(ម៉ាឡេស៊ី)៖ បណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានដឹកនាំគណៈប្រតិភូកម្ពុជា អញ្ជើញចូលរួមកិច្ចប្រជុំថ្នាក់អគ្គនាយកអាកាសចរណ៍ស៊ីវិល ប្រចាំតំបន់អាស៊ី និងប៉ាស៊ីហ្វិក លើកទី៦១ (DGCA/61) ប្រព្រឹត្តទៅកាលពីថ្ងៃទី៧ ដល់ថ្ងៃទី១១ ខែកញ្ញា ឆ្នាំ២០២៦ នៅទីក្រុងកូឡាឡាំពួរ ប្រទេសម៉ាឡេស៊ី ដែលបញ្ចប់ប្រកបដោយជោគជ័យ។

សន្និសីទនេះត្រូវបានរៀបចំក្នុងក្របខណ្ឌតំបន់អាស៊ី និងប៉ាស៊ីហ្វិករបស់អង្គការអាកាសចរណ៍ស៊ីវិលអន្តរជាតិ (ICAO) និងទទួលធ្វើជាម្ចាស់ផ្ទះ ដោយអាជ្ញាធរអាកាសចរណ៍ស៊ីវិលម៉ាឡេស៊ី (CAAM) ដោយមានការចូលរួមពីអាជ្ញាធរអាកាសចរណ៍ស៊ីវិល មន្ត្រីជាន់ខ្ពស់ អង្គការអន្តរជាតិ និងភាគីពាក់ព័ន្ធក្នុងឧស្សាហកម្មអាកាសចរណ៍ស៊ីវិល ក្នុងតំបន់អាស៊ី និងប៉ាស៊ីហ្វិក ក្រោមប្រធានបទ «មេឃវៃឆ្លាត៖ បច្ចេកវិទ្យាកំពុងលេចឡើង សម្រាប់អាកាសចរណ៍ ដែលមានសុវត្ថិភាព សន្តិសុខ ចីរភាព និងប្រសិទ្ធភាព» ដោយផ្តោតលើការពិភាក្សាអំពីនិន្នាការថ្មីៗ, បច្ចេកវិទ្យាទំនើប និងដំណោះស្រាយប្រកបដោយភាពច្នៃប្រឌិត ដើម្បីជំរុញការអភិវឌ្ឍវិស័យអាកាសចរណ៍ក្នុងតំបន់។

កិច្ចប្រជុំថ្នាក់អគ្គនាយកអាកាសចរណ៍ស៊ីវិល ប្រចាំតំបន់អាស៊ី និងប៉ាស៊ីហ្វិក លើកទី៦១ គឺជាវេទិកាយុទ្ធសាស្ត្រដ៏សំខាន់មួយសម្រាប់កម្ពុជា ក្នុងការផ្លាស់ប្តូរទស្សនៈ ចែករំលែកបទពិសោធន៍ និងឧត្តមានុវត្តន៍ជាមួយថ្នាក់ដឹកនាំ និងអ្នកជំនាញអាកាសចរណ៍មកពីបណ្តាប្រទេសក្នុងតំបន់។

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានបញ្ជាក់ឱ្យដឹងថា កិច្ចប្រជុំនេះទទួលបានលទ្ធផលសំខាន់ៗ ជាយុទ្ធសាស្ត្រនៃការចូលរួមរបស់កម្ពុជារួមមាន៖

