(តាកែវ)៖ ដើម្បីឆ្លើយតបទៅនឹងតម្រូវការចាំបាច់របស់ប្រជាពលរដ្ឋក្នុងវិស័យសុខាភិបាល មន្ទីរពេទ្យបង្អែកខេត្តតាកែវ បានប្រកាសពង្រីកសេវាថ្មីៗបន្ថែមទៀតនៅក្នុងឆ្នាំ២០២៦នេះ រួមមានសេវាសម្រាលកូនដោយគ្មានការឈឺចាប់ នៅក្នុងផ្នែកសម្ភព និងសេវាលាងឈាមជូនដល់អ្នកជំងឺ។ ការពង្រីកសេវានេះធ្វើឡើងក្រោមចក្ខុវិស័យច្បាស់លាស់ និងការគាំទ្រពីក្រសួងសុខាភិបាល ព្រមទាំងថ្នាក់ដឹកនាំខេត្ត។

លោកវេជ្ជបណ្ឌិត តែ វ៉ាន់ថា ប្រធានមន្ទីរពេទ្យបង្អែកខេត្តតាកែវ បានថ្លែងឲ្យដឹងថា មន្ទីរពេទ្យកំពុងធ្វើទំនើបកម្មលើឧបករណ៍ថ្មីៗនៅមន្ទីរពិសោធន៍ និងពង្រីកសេវាព្យាបាលថ្មីៗ។ ក្នុងនោះ ផ្នែកសម្ភពនឹងបើកបម្រើសេវា សម្រាលកូនគ្មានការឈឺចាប់ ដោយមានការគាំទ្រពីមន្ទីរពេទ្យសម្ព័ន្ធមេត្រី។ ជាមួយគ្នានេះ សេវាលាងឈាមក៏នឹងត្រូវបានដាក់ឲ្យដំណើរការផងដែរ សម្រាប់អ្នកជំងឺដែលកន្លងមកធ្លាប់ធ្វើដំណើរទៅលាងឈាមនៅរាជធានីភ្នំពេញ ឬក្រៅប្រទេស។

ក្រៅពីការបំពាក់ឧបករណ៍ទំនើបៗ និងការពង្រីកសេវាបន្ថែម មន្ទីរពេទ្យបង្អែកខេត្តតាកែវក៏បានក្លាយជាទីបង្អែកដ៏កក់ក្តៅ និងមានកេរ្តិ៍ឈ្មោះល្បីល្បាញយ៉ាងខ្លាំងលើជំនាញឯកទេសព្យាបាលជំងឺឆ្អឹង និងបាក់បែក។ ទំនុកចិត្តដ៏រឹងមាំលើគុណភាព និងសុវត្ថិភាពនៃការព្យាបាលតាមបែបវេជ្ជសាស្ត្រទំនើបនេះ បានធ្វើឲ្យប្រជាពលរដ្ឋដែលមានបញ្ហាបាក់បែកឆ្អឹង ឬបញ្ហាផ្សេងៗទៀតដែលពាក់ព័ន្ធនឹងឆ្អឹង ងាកមកទទួលការព្យាបាល នៅមន្ទីរពេទ្យបង្អែកតាកែវយ៉ាងច្រើនកុះករ។

ការពង្រីកសេវានិងធ្វើទំនើបកម្មឧបករណ៍ថ្មីៗនេះ គឺក្នុងគោលបំណងដើម្បីបង្ខិតសេវាឲ្យកាន់តែជិតប្រជាពលរដ្ឋ កាត់បន្ថយការធ្វើដំណើរទៅរកសេវាសុខាភិបាលនៅតំបន់ឆ្ងាយ និងជួយកាត់បន្ថយការចំណាយរបស់បងប្អូន ប្រជាពលរដ្ឋផងដែរ៕