Online Scams គ្មានព្រំដែន៖ កម្ពុជា ធ្វើជាម្ចាស់ផ្ទះប្រមូលផ្តុំសហគមន៍អន្តរជាតិ មកជជែកដើម្បីរួមគ្នាកាត់ផ្តាច់ច្រវាក់ឧក្រិដ្ឋកម្មឆ្លងដែន (Video inside)
19-09-2026 13:18
(ភ្នំពេញ)៖ បទល្មើសឆបោកតាមប្រព័ន្ធបច្ចេកវិទ្យា (Online Scams) កំពុងវិវត្តទៅជាបទល្មើសដែលមានលក្ខណៈស្មុគស្មាញ និងឆ្លងកាត់ព្រំដែន បង្កបញ្ហាជាច្រើនដល់ប្រជាជនទូទាំងពិភពលោក។ រាជរដ្ឋាភិបាលកម្ពុជា កំពុងជំរុញការឆ្លើយតបពីកម្រិតជាតិទៅកម្រិតអន្តរជាតិ តាមរយៈការធ្វើជាម្ចាស់ផ្ទះ «សន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ICCOS-2026)» ដែលនឹងប្រព្រឹត្តទៅនៅរាជធានីភ្នំពេញ នាថ្ងៃទី២៣-២៤ ខែកញ្ញា ឆ្នាំ២០២៦។
បទល្មើស Online Scams កំពុងវិវត្តយ៉ាងឆាប់រហ័ស និងមានលក្ខណៈឆ្លងដែន។ បញ្ហានេះតម្រូវឱ្យមានការឆ្លើយតបរួមគ្នា និងកិច្ចសហប្រតិបត្តិការរវាងប្រទេស និងស្ថាប័នពាក់ព័ន្ធ ដើម្បីទប់ស្កាត់ និងកាត់ផ្តាច់បណ្តាញឧក្រិដ្ឋកម្មប្រភេទនេះ។
ដើម្បីបញ្ជាក់ពីជំហយ៉ាងម៉ឹងម៉ាត់របស់រាជរដ្ឋាភិបាលកម្ពុជា ក្នុងប្រតិបត្តិការបង្ក្រាបទល្មើស Online Scams ក្រសួងព័ត៌មាន នារសៀលថ្ងៃទី១៨ ខែកញ្ញា ឆ្នាំ២០២៦ បានរៀបចំសន្និសីទសារព័ត៌មានស្តីពីការធ្វើជាម្ចាស់ផ្ទះរបស់កម្ពុជា ក្នុងការរៀបចំ ICCOS-2026 ក្រោមអធិបតីភាពលោក នេត្រ ភក្ត្រា រដ្ឋមន្ត្រីក្រសួងព័ត៌មាន និងមានការចូលរួមពីលោក ម៉ុក ច័ន្ទសុធា រដ្ឋលេខាធិការទីស្តីការគណៈរដ្ឋមន្ត្រី និងជាអនុប្រធានលេខាធិការដ្ឋាន គណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) និងលោក ហាយ មករា អគ្គលេខាធិការនៃអគ្គលេខាធិការដ្ឋានមជ្ឈមណ្ឌលជាតិបច្ចេកវិទ្យាព័ត៌មាន។
*អត្ថន័យដ៏ធំធេងរបស់កម្ពុជា ធ្វើជាម្ចាស់ផ្ទះនៃកិច្ចប្រជុំ ICCOS-2026, ការអនុវត្តច្បាប់ និងការប្តេជ្ញាចិត្តបង្ក្រាបបទល្មើស Online Scams