១. អនុលោមភាពបទប្បញ្ញត្តិ និងឧត្តមភាពផ្នែកសុវត្ថិភាព

កម្ពុជាបានបញ្ជាក់ជាថ្មីអំពីការអនុលោមស្របតាមផែនការសុវត្ថិភាពអាកាសចរណ៍តំបន់អាស៊ី និងប៉ាស៊ីហ្វិក (RASP-APAC) របស់ ICAO និងបានពង្រឹងប្រតិបត្តិការនៃកម្មវិធីសុវត្ថិភាពរដ្ឋ (SSP) មុនការវាយតម្លៃសវនកម្មជាសាកល ស្តីពីការត្រួតពិនិត្យសុវត្ថិភាពអាកាសចរណ៍ (USOAP)។ ការងារនេះគាំទ្រដល់ការបន្តអនុលោមភាពតាមស្តង់ដារអន្តរជាតិ ការធ្វើទំនើបកម្មកងយន្តហោះ និងដាក់ឱ្យប្រើប្រាស់យន្តហោះទាំងនោះ ដែលជារបស់ក្រុមហ៊ុនអាកាសចរណ៍ជាតិកម្ពុជា (Air Cambodia/K6) ដោយសុវត្ថិភាព រួមមានយន្តហោះប្រភេទ COMAC C909 ចាប់ពីចុងឆ្នាំ២០២៦ និង Boeing 737 MAX ចាប់ពីឆ្នាំ២០២៩។

២. ទំនើបកម្មដែនអាកាស និងការតភ្ជាប់ក្នុងតំបន់

កម្ពុជាបានជំរុញយន្តការសម្របសម្រួលជាមួយដៃគូអាស៊ានលើការគ្រប់គ្រងលំហូរចរាចរណ៍ផ្លូវអាកាស (Air Traffic Flow Management/ATFM) និងបានបញ្ជាក់ជំហរក្នុងការចូលរួមយ៉ាងសកម្ម ក្នុងកម្មវិធីនីតិវិធីហោះហើរតំបន់អាស៊ី-ប៉ាស៊ីហ្វិក ដំណាក់កាលទី៦។ គំនិតផ្តួចផ្តើមទាំងនេះជួយលើកកម្ពស់ប្រសិទ្ធភាពដែនអាកាសក្នុងតំបន់ និងកាត់បន្ថយការពន្យារពេលប្រតិបត្តិការ។

៣. ការពង្រឹងសមាហរណកម្មអាកាសចរណ៍ប្រកបដោយចីរភាព

កម្ពុជាបានគាំទ្រក្របខណ្ឌតំបន់ សម្រាប់ឥន្ធនៈអាកាសចរណ៍ប្រកបដោយចីរភាព (Sustainable Aviation Fuel / SAF) និងយន្តការរាយការណ៍សម្រាប់គម្រោងទូទាត់កាបូន និងកាត់បន្ថយការបំភាយកាបូនសម្រាប់អាកាសចរណ៍អន្តរជាតិ (Carbon Offsetting and Reduction Scheme for International Aviation / CORSIA) ដោយសម្របយុទ្ធសាស្ត្រកំណើនអាកាសចរណ៍ជាមួយគោលដៅដែលបានកំណត់រយៈពេលវែងរបស់ ICAO ក្នុងការឈានទៅរកការកាត់បន្ថយការបំភាយកាបូនមកសូន្យ ត្រឹមឆ្នាំ២០៥០។

៤. ភាពត្រៀមរួចរាល់នៃហេដ្ឋារចនាសម្ព័ន្ធអន្តរជាតិ

កម្ពុជាបានបញ្ជាក់ឡើងវិញពីភាពត្រៀមរួចរាល់របស់អាកាសយានដ្ឋានអន្តរជាតិតេជោ (KTI) អាកាសយានដ្ឋានអន្តរជាតិសៀមរាបអង្គរ (SAI) និងអាកាសយានដ្ឋានអន្តរជាតិព្រះសីហនុ (KOS) ផ្តល់សមត្ថភាពច្រកទ្វារអន្តរជាតិទំនើបសម្រាប់កម្ពុជា ក្នុងការប្រតិបត្តិស្របតាមស្តង់ដារអន្តរជាតិ និងគាំទ្រការពង្រីកការតភ្ជាប់ក្នុងតំបន់ និងអន្តរទ្វីប។

