មន្ត្រីជាន់ខ្ពស់អង្គការសហប្រជាជាតិ៖ កម្ពុជា ប្តេជ្ញាចិត្តមុតមាំណាស់ក្នុងការប្រយុទ្ធប្រឆាំងបទល្មើសតាមប្រព័ន្ធបច្ចេកវិទ្យា (Video inside)
23-09-2026 16:35
(ភ្នំពេញ)៖ លោកស្រី Delphine Schantz អ្នកតំណាងប្រចាំតំបន់នៃការិយាល័យអង្គការសហប្រជាជាតិ ទទួលបន្ទុកគ្រឿងញៀន និងឧក្រិដ្ឋកម្មប្រចាំតំបន់អាស៊ីអាគ្នេយ៍ និងប៉ាស៊ីហ្វិក បានបង្ហាញការមើលឃើញរបស់ខ្លួនថា កម្ពុជា បានប្តេជ្ញាចិត្តខ្ពស់ និងមុតមាំក្នុងការប្រយុទ្ធប្រឆាំងបទល្មើសតាមប្រព័ន្ធបច្ចេកវិទ្យា។
ក្នុងបទសម្ភាសន៍ជាមួយ Fresh News ពេលអញ្ជើញចូលរួមពិធីបើកសន្និសីទអន្តរជាតិស្តីពីការប្រយុទ្ធប្រឆាំងបទល្មើសតាមប្រព័ន្ធបច្ចេកវិទ្យានាព្រឹកថ្ងៃទី២៣ ខែកញ្ញា ឆ្នាំ២០២៦នេះ លោកស្រី Delphine Schantz បានលើកបង្ហាញរបាយការណ៍របស់ការិយាល័យអង្គការសហប្រជាជាតិស្តីពីគ្រឿងញៀន និងឧក្រិដ្ឋកម្ម (UNODC) បានសង្កេតឃើញ ការខាតបង់ផ្នែកហិរញ្ញវត្ថុនៅតែបន្តកើនឡើង។ របាយការណ៍នេះបានបង្ហាញថា ការខាតបង់ប្រចាំឆ្នាំសម្រាប់តំបន់អាស៊ីអាគ្នេយ៍ អាស៊ីបូព៌ា អូស្ត្រាលី និងនូវែលសេឡង់ មានចំនួន ១១៤ពាន់លានដុល្លារ។ នេះជាការកើនឡើងគួរឱ្យកត់សម្គាល់បើធៀបនឹងតួលេខឆ្នាំមុន ហើយចំនួនជនរងគ្រោះក៏កាន់តែកើនឡើងទាំងក្នុងតំបន់ និងក្រៅតំបន់។
លោកស្រី បានលើកឡើងទៀតថា បញ្ហា និងការគំរាមកំហែង ដោយសារការឆបោកតាមរយៈប្រព័ន្ធបច្ចេកវិទ្យា មិនត្រឹមតែនៅក្នុងប្រទេសកម្ពុជាប៉ុណ្ណោះទេ ប៉ុន្តែនៅក្នុងបណ្តាប្រទេសទាំងអស់ក្នុងតំបន់ គឺប្រភេទហេដ្ឋារចនាសម្ព័ន្ធអនឡាញខ្នាតតូច ដែលមានមនុស្សមួយចំនួនទទួលបានជំនាញពីមជ្ឈមណ្ឌលធំៗ។ ឥឡូវនេះ ពួកគេកំពុងប្រើប្រាស់បច្ចេកវិទ្យា រូបិយប័ណ្ណគ្រីបតូ និងទូរគមនាគមន៍ ដើម្បីចូលរួមក្នុងប្រតិបត្តិការខ្នាតតូច ដែលពិបាកក្នុងការបង្ក្រាបណាស់ ព្រោះនគរបាលត្រូវការព័ត៌មានស៊ើបការណ៍សម្ងាត់ត្រឹមត្រូវ ដើម្បីកំណត់អត្តសញ្ញាណទីតាំងនៃរចនាសម្ព័ន្ធតូចៗទាំងនោះ។
និយាយដល់ការបង្ក្រាបឧក្រិដ្ឋជនឆបោកតាមប្រព័ន្ធបច្ចេកវិទ្យានេះ មន្ត្រីជាន់ខ្ពស់របស់អង្គការសហប្រជាជាតិរូបនេះ បានកត់សម្គាល់ពីការប្រឹងប្រែង និងប្តេជ្ញាចិត្តខ្ពស់របស់កម្ពុជាក្នុងការប្រយុទ្ធប្រឆាំង និងបោសសំអាតបទល្មើសឆបោកតាមប្រព័ន្ធបច្ចេកវិទ្យា។