ត្រូវបានលោករដ្ឋមន្ត្រី នេត្រ ភក្ត្រា គូសបញ្ជាក់ថា មិនមែនគ្រាន់តែជាការរៀបចំវេទិកាអន្តរជាតិមួយនៅរាជធានីភ្នំពេញទេ ប៉ុន្តែ មានអត្ថន័យធំជាងនេះ គឺជាការបង្ហាញនូវឆន្ទៈនយោបាយរបស់រាជរដ្ឋាភិបាលកម្ពុជា បង្ហាញអំពីការទទួលខុសត្រូវ បង្ហាញពីភាពបបើកចំហមួយសំខាន់បំផុត និងការអំពាវនាវឱ្យមានសកម្មភាពរួមរបស់សហគមន៍អន្តរជាតិ ដើម្បីរួមគ្នាប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា (Online Scams)។ ពីព្រោះបញ្ហាឆបោកតាមប្រព័ន្ធបច្ចេកវិទ្យា ជាបញ្ហារួមក្នុងតំបន់ និងពិភពលោក។
កម្ពុជា ទទួលស្គាល់ថា ការឆបោកតាមប្រព័ន្ធបច្ចេកវិទ្យា វាជាបញ្ហាដ៏ធ្ងន់ធ្ងរ ហើយកម្ពុជា គឺជាប្រទេសដែលទទួលរងគ្រោះពីឧក្រិដ្ឋកម្មឆ្លងដែននេះ ក៏ប៉ុន្តែកម្ពុជា បានប្រឈមនឹងបញ្ហា និងបានកំពុងចាត់វិធានការប្រឆាំងនឹងការឆបោកតាមប្រព័ន្ធបច្ចេកវិទ្យា កម្ពុជា បានបើកទ្វារសហការជាមួយពិភពលោក ដើម្បីដោះស្រាយបញ្ហា Online Scams ជាមួយប្រទេសចិន សហរដ្ឋអាមេរិក កូរ៉េខាងត្បូង ជប៉ុន អូស្ត្រាលី ព្រមទាំងបណ្តាប្រទេសនៅក្នុងតំបន់អាស៊ាន និងបណ្តាប្រទេសផ្សេងៗទៀត។
មានសំណួរសួរថា ហេតុអ្វីបានជាកម្ពុជា ធ្វើជាម្ចាស់ផ្ទះនៃកិច្ចប្រជុំ ICCOS-2026 ? ពីព្រោះការឆបោកតាមប្រព័ន្ធបច្ចេកវិទ្យា មិនមែនជាបញ្ហារបស់តែមួយនោះទេ វាជាឧក្រិដ្ឋកម្មឆ្លងដែន និងជាបញ្ហាសកល។ នៅក្នុងប្រតិបត្តិការឆបោកតែមួយជនល្មើសអាចនៅប្រទេសមួយ ជនរងគ្រោះអាចនៅប្រទេសមួយទៀត។ ប្រាក់អាចឆ្លងកាត់ប្រព័ន្ធហិរញ្ញវត្ថុក្នុងប្រទេសទី៣ ខណៈគណនី បច្ចេកវិទ្យា ទ្រព្យឌីជីថល និងវេទិកាឌីជីថលអាចស្ថិតនៅក្នុងប្រទេសផ្សេងៗទៀត។
នេះជាលក្ខណៈពិតនៃឧក្រិដ្ឋកម្មនៅក្នុងសម័យឌីជីថល។ ឧក្រិដ្ឋកម្ម ឆបោកតាមប្រព័ន្ធបច្ចេកវិទ្យា គឺបានឆ្លងកាត់ព្រំដែន ដូច្នេះ ដំណោះស្រាយ ក៏ត្រូវតែឆ្លងកាត់ព្រំដែន ដែលត្រូវការមានការចូលរួមសហការជាសកល។ គ្មានប្រទេសណាមួយអាចបញ្ចប់បទល្មើស Online Scams ដោយឯកឯងបាននោះទេ ហើយគ្មានប្រទេសណាមួយគួរត្រូវបានទុកឱ្យប្រយុទ្ធជាមួយឧក្រិដ្ឋកម្មឆ្លងដែន Online Scams តែម្នាក់ឯងនោះដែរ ចំណុចនេះជាមូលហេតុដែលកម្ពុជា អញ្ជើញរដ្ឋាភិបាល អង្គការអន្តរជាតិ ស្ថាប័នអនុវត្តច្បាប់ គ្រឹះស្ថានហិរញ្ញវត្ថុ ក្រុមហ៊ុនបច្ចេកវិទ្យា អ្នកជំនាញ និងដៃគូពាក់ព័ន្ធជួបគ្នានៅក្នុងរាជធានីភ្នំពេញ នៅក្នុងសន្និសីទអន្តរជាតិនៅខែកញ្ញានេះ។
