(ភ្នំពេញ)៖ លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងលោកស្រី ព្រមទាំងក្រុមគ្រួសារ មានទុក្ខជាទម្ងន់ដោយសារ ធម្មសទ្ធានុរ័ក្ខសិរីតាណី អ៊ាង សុផាត អគ្គមហាឧបាសិកាពុទ្ធសាសនូបត្ថម្ភក៍ ដែលត្រូវជាម្តាយបង្កើត ម្តាយក្មេក និងជីដូន បានទទួលមរណភាពនៅថ្ងៃពុធ ៥កើត ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៦ ខែកញ្ញា ឆ្នាំ២០២៦ វេលាម៉ោង ១៨:៤៣នាទី នៅទីក្រុងអែដម៉ុនតុន រដ្ឋធានីនៃខេត្តអាល់បឺរតា ប្រទេសកាណាដា ក្នុងជន្មាយុ ៩៣ឆ្នាំ ដោយជរាពាធ។

សពធម្មសទ្ធានុរ័ក្ខសិរីតាណី អ៊ាង សុផាត អគ្គមហាឧបាសិកាពុទ្ធសាសនូបត្ថម្ភក៍ កំពុងតម្កល់ និងបូជានៅទីក្រុងអែដម៉ុនតុន រដ្ឋធានីនៃខេត្តអាល់បឺរតា ប្រទេសកាណាដា។ បន្ទាប់ពីបូជា អដ្ឋិធាតុនឹងដង្ហែមកធ្វើបុណ្យទក្ខិណានុប្បទាន នៅវត្តឧណ្ណាលោម។

កម្មវិធីបុណ្យនឹងប្រព្រឹត្តទៅដូចខាងក្រោម៖

*ថ្ងៃអាទិត្យ ១រោច ខែភទ្របទ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី២៧ ខែកញ្ញា ឆ្នាំ២០២៦ វេលាម៉ោង ១៣:៣០នាទី ជួបជុំបងប្អូន កូន ចៅ ចៅទួត ញាតិមិត្តជិតឆ្ងាយ និងភ្ញៀវកិត្តិយស ប្រារព្ធពិធីនមស្សការព្រះរតនត្រៃ សមាទានសីល និមន្តសម្តេចសង្ឃ ចំនួន ៧ព្រះអង្គ ចម្រើនព្រះបរិត្ត និងអារាធនានិមន្ត សម្តេចព្រះសង្ឃ សម្តែងព្រះធម៌ទេសនា។ បន្ទាប់ភ្ញៀវកិត្តិយសជាតិ អន្តរជាតិ អញ្ជើញអុជធូប និងចូលរួមសាររំលែកទុក្ខជាមួយនឹងកូនចៅ ចៅទួត ក្រុមគ្រួសារ និងអញ្ជើញពិសាភោជនាហារ។

*ថ្ងៃចន្ទ ២រោច ខែភទ្របទ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី២៨ ខែកញ្ញា ឆ្នាំ២០២៦ វេលាម៉ោង ៨:០០ព្រឹក ប្រារព្ធពិធីនមស្សការព្រះរតនត្រៃ សមាទានសីល វេរភត្តថ្វាយ ប្រគេន សម្តេចព្រះសង្ឃ បង្សុកូល ដារឆ្លង និងឧទ្ទិសមហាកុសលជាកិច្ចបង្ហើយបុណ្យ។ ជាមួយនេះ និមន្តសម្តេចព្រះសង្ឃ ទស់បន្លុង។ បន្ទាប់ ឯកឧត្តម លោកជំទាវ ភ្ញៀវកិត្តិយសជាតិ-អន្តរជាតិ អញ្ជើញអុចធូប និងចូលរួមសាររំលែកទុក្ខជាមួយនឹងកូន ចៅ ចៅទួត ក្រុមគ្រួសារ និងអញ្ជើញពិសាភោជនាហារ៕