(ភ្នំពេញ)៖ ការនាំចេញអង្ករកម្ពុជាទៅហ្វីលីពីនរំពឹងថា នឹងហក់ឡើងដល់​ប្រមាណ ​២០ម៉ឺនតោន ​ក្នុងឆ្នាំ២០២៦នេះ ដោយមានចំនួនប្រហែលប្រទេសចិន ដែលជាទីផ្សារនាំចេញអង្ករធំជាងគេរបស់កម្ពុជា។​

​ថ្លែងប្រាប់អ្នកសារព័ត៌មាន ​ក្នុងពិធីចុះកិច្ចសន្យាទិញ-លក់អង្ករ រវាងក្រុមហ៊ុន CITY RICE Import Export របស់កម្ពុជា ជាមួយក្រុមហ៊ុន DILAI TRADING របស់ហ្វីលីពីន ដើម្បីនាំចេញអង្ករ ១០ ០០០ តោន កាលពីថ្ងៃទី ១៤ ខែកញ្ញា ឆ្នាំ២០២៦ ​លោកស្រី ចម និម្មល រដ្ឋមន្រ្តីក្រសួងពាណិជ្ជកម្ម បានគូសបញ្ជាក់ថា ការនាំចេញទៅហ្វីលីពីន បានកើនឡើងយ៉ាងគំហុកពីត្រឹម៣ ពាន់តោន កាលពី ៣ឆ្នាំមុន ហក់ឡើងដល់ជិត ២០ម៉ឺនតោនសម្រាប់ឆ្នាំនេះ។

​លោកស្រីបន្តថា ហ្វីលីពីន គឺជាទីផ្សារសក្តានុពលដ៏ធំមួយ ​សម្រាប់ការនាំចេញអង្ករ​របស់កម្ពុជានៅពេលអនាគត ដោយសារតម្រូវការប្រើប្រាស់អង្កររបស់ហ្វីលីពីនមានរហូតដល់ ៣ លានតោនក្នុងមួយឆ្នាំ។

​លោកស្រី ចម និម្មល បន្ថែមថា ភាពជោគជ័យនេះ កើតចេញពីកត្តាសំខាន់ពីរ គឺការផ្សព្វផ្សាយឱ្យពិភពលោកបានស្គាល់ពីគុណភាពអង្ករកម្ពុជា ជាពិសេសបន្ទាប់ពីទទួលបានពានរង្វាន់ជាអង្ករលេខ ១ លើពិភពលោកចំនួន ៧ ដង និងការខិតខំប្រឹងប្រែងរបស់វិស័យឯកជន រួមទាំងសហព័ន្ធស្រូវអង្ករកម្ពុជា។ ទោះបីជាអង្ករកម្ពុជាមានតម្លៃថ្លៃជាងអង្ករប្រទេសក្នុងតំបន់ក៏ដោយ គុណភាព និងកិច្ចខិតខំប្រឹងប្រែងទាំងនេះបានបើកច្រកទីផ្សារថ្មី និងពង្រីកវត្តមានអង្ករកម្ពុជានៅលើឆាកអន្តរជាតិ។ ​

ឧកញ៉ាបណ្ឌិត ឡាយ ឈុនហួ អគ្គនាយកក្រុមហ៊ុន City Rice Import Export Co., Ltd និងជាប្រធានសហព័ន្ធស្រូវអង្ករកម្ពុជា បាន​ចាត់ទុកថា ឆ្នាំ២០២៦នេះជាឆ្នាំប្រវត្តិសាស្ត្រនៃការនាំចេញអង្ករកម្ពុជាទៅកាន់ទីផ្សារហ្វីលីពីន ដែលអាចនឹងក្លាយជាទីផ្សារធំជាងគេបង្អស់។ ការកើនឡើងនេះ គឺដោយសារកិច្ចខិតខំប្រឹងប្រែងរបស់ក្រសួងពាណិជ្ជកម្ម ដែលបាន​ដឹកនាំវិស័យឯកជន រួមមានសហព័ន្ធស្រូវអង្ករកម្ពុជា និងសហគ្រាសពាណិជ្ជកម្មកម្ពុជា (CTE) ក្នុងការធ្វើទស្សនកិច្ច និងផ្គូរផ្គងពាណិជ្ជកម្មជាមួយអ្នកនាំ​ចូលរបស់ហ្វីលីពីន រហូតឈានដល់កិច្ចសន្យាទិញលក់ និងការនាំចេញកើនឡើងជាលំដាប់។