កម្ពុជា រៀបចំសន្និសីទអន្តរជាតិនេះថា ដើម្បីនិយាយថានេះជាបញ្ហារបស់អ្នកណានោះទេ ប៉ុន្តែ នេះជាបញ្ហាតំបន់ ជាបញ្ហាសកល ហើយវាជាបញ្ហារួមរបស់យើងដើម្បីត្រូវតែលើកមកជជែកពិភាក្សាគ្នា រកនូវប្រភពនៃបញ្ហា ដាក់ដំណោះស្រាយរួមគ្នា និងទទួលខុសត្រូវរួមគ្នា ដើម្បីសុវត្ថិភាពរបស់ប្រជាពលរដ្ឋយើងទាំងអស់គ្នា។
ហេតុអ្វីបានជាយើងអំពាវនាវឱ្យមានការចូលរួម ? ពីព្រោះកម្ពុជាខ្លួនឯង បានកំពុងតែចាត់វិធានការប្រឆាំងការឆបោកតាមប្រព័ន្ធបច្ចេកវិទ្យានេះ ក្រោមការដឹកនាំដោយផ្ទាល់ដោយសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងនាមជាប្រធានគណៈកម្មការចំពុះកិច្ចប្រយុទ្ធប្រឆាំងបទល្មើស Online Scams។
ត្រូវបានលោករដ្ឋមន្ត្រី នេត្រ ភក្ត្រា បង្ហាញពីលទ្ធផលជាបឋមនៃប្រតិបត្តិការប្រយុទ្ធប្រឆាំង Online Scams នៅកម្ពុជា ដោយបញ្ជាក់ថា គិតចាប់ពីខែកក្កដា ឆ្នាំ២០២៥ ដល់ថ្ងៃទី៣១ ខែសីហា ឆ្នាំ២០២៦ អាជ្ញាធរកម្ពុជា បានស៊ើបអង្កេតទីតាំងសង្ស័យចំនួន ៨៣២កន្លែង និងបានបើកប្រតិបត្តិការចំនួន ៦៦៣ទីតាំង។
នៅក្នុងចំណោមទីតាំងដែលបានបើកប្រតិបត្តិការទាំងនោះ មានទីតាំង Online Scams ទ្រង់ទ្រាយធំចំនួន ៨៦កន្លែង ដែលអាចនិយាថាទីតាំង Online Scams ទ្រង់ទ្រាយធំ ត្រូវបានគ្រប់គ្រង និងកម្ទេចទាំងស្រុង។
អាជ្ញាធរកម្ពុជា នៅតែបន្តបេសកកម្មប្រយុទ្ធប្រឆាំងបទល្មើស Online Scams ដែលបានប្រែក្លាយពីទ្រង់ទ្រាយធំ ទៅជាប្រតិបត្តិការតូចៗ និងមានលក្ខណៈបែកខ្ញែក។ ចំពោះការបង្ក្រាបក្រុមជនល្មើស Online Scams នៅតែបន្តដូចភ្លៀងរលឹម ដោយសមត្ថកិច្ចត្រូវបន្តស៊ើបអង្កេត តាមដាន និងបង្ក្រាបសកម្មភាពឆបោកជាប្រចាំ ដើម្បីទប់ស្កាត់ការបង្កើតបណ្តាញថ្មី និងការផ្លាស់ប្តូរទម្រង់ប្រតិបត្តិការរបស់បណ្តាញដែលមានស្រាប់។
ការបង្ក្រាបក្នុងប្រទេសត្រូវបានភ្ជាប់ជាមួយកិច្ចសហប្រតិបត្តិការអន្តរជាតិ ដោយសារបទល្មើស Online Scams មានលក្ខណៈឆ្លងដែន និងអាចពាក់ព័ន្ធនឹងជនរងគ្រោះ ជនសង្ស័យ បណ្តាញហិរញ្ញវត្ថុ និងហេដ្ឋារចនាសម្ព័ន្ធបច្ចេកវិទ្យាដែលស្ថិតនៅក្នុងប្រទេសផ្សេងៗគ្នា។
*លទ្ធផលបង្ក្រាបបទល្មើស Online Scams