លោកស្រី បានបញ្ជាក់ដូច្នេះ «ខ្ញុំគិតថា ការប្តេជ្ញាចិត្តរបស់កម្ពុជា គឺមានភាពមុតមាំខ្លាំងពីព្រោះកម្ពុជា បានយល់ច្បាស់ថា បញ្ហានេះមិនត្រឹមតែប៉ះពាល់ដល់កម្ពុជាប៉ុណ្ណោះទេ ប៉ុន្តែថែមទាំងប៉ះពាល់ដល់ប្រទេសទាំងអស់នៅក្នុងតំបន់ និងប្រទេសនានាលើសពីតំបន់ផងដែរ។ ខ្ញុំគិតថា យើងពិតជាត្រូវកោតសរសើរកម្ពុជា ចំពោះការរៀបចំសន្និសីទនេះ និងការប្រមូលផ្តុំតំណាងមកពីប្រទេសជាច្រើន»។
«ជាក់ស្តែងមានអ្នកចូលរួមជិត ៥០០នាក់ មកពីប្រមាណ ៣០ប្រទេស និងអង្គការអន្តរជាតិនានា។ អ្នកជំនាញជាច្រើនបានធ្វើដំណើរមកពីរដ្ឋធានីនៃប្រទេសរបស់ពួកគេ ហើយរដ្ឋមន្ត្រីជាច្រើន ក៏បានធ្វើដំណើរមកពីប្រទេសរៀងៗខ្លួនផងដែរ។ ដូច្នេះនេះ គឺជាសញ្ញាដ៏ច្បាស់លាស់មួយនៃការប្តេជ្ញាចិត្ត ពីព្រោះប្រទេសទាំងនេះ នឹងមិនធ្វើដំណើរមកដល់កម្ពុជានោះទេ ប្រសិនបើមិនមានសញ្ញាច្បាស់លាស់ថា កម្ពុជាមានការប្តេជ្ញាចិត្តយ៉ាងមុតមាំក្នុងការដោះស្រាយបញ្ហាឆបោកតាមប្រព័ន្ធអនឡាញ និងសហការជាមួយដៃគូទាំងនេះ ដើម្បីពង្រឹងកិច្ចសហប្រតិបត្តិការរបស់ពួកគេ»។ នេះជាការបញ្ជាក់បន្ថែមរបស់លោកស្រី Delphine Schantz។
កម្ពុជា ជាប្រទេសមួយក្នុងចំណោមប្រទេសនៅតំបន់អាស៊ីអាគ្នេយ៍ ដែលក្រុមឱក្រិដ្ឋជនព្យាយាមយកធ្វើជាទីតាំងបម្រើសកម្មភាពរបស់ពួកគេ។ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងក្នុងពិធីបើកសន្និសីទអន្តរជាតិនាព្រឹកមិញថា ឧស្សាហកម្មឆបោកតាមប្រព័ន្ធបច្ចេកវិទ្យាមិនបានចាប់ផ្តើមនៅកម្ពុជាទេ។ ហើយវាក៏មិនត្រូវបានកំណត់ត្រឹមតែកម្ពុជាដែរ។
សម្តេចនាយករដ្ឋមន្ត្រី បានបន្ថែមថា ការប៉ះពាល់ដំបូងរបស់កម្ពុជាត្រូវបានផ្សារភ្ជាប់ទៅនឹងការរីកលូតលាស់នៃការលេងល្បែងអនឡាញ និងអាជីវកម្មដែលទាក់ទងនឹងកាស៊ីណូ។ លើសពីនេះ បណ្តាញឧក្រិដ្ឋកម្មបានបន្តវិវឌ្ឍ និងសម្របខ្លួនយ៉ាងឆាប់រហ័សឆ្លងកាត់ព្រំដែន។ បណ្តាញឧក្រិដ្ឋជនឆ្លងដែនបានកេងប្រវ័ញ្ចអចលនទ្រព្យ ចន្លោះប្រហោងនៃបទប្បញ្ញត្តិ និងបណ្តាញទូរគមនាគមន៍ឆ្លងដែនដ៏ស្មុគស្មាញ ដើម្បីបង្កើតប្រព័ន្ធអេកូឡូស៊ីនៃការឆបោកឆ្លងដែន។