លទ្ធផលទាំងនេះឆ្លុះបញ្ចាំងពីការវិវត្តរបស់កម្ពុជាពីអាជ្ញាធរនិយ័តកម្ម ដែលផ្តោតសំខាន់លើអនុលោមភាព ទៅជាដៃគូបច្ចេកទេសដែលមានចក្ខុវិស័យ និងចូលរួមចំណែកក្នុងការកំណត់ទិសដៅ គោលនយោបាយអាកាសចរណ៍ សុវត្ថិភាព ចីរភាព និងប្រសិទ្ធភាពដែនអាកាសក្នុងតំបន់។

ការចូលរួមរបស់កម្ពុជា ក្នុងសន្និសីទអគ្គនាយកអាកាសចរណ៍ស៊ីវិលតំបន់អាស៊ី និងប៉ាស៊ីហ្វិក លើកទី៦១ (DGCA/61) នេះ គឺជាការពង្រឹងក៏ដូចជាការបញ្ជាក់ឡើងវិញនូវការប្តេជ្ញាចិត្តយ៉ាងមុតមាំ និងឥតងាករេរបស់យើង ក្នុងការលើកកម្ពស់សុវត្ថិភាព សន្តិសុខ និងចីរភាពនៃវិស័យអាកាសចរណ៍ស៊ីវិល ស្របតាមបទដ្ឋាន និងស្តង់ដារអន្តរជាតិកម្រិតខ្ពស់បំផុត។

តាមរយៈការផ្លាស់ប្តូរបទពិសោធន៍ និងកិច្ចសហប្រតិបត្តិការដៃគូយ៉ាងជិតស្និទ្ធក្នុងតំបន់ ការពង្រឹងកិច្ចប្រតិបត្តិការផ្អែកលើលិខិតបទដ្ឋានគតិយុត្តយ៉ាងម៉ឺងម៉ាត់ និងការអភិវឌ្ឍហេដ្ឋារចនាសម្ព័ន្ធប្រកបដោយចក្ខុវិស័យវែងឆ្ងាយ ព្រះរាជាណាចក្រកម្ពុជាកំពុងបង្កើនតួនាទី និងពង្រឹងជំហររបស់ខ្លួនជា «ដៃគូប្រកបដោយទំនុកចិត្ត និងសមត្ថភាពបច្ចេកទេសខ្ពស់» នៅក្នុងប្រព័ន្ធអេកូឡូស៊ីអាកាសចរណ៍ស៊ីវិលអាស៊ីអាគ្នេយ៍។

វឌ្ឍនភាពដ៏សំខាន់នេះ បាននិងកំពុងគាំទ្រដោយផ្ទាល់ដល់ការសម្រេចបាននូវចក្ខុវិស័យសេដ្ឋកិច្ច-សង្គមដ៏ទូលំទូលាយរបស់កម្ពុជា តាមរយៈការបង្កើតឱកាសការងារ ការទាក់ទាញវិនិយោគិនបរទេស និងការភ្ជាប់ទំនាក់ទំនងកម្ពុជាទៅកាន់សកលលោក។

បន្ថែមលើនេះ តាមរយៈការត្រួតពិនិត្យ និងការគ្រប់គ្រងនិយ័តកម្មប្រកបដោយប្រសិទ្ធភាព និងភាពម៉ត់ចត់ ព្រមទាំងកិច្ចសហប្រតិបត្តិការតំបន់កាន់តែជិតស្និទ្ធ កម្ពុជានឹងបន្តធ្វើការយ៉ាងជិតស្និទ្ធជាមួយអង្គការអាកាសចរណ៍ស៊ីវិលអន្តរជាតិ (ICAO) រដ្ឋសមាជិក និងភាគីពាក់ព័ន្ធទាំងអស់ នៅក្នុងឧស្សាហកម្មអាកាសចរណ៍ស៊ីវិល ដើម្បីពង្រឹងការតភ្ជាប់ផ្លូវអាកាស និងរួមចំណែកដល់ការអភិវឌ្ឍសេដ្ឋកិច្ច-សង្គម ប្រកបដោយចីរភាព និងបរិយាបន្ន ដើម្បីឈានទៅសម្រេចបាននូវគោលដៅអភិវឌ្ឍន៍កម្ពុជា ឆ្នាំ២០៥០៕