស្នាក់នៅត្រឹមត្រូវនោះទេ។

ប្រតិបត្តិការនេះ ត្រូវបានបែងចែកជាបីតំបន់សំខាន់ៗ៖ នៅសង្កាត់ប៉ោយប៉ែត ដឹកនាំដោយលោក បោន សិលា អភិបាលរងក្រុង បានចុះត្រួតពិនិត្យ ០២គោលដៅ រកឃើញជនបរទេស ៣១នាក់ ដែលក្នុងនោះ ១៥នាក់គ្មានឯកសារ។

នៅសង្កាត់អូរជ្រៅ ដឹកនាំដោយលោក ពេស រិយ៉ាស័ក អភិបាលរងក្រុង បានចុះត្រួតពិនិត្យ ០៤គោលដៅ រកឃើញជនបរទេស ៦៧នាក់ ដែលទាំងអស់មានឯកសារត្រឹមត្រូវ។ ចំណែកនៅសង្កាត់ផ្សារកណ្ដាល ដឹកនាំដោយលោក មាស សំណាង អភិបាលរងក្រុង បានចុះត្រួតពិនិត្យ ០៣ទីតាំង រកឃើញជនបរទេស ៦នាក់ ដែលទាំងអស់មានឯកសារត្រឹមត្រូវ។

ក្នុងប្រតិបត្តិការទាំងនេះ អាជ្ញាធរក៏បានបង្ក្រាបទីតាំងមួយ ដែលពាក់ព័ន្ធនឹងបទល្មើសស្កេមអនឡាញផងដែរ៕