សម្តេចមហាបវរធិបតី ហ៊ុន ម៉ាណែត បានបង្ហាញនូវការប្តេជ្ញាចិត្តរបស់កម្ពុជាក្នុងការបោសសំអាតបទល្មើសឆបោកតាមប្រព័ន្ធបច្ចេកវិទ្យានេះ។ សម្តេចនាយករដ្ឋមន្ត្រី បានលើកបង្ហាញនូវចំណាត់ការមួយចំនួនរបស់កម្ពុជា ដូចជាការបង្កើតច្បាប់ស្តីពីការប្រយុទ្ធប្រឆាំងការឆបោកតាមប្រព័ន្ធអនឡាញក្នុងខែមេសា ឆ្នាំ២០២៦ ដើម្បីបិទចន្លោះប្រហោងផ្នែកច្បាប់។ ការអនុវត្តយុទ្ធនាការដែលមានលក្ខណៈឯកភាព ដោយមានការចូលរួមគ្រប់ស្ថាប័នរបស់រដ្ឋាភិបាល និងគ្រប់ផ្នែកនៃសង្គមទាំងមូល ក្នុងគោលបំណងកម្ចាត់បណ្តាញទាំងនេះឱ្យអស់។ កម្ពុជាចាត់ទុកការអនុវត្តច្បាប់ជាកាតព្វកិច្ចសន្តិសុខជាតិអចិន្ត្រៃយ៍ មិនមែនជាយុទ្ធនាការដើម្បីផ្សព្វផ្សាយរូបភាពនោះទេ។
សម្តេចមហាបវរធិបតីបន្ថែមពីលើនោះ កម្ពុជា បានផ្តោតការខិតខំប្រឹងប្រែងលើការលុបបំបាត់បណ្តាញឧក្រិដ្ឋកម្មជាអចិន្ត្រៃយ៍ ការទប់ស្កាត់ការកើតឡើងវិញរបស់ពួកគេ និងបានបង្ក្រាបទាំងស្រុងនូវរាល់ទីតាំងឆបោកទ្រង់ទ្រាយធំទាំងអស់នៅកម្ពុជា។
សម្តេចមហាបវរធិបតី បន្តថា ទោះបីជាក្រុមឧក្រិដ្ឋជនព្យាយាមបំបែកខ្លួនទៅជាបណ្តាញតូចៗដែល នឹងប្រតិបត្តិការដោយគ្មានទីស្នាក់ការកណ្តាល ហើយនិងមានផែនការកំណត់គោលដៅលើពលរដ្ឋរបស់ខ្មែរក៏ដោយ ប៉ុន្តែកងកម្លាំងអនុវត្តច្បាប់នៅតែរក្សាការប្រុងប្រយ័ត្នខ្ពស់ និងត្រៀមខ្លួនជាស្រេចដើម្បីបង្ក្រាបរាល់ការគំរាមកំហែងដែលកំពុងកើតមាន។
សម្តេចមហាបវរធិបតី បានធានាអះអាងនៅអ្នកចូលរួមក្នុងសន្និសីទកម្រិតអន្តរជាតិនេះថា «ខ្ញុំសូមបញ្ជាក់ជំហររបស់យើងឱ្យបានច្បាស់ថា កម្ពុជានឹងមិនក្លាយជាទីសុវត្ថិភាពសម្រាប់ការឆបោកតាមប្រព័ន្ធបច្ចេកវិទ្យាឡើយ! ឧក្រិដ្ឋកម្មឆ្លងដែននេះ គឺជាបាតុភូតថ្មីៗក្រោយវិបត្តិជំងឺកូវីដ-១៩ ដែលមានលក្ខណៈប្លែកទាំងស្រុងពីវប្បធម៌ គុណតម្លៃ និងអត្តសញ្ញាណជាតិរបស់យើង។ កម្ពុជានឹងមិនអនុញ្ញាតឱ្យក្រុមឧក្រិដ្ឋជនបំផ្លាញវឌ្ឍនភាពរបស់ប្រទេសយើង និងជីវភាពរស់នៅរបស់ប្រជាជនកម្ពុជាជាង១៧លាននាក់នោះឡើយ»។
លោក ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋាននៃគណៈកម្មការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប) បានឱ្យដឹងថា គិតចាប់ពីខែកក្កដា ឆ្នាំ២០២៥ ដល់ថ្ងៃទី៣១ ខែសីហា ឆ្នាំ២០២៦ អាជ្ញាធរបានឆ្មក់ចូលទីតាំងសង្ស័យ ៨៣២ទីតាំង ប្រតិបត្តិការបង្ក្រាបការឆបោកបានចំនួន ៦៦៣ទីតាំង លុបបំបាត់មណ្ឌលឆបោកបានចំនួន៨៦កន្លែង និងឃាត់ខ្លួនជនសង្ស័យជាង ២៩ ០០០នាក់ មានចំនួន៣៩សញ្ជាតិ។ បុគ្គលជាង