លោកបន្ថែមថា​ កាល​ឆ្នាំ២០២៥ ​ការនាំចេញអង្ករពីកម្ពុជាទៅហ្វីលីពីន ​មានបរិមាណត្រឹមតែ៤ទៅ៥ ពាន់តោន​ប៉ុណ្ណោះ ​ប៉ុន្តែរហូតមកខែ កញ្ញាឆ្នាំនេះ ​ការនាំ​ចេញបានកើនឡើង រហូតដល់ជា១០ម៉ឺនតោន​។ ​ប្រសិនបើកម្ពុជានៅមានអង្ករច្រើន និងការនាំចេញនៅមានសន្ទុះដូចបច្ចុប្បន្ននេះ ហ្វីលីពីនអាចនឹងក្លាយជាប្រទេសនាំចូលអង្ករធំជាងគេពីកម្ពុជា ដោយមានចំនួននាំចេញប្រហាក់ប្រហែលនឹងប្រទេសចិន។

លោកបន្ថែមថា«​ទីផ្សារនេះបើសិនជាមានលទ្ធភាពរលូនដូចបច្ចុប្បន្ននេះ គឺយើងនឹងអាចឈានទៅដល់៣០ម៉ឺនតោន។ ហើយសហព័ន្ធស្រូវអង្ករកម្ពុជានឹងជំរុញសមាជិកទាំងអស់ និងធ្វើការជិតស្និទ្ធជាមួយនឹងអ្នកនាំចូល ដើម្បីបង្កើនទំហំនាំចូល​អង្ករដែលមានគុណខ្ពស់ពីប្រទេសកម្ពុជាទៅប្រទេសហ្វីលីពិនឱ្យមានការកើនឡើង នៅឆ្នាំ២០២៧ ទៀត»។ ​

ក្នុងរយៈពេល ៨ខែដំបូងនៃឆ្នាំ២០២៦ កម្ពុជាបាននាំចេញអង្ករទៅហ្វីលីពីនបានចំនួន ១២២ ១០២ តោន ដែលស្មើនឹងជាង ១៥,៤% នៃបរិមាណនាំចេញអង្ករសរុប ៧៩២ ២១២ តោន។ តាមការបញ្ជាក់របស់សហព័ន្ធអង្ករកម្ពុជា (CRF) អង្ករដែលមានកិច្ចសន្យាទិញរួចហើយសម្រាប់ខែកញ្ញា ដល់ខែធ្នូឆ្នាំនេះ ត្រូវបានគេរំពឹងថានឹងមានបន្ថែមទៀត ៨៧ ៣៤៤ តោន ដែលនឹងធ្វើឱ្យបរិមាណនាំចេញសរុបទៅហ្វីលីពីនក្នុងឆ្នាំ២០២៦ ឈានដល់ប្រមាណ ២០៩ ៤៤៦ តោន។ ​

សូមជម្រាបថា ​ក្នុងរយៈពេល ៨ខែដំបូងនៃឆ្នាំ២០២៦ កម្ពុជាបាននាំចេញអង្ករកិនរួចប្រមាណ ៧៩២.២១២ តោន គិតជាទឹកប្រាក់ប្រមាណ ៤៦៤,១ លានដុល្លារអាម៉េរិក។ ផ្អែកលើកំណើនដ៏ខ្លាំងក្លានេះ កម្ពុជារំពឹងថានឹងសម្រេចបានគោលដៅនាំចេញអង្ករចំនួន ១ លានតោននៅក្នុងឆ្នាំ២០២៦នេះ ស្របតាមគោលនយោបាយជំរុញការនាំចេញអង្កររបស់រាជរដ្ឋាភិបាល៕