សហភាពអឺរ៉ុប ផ្តល់ជំនួយ ១.៨លានដុល្លារ គាំទ្រសកម្មភាពបោសសម្អាតមីននៅកម្ពុជា
22-09-2026 21:50
(ភ្នំពេញ)៖ សហភាពអឺរ៉ុប (EU) បានអនុម័តផ្តល់ជំនួយហិរញ្ញប្បទានឥតសំណងចំនួន ១ ៥៩៨ ៩៩៩អឺរ៉ូ ស្មើនឹងប្រមាណ ១.៨លានដុល្លារអាមេរិក ដើម្បីគាំទ្រសកម្មភាពបោសសម្អាតមីនរបស់អង្គភាពសកម្មភាពកម្ចាត់មីនកម្ពុជា (CMAC) សហការជាមួយអង្គការ APOPO។ ជំនួយនេះនឹងរួមចំណែកយ៉ាងសំខាន់ក្នុងការដោះស្រាយបញ្ហាគ្រាប់មីន និងសំណល់យុទ្ធភណ្ឌសង្គ្រាមដែលនៅសេសសល់ក្នុងប្រទេសកម្ពុជា។
បើតាមលោក ហេង រតនា ប្រតិភូរាជរដ្ឋាភិបាលទទួលបន្ទុក ជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) បានឱ្យដឹងថា នៅរសៀលថ្ងៃទី២២ ខែកញ្ញា ឆ្នាំ២០២៦ លោកបានជួបពិភាក្សាការងារជាមួយគណៈប្រតិភូសហភាពអឺរ៉ុប (EU) ប្រចាំតំបន់ដឹកនាំដោយលោក Andreas Roettger ប្រធានក្រុមការងារFPI និងក្រុមការងារ នៅសារមន្ទីរតេជោសន្តិភាព ខេត្តសៀមរាប។
លោក ហេង រតនា ក៏បានជម្រាបជូនគណៈប្រតិភូអំពីផលប៉ះពាល់ដោយសារបន្សល់ទុកនូវសំណល់យុទ្ធភណ្ឌសង្គ្រាម ជាពិសេសបញ្ហានេះបង្កឱ្យមានផលប៉ះពាល់ដល់សុខសុវត្ថិភាពប្រជាពលរដ្ឋ សេដ្ឋកិច្ចសង្គម និងបេតិកភណ្ឌវប្បធម៌ជាដេីម។ គណប្រតិភូ EU ក៏បានទស្សនាសារមន្ទីរតេជោសន្តិភាពដុំ ដែលខ្លឹមសារ រូបភាព និងតឹងតាងមាននៅសារមន្ទីរនេះ បានបង្ហាញនូវការរំលឹកចងចាំទុក្ខសោកវិនាសកម្មនៃសង្គ្រាម និងបានូវតម្លៃមហាសាលនៃសន្តិភាព។
ជាមួយគ្នានេះ លោក Andreas Roettger បានបញ្ជាក់ពីការអនុម័តផ្តល់ជំនួយគាំទ្រសកម្មភាពបោសសម្អាតមីនអង្គភាព CMAC សហការដៃគូជាមួយអង្គការ APOPO មានថវិកាចំនួន ១.៥៩៨.៩៩៩អឺរ៉ូ ស្មេីនឹងប្រមាណ១.៨លានដុល្លារអាមេរិក សម្រាប់រយៈពេល១៨ខែ ចាប់ពីែខតុលា ឆ្នាំ២០១៦នេះតទៅ។
គម្រោងនេះ ត្រូវប្រតិបតិ្តការនៅខេត្តព្រះវិហារ និងខេត្តឧត្តរមានជ័យ។ ជំនួយនេះអាចផ្តល់លទ្ធភាពបោសសម្អាតផ្ទៃរងផលប៉ះពាល់ប្រមាណជាង៦.០០០ហិកតា ការអប់រំយល់ដឹងពីគ្រោះថ្នាក់ដោយសារមីន និងការងារស្រាវជ្រាវព័ត៌មានកាត់ផ្ទៃដីរងផលប៉ះពាល់ដោយសារសំណល់យុទ្ធភណ្ឌផងដែរ។
លោក ហេង រតនា ក៏សូមថ្លែងអំណរគុណចំពោះការកោតសរសើរ និងការគាំទ្ររបស់សហភាពអឺរ៉ុប និងបានបញ្ជាក់ពីការប្តេជ្ញាចិត្តរបស់អង្គភាព CMAC ក្នុងការបន្តពង្រឹងភាពជាដៃគូ និងកិច្ចសហប្រតិបត្តិការជាមួយ APOPO និងសហគមន៍អឺរ៉ប ដេីម្បីកម្ចាត់ភាពគំរាមកំហែងដោយសារសំណល់យុទ្ធភណ្ឌសង្គ្រាម កសាងក្តីសង្ឃឹម និងអនាគតរុងរឿងសម្រាប់ប្រជាជនខ្មែរ៕