លោក ហាយ មករា បានឱ្យដឹងថា ប្រតិបត្តិការបង្ក្រាបបទល្មើស Online Scams មន្ត្រីជំនាញកម្ពុជា បានអនុវត្តច្បាប់បានជាង ៤០០ករណី និងឃាត់ខ្លួនជនសង្ស័យក្បែរ ៣ម៉ឺននាក់ មាន ៣៩សញ្ជាតិ និងបណ្តេញជនបរទេសដែលជាមុខសញ្ញាសង្ស័យ ឱ្យចេញពីប្រទេសកម្ពុជា ប្រមាណ ២ម៉ឺននាក់។
ក្នុងនោះអាជ្ញាធរកម្ពុជា បានទទួលព័ត៌មានថា មានជនបរទេសជាសមាជិកក្រុមឧក្រិដ្ឋជនឆបោក Online Scams បានរត់ចេញពីកម្ពុជា ប្រមាណ ៣៨ម៉ឺននាក់។ ជនបរទេសដែលជាមុខសញ្ញាក្រុមឧក្រិដ្ឋជនឆបោក Online Scams ទាំងនេះក៏ជាក្តីកង្វល់របស់បណ្តាប្រទេសនានាផងដែរ ដោយសារតែក្រុមនេះមានជំនាញច្បាស់លាស់ ដើម្បីបន្តសកម្មភាពរបស់ពួកគេ នៅទីតាំងផ្សេងអាចបង្កការគំរាមកំហែងដល់បណ្តាប្រទេសផ្សេងទៀត។
រាជរដ្ឋាភិបាលកម្ពុជា បានចាត់វិធានការយ៉ាងសកម្ម ដើម្បីបោសសម្អាតក្រុមឧក្រិដ្ឋជនឆបោកតាមប្រព័ន្ធបច្ចេកវិទ្យា ដោយមិនត្រឹមបញ្ចប់លើទីតាំងធំៗនោះទេ។ អាជ្ញាធរកម្ពុជា បានចាត់វិធានការច្បាប់យ៉ាងតឹងរ៉ឹង ដោយបញ្ចូនខ្លួនក្រុមជនសង្ស័យក្នុងបទល្មើស Online Scams ទៅតុលាការ ខណៈក្រុមឧក្រិដ្ឋជនបរទេស ក៏ត្រូវបានបញ្ជូនទៅកាន់ប្រទេសកំណើតវិញ ដើម្បីឱ្យឧក្រិដ្ឋជនទាំងនោះទទួលទោសតាមផ្លូវច្បាប់របស់ប្រទេសកំណើតវិញ។
អាជ្ញាធរកម្ពុជា មិនបិទបញ្ចប់ការស្រាវជ្រាវរកមេក្លោងនៅក្រោយបទល្មើសឆបោកតាម Online Scams នោះទេ ខណៈបច្ចុប្បន្នអាជ្ញាធរ និងសមត្ថកិច្ចជំនាញ បានបន្តស្រាវជ្រាវ តាមដាន ប្រមូលព័ត៌មាន និងសហការជាមួយភាគីបរទេស ដើម្បីឈានទៅដល់ការកំណត់មុខសញ្ញាបណ្តាញ និងមេក្លោងឆបោក Online Scams តាមរយៈភស្តុតាងដែលសមត្ថកិច្ចប្រមូលបាន។ ចំណែកទូរស័ព្ទដៃដែលបម្រើឱ្យបទល្មើសឆបោក Online Scams ត្រូវប្រមូលបានជាង ៣០ម៉ឺនគ្រឿង និងលំហូរហិរញ្ញវត្ថុ ដោយសហការជាមួយប្រទេសពាក់ព័ន្ធជាដើម។
ប្រតិបត្តិការបង្ក្រាបបទល្មើស Online Scams នេះ បានអនុវត្តវិធានការច្បាប់ចំពោះមន្ត្រីរាជការដែលពាក់ព័ន្ធមានចំនួន ៤សំណុំរឿង និងមានជនសង្ស័យប្រមាណ ១៥នាក់ ត្រូវចាត់វិធានការតាមយន្តការអង្គភាពប្រឆាំងអំពើពុលរលួយ (ACU)។
*កិច្ចសហការពីដៃគូអន្តរជាតិ និងខ្លឹមសារនៃសន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ICCOS-2026)
លោក ម៉ុក ច័ន្ធសុធា បានឱ្យដឹងថា បញ្ហាបទល្មើស Online Scams ជាបញ្ហាស្មុគ្រស្មាញប្រទាក់ក្រឡា បណ្តាញអង្គការចាត់តាំង ពីប្រទេសមួយទៅប្រទេសមួយទៀត ជាបទល្មើសឧក្រិដ្ឋកម្មឆ្លងដែន ហេតុនេះហើយទើបប្រមុខរាជដ្ឋាភិបាលសម្រេចរៀបចំជាសន្និសីទ្ធអន្តរជាតិនេះឡើង ដើម្បីប្រមូលនូវមន្រ្តីជាន់ខ្ពស់នៃបណ្តាប្រទេសក៏ដូចជាអ្នករៀបចំគោលនយោបាយ មន្រ្តីអនុវត្តន៍ច្បាប់ មកអង្គុយជាមួយគ្នា ធ្វើការពិភាក្សា និងការលើកជាទស្សនៈទានក្នុងការប្រយុទ្ធប្រឆាំងសកម្មភាពឆបោកតាមប្រព័ន្ធបច្ចេកវិទ្យា។
ដើម្បីផ្តល់ភាពរឹងមាំនៃដំណើរការសន្និសីទអន្តរជាតិ, មានអង្គការអន្តរជាតិធំៗចំនួន ៣ គឺការិយាល័យអង្គការសហប្រជាតិទទួលបន្ទុកគ្រឿងញៀន, ឧក្រិដ្ឋកម្មឆ្លងដែន ប្រចាំតំបន់អាស៉ីអាគ្នេយ៍ និងប៉ាស៉ីហ្វិក, អង្គការនគរបាលព្រហ្មទណ្ឌអន្តរជាតិ «អាំងទែប៉ូល (Interpol)» និងទី៣៖ មជ្ឈមណ្ឌលសហប្រតិបត្តិការសន្តិសុខ និងសមាហរណកម្មរបស់ច្បាប់ មេគង្គ-ឡានឆាង។
តាមរយៈ ICCOS-2026 កម្ពុជានឹងប្រមូលផ្តុំតំណាងពី បណ្តាប្រទេសជាង២០ និងអង្គការអន្តរជាតិចំនួន៣ ដើម្បីពិភាក្សាអំពីការវិវត្តនៃបទល្មើស Online Scams ផ្លាស់ប្តូរបទពិសោធន៍ និងពិចារណាលើយន្តការសហប្រតិបត្តិការដែលអាចជួយពង្រឹងការបង្ក្រាបឧក្រិដ្ឋកម្មឆ្លងដែនប្រភេទនេះ ក្នុងនោះបណ្តាប្រទេសពាក់ព័ន្ធ និងអ្នកជំនាញអន្តរជាតិ នឹងពិភាក្សាគ្នា ដើម្បីស្វែងយល់អំពីការវិវត្តដ៏ស្មុគស្មាញដ៏ឆាប់រហ័ស នៃបទល្មើសឆបោកតាមប្រព័ន្ធបច្ចេកវិទ្យា, បង្កើនកិច្ចសហប្រតិបត្តិការពីព្រោះជាបទល្មើសឆ្លងដែន មិនអាចប្រទេសណាមួយធ្វើតែឯងបានទេ និងការចូលរួមផ្លាស់ប្តូរបទពិសោធន៍ពីចំណុចខ្លាំង និងចំណុចខ្សោយនៃប្រតិបត្តិការនីមួយៗ។
តាមរយៈការដាក់ចេញនូវវិធានការផ្នែកច្បាប់ ការអនុវត្តច្បាប់ និងកិច្ចសហប្រតិបត្តិការអន្តរជាតិ រាជរដ្ឋាភិបាលកម្ពុជាបានបង្ហាញជំហរថា ការបង្ក្រាប និងទប់ស្កាត់ Online Scams គឺជាកិច្ចការដែលត្រូវអនុវត្តជាបន្តបន្ទាប់ ដើម្បីការពារសុវត្ថិភាពប្រជាពលរដ្ឋ ពង្រឹងសន្តិសុខឌីជីថល និងរក្សាបរិយាកាសសុវត្ថិភាពសម្រាប់ការវិនិយោគ និងការអភិវឌ្ឍសេដ្ឋកិច្ចស្របច្បាប់នៅកម្ពុជា៕
