(ភ្នំពេញ)៖ លោកស្រីបណ្ឌិត ព្រុំ ទេវី អ្នកជំនាញវិទ្យាសាស្ត្រសេដ្ឋកិច្ច​ នៅថ្ងៃទី២១ ខែកញ្ញា ឆ្នាំ២០២៦ បានលើកឡើងថា បើទំនិញថៃនៅតែមាននៅកម្ពុជានោះ ការជួយសហគ្រាស​ធុនមីក្រូ តូច និងមធ្យម​ នឹងនៅតែមិនងាយរីកចម្រើនឡើយ។

លោកស្រីបានលើកឡើងទៀតថា ទំនិញថៃខ្លះ កម្ពុជាអាចផលិតបាន ក្នុងកម្រិតសហគ្រាស​ធុនមីក្រូ តូច និងមធ្យម​ ដោយមិនត្រូវការគ្រឿងចក្រធុនធំអ្វីឡើយ។ បើគ្មានទំនិញថៃបែបនេះ វានឹងជួយបើកច្រកឲ្យសហគ្រាស​ធុនមីក្រូ តូច និងមធ្យម​ មានផ្លូវដើរមិនខានឡើយ។

រាជរដ្ឋាភិបាល​បាន​ចេញអនុក្រឹត្យមួយនៅថ្ងៃទី១៥ ខែកញ្ញា ឆ្នាំ២០២៦ ស្ដីពីការ​បង្កើត​គណៈកម្មាធិការ​ដឹកនាំ​អនុវត្ត​យុទ្ធសាស្ត្រ​ជាតិអភិវឌ្ឍន៍​សហគ្រាស​ធុន​មីក្រូ តូច និងមធ្យម ដែលស្ថិតនៅក្រោម​ឆត្រ​នៃគណៈកម្មាធិការ​គោល​នយោបាយ​សេដ្ឋកិច្ច​ និងហិរញ្ញវត្ថុ។

យោងតាម​អនុក្រឹត្យ​របស់រាជរដ្ឋាភិបាលកម្ពុជា គណៈកម្មាធិការ​ដឹកនាំការអនុវត្ត​យុទ្ធសាស្ត្រ​ជាតិអភិវឌ្ឍន៍សហគ្រាស​មីក្រូ តូច និងមធ្យម​ មានភារកិច្ច​មួយចំនួនដែលត្រូវ​អនុវត្តន៍ រួមមាន​ អនុម័ត​សូចនា​ករសមិទ្ធកម្មគន្លឹះ និងដឹកនាំការងារត្រួតពិនិត្យ​តាមដាន ​និងវាយតម្លៃការអនុវត្តយុទ្ធសាស្ត្រជាតិស្ដីពីការ​អភិវឌ្ឍ​សហគ្រាស​ធុន​មីក្រូ តូច និងមធ្យម​ឆ្នាំ២០២៦-២០៣០។ បន្ថែមពីនេះ ត្រូវដឹកនាំ សម្របសម្រួល​ និងដោះស្រាយ​បញ្ហាជារចនា​សម្ព័ន្ធ និង​បញ្ហា​ផ្សេងៗ​ដែលមាលក្ខណៈអន្តរស្ថាប័ន​ ដើម្បីអភិវឌ្ឍសហគ្រាសធុន​មីក្រូ តូច និងមធ្យម។

លោកស្រីបណ្ឌិត បានកោតសរសើររាជរដ្ឋាភិបាលចំពោះយន្តការនេះ ហើយលោកស្រីក៏បានចាត់ទុកថា ការតាំងបង្ហាញផលិតផលក្នុងស្រុក សុទ្ធតែជាការរួមចំណែកនាំឲ្យប្រជាពលរដ្ឋបានស្គាល់ និងជួយទិញ។

លោកស្រីបណ្ឌិត បានបន្ថែមទៀតថា យោងតាមស្មារតីពហិការ ខ្មែរយើងម្នាក់ៗត្រូវតែឈប់ទិញទំនិញថៃ ប៉ុន្តែបើយើងអត់ស្មារតីនេះ វាក៏ជាបញ្ហាមួយដែរ។ ទន្ទឹមនេះ សហគ្រាស​ធុនមីក្រូ តូច និងមធ្យម​ នៅក្នុងស្រុក ត្រូវតែផលិតផលិតផលដែលមានគុណភាព និងត្រឹមត្រូវ ដែលវាជាកត្តាមួយនាំឲ្យអ្នកទិញ កាន់តែឈប់ប្រើប្រាស់ទំនិញថៃ។

សូមជម្រាបថា សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានថ្លែងថា «ពេលណាព្រំដែនគោករវាងកម្ពុជា-ថៃនៅតែបន្តបិទ គ្រប់មុខទំនិញទាំងអស់ ដែលនាំចូល ឆ្លងកាត់ព្រំដែនគោក គឺជាទំនិញខុសច្បាប់ ជាទំនិញរត់ពន្ធ ជាទំនិញបំផ្លាញជាតិ និងប្រមាថជាតិ»៕