(បន្ទាយមានជ័យ)៖ នាព្រឹកថ្ងៃទី១៩ ខែកញ្ញា ឆ្នាំ២០២៦ លោក ស្រេង សុផល អភិបាលក្រុងសិរីសោភ័ណ បានអញ្ជើញជាអធិបតីក្នុងពិធីកាត់ខ្សែបូរសម្ពោធដាក់ឲ្យប្រើប្រាស់ជាផ្លូវការនូវទូកងថ្មីចំនួន ២គ្រឿង និងរោងទូកងថ្មីចំនួន ១ខ្នង នៅវត្តរាជនិវេសនារាម ព្រះពន្លា ស្ថិតក្នុងភូមិព្រះពន្លា សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។

ពិធីនេះក៏មានការចូលរួមពីលោក ជាម សុខ ប្រធានក្រុមប្រឹក្សាក្រុងសិរីសោភ័ណ លោកស្រី ឆាត សុជា ចៅសង្កាត់ព្រះពន្លា ព្រះគ្រូ ធម្មជោតោ អួង ច័ន្ទឧត្តម ជាព្រះវិន័យធរ អនុគណក្រុងសិរីសោភ័ណ ព្រមទាំងមន្ត្រីរាជការ គណៈកម្មការវត្ត គណៈកម្មការទូកង និងពុទ្ធបរិស័ទជិតឆ្ងាយប្រមាណជិត ១.០០០ នាក់។

ព្រះគ្រូ ធម្មជោតោ អួង ច័ន្ទឧត្តម បានមានសង្ឃដីកាថា រោងទូកងថ្មីនេះ មានបណ្តោយ ៣៩ ម៉ែត្រ ទទឹង ៧ ម៉ែត្រ និងកម្ពស់ ៦ ម៉ែត្រ ត្រូវបានកសាងឡើងពីស៊ីម៉ង់ត៍ គ្រោងដំបូលដែក និងប្រក់ស័ង្កសី ដោយចំណាយថវិកាសរុប ២១.៣០០ ដុល្លារ។ ចំណែកទូកងថ្មីទាំង ២ គ្រឿង រួមមាន មួយឈ្មោះ «ព្រះពន្លាមានជ័យស្រីក្រឡេកញញឹម» និងមួយទៀតឈ្មោះ «រឹទ្ធីសែនជ័យបារមីវត្តព្រះពន្លា» សុទ្ធតែចំណាយថវិកា ១០.០០០ ដុល្លារក្នុងមួយគ្រឿង។

ទូកងទាំងពីរនេះ នឹងត្រូវប្រើប្រាស់សម្រាប់ចូលរួមប្រណាំងក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ ដែលជាប្រពៃណីជាតិខ្មែរនាពេលខាងមុខ។

ក្នុងឱកាសនោះ លោក ស្រេង សុផល បានសង្កត់ធ្ងន់ថា ការប្រណាំងទូកងមិនត្រឹមតែជាការកម្សាន្តសប្បាយរំសាយពីភាពនឿយហត់របស់ប្រជាពលរដ្ឋប៉ុណ្ណោះទេ ប៉ុន្តែក៏ជាការចូលរួមអបអរសាទរព្រះរាជពិធីបុណ្យអុំទូក និងជាការថែរក្សាទំនៀមទម្លាប់វប្បធម៌ប្រពៃណីជាតិដែលមានតាំងពីយូរលង់មកហើយ។

លោកបានបន្តថា ពិធីនេះក៏ឧទ្ទិសរំលឹកដល់វីរភាពនៃកុលបុត្រកងទ័ពជើងទឹកខ្មែរក្នុងសម័យអង្គរ ដែលបានតស៊ូការពារទឹកដីមហានគរពីការឈ្លានពានរបស់សត្រូវ ព្រមទាំងឧទ្ទិសដល់គុណព្រះធរណី និងព្រះគង្គា ដែលបាននាំមកនូវដីល្បាប់ដ៏មានជីវជាតិ សម្រាប់ស្រោចស្រពលើផ្ទៃដីឲ្យផលដំណាំប្រជាកសិករទទួលផលល្អប្រសើរ។ លោកក៏បានក្រើនរម្លឹកដល់ចំណុះទូកទាំងអស់ឲ្យគោរពវិន័យប្រកួត ចេះសាមគ្គីគ្នា និងខិតខំប្រឹងប្រែងដណ្តើមយកជ័យជម្នះសម្រាប់វត្តរបស់ខ្លួន៕