(ពោធិ៍សាត់)៖ រដ្ឋបាលស្រុកវាលវែង បានទទួលបានថវិកាឧបត្ថម្ភចំនួន ១០,០០០,០០០រៀល ពីលោក ជិត ប៉ុណ្ណារ៉ា ប្រធានក្រុមគ្រូពេទ្យភ្នែកស្ម័គ្រចិត្ត និងលោកស្រី យូ ស្រីលាភ ទីប្រឹក្សាក្រសួងមហាផ្ទៃ ដើម្បីរួមចំណែកក្នុងសកម្មភាពអភិវឌ្ឍន៍ និងកែលម្អសោភ័ណភាពក្នុងស្រុក។

ថវិកាសប្បុរសធម៌នេះ នឹងត្រូវយកទៅប្រើប្រាស់លើការងារអភិវឌ្ឍន៍សំខាន់ៗជាច្រើន រួមមាន៖

ទី១-ការកសាងផ្លូវចូលទៅកាន់តំបន់រមណីយដ្ឋានទឹកធ្លាក់ថ្មចាំង ឃុំក្រពើពីរ
ទី២-ការសម្អាត រៀបចំសួន និងដាំផ្កានៅ តំបន់ជើងភ្នំ១៥០០
ទី៣-ការរៀបចំសណ្ដាប់ធ្នាប់ អនាម័យ និងបរិស្ថាន
ទី៤-ការបន្តយុទ្ធនាការដាំកូនឈើលម្អ តាមបណ្តោយផ្លូវជាតិលេខ១០ និងផ្លូវជាតិលេខ៥៥។

លោក ធាង ឡេង អភិបាលស្រុកវាលវែង បានសម្តែងនូវការដឹងគុណយ៉ាងជ្រាលជ្រៅបំផុតជូនចំពោះលោក ជិត ប៉ុណ្ណារ៉ា និងលោកស្រី យូ ស្រីលាភ ព្រមទាំងក្រុមគ្រួសារ ដែលតែងតែបង្ហាញទឹកចិត្តសប្បុរសធម៌ជួយដល់សង្គម និងអាជ្ញាធរមូលដ្ឋាន នាពេលកន្លងមក។

លោកអភិបាលស្រុកបានគូសបញ្ជាក់បន្ថែមថា សប្បុរសជនទាំងពីររូប តែងតែសកម្មក្នុងបេសកកម្មមនុស្សធម៌ជាច្រើនដូចជា ការពិនិត្យ ព្យាបាល និងវះកាត់ភ្នែកជូនប្រជាពលរដ្ឋដោយឥតគិតថ្លៃ ព្រមទាំងធ្លាប់បានចុះជួយឧបត្ថម្ភដល់ប្រជាពលរដ្ឋរងគ្រោះ ក៏ដូចជនភៀសសឹក និងវីរកងទ័ពជួរមុខ នាពេលកន្លងមកផងដែរ។

ក្នុងនាមរដ្ឋបាលស្រុកវាលវែង និងប្រជាពលរដ្ឋក្នុងមូលដ្ឋាន លោកអភិបាលស្រុកបានគោរពជូនពរជូនចំពោះ លោក និងលោកស្រី ព្រមទាំងក្រុមគ្រួសារ ឱ្យជួបប្រទះតែសេចក្តីសុខ ចម្រើន ទទួលបានជោគជ័យគ្រប់ភារកិច្ច និងមានសុខភាពល្អបរិបូរណ៍ជានិច្ច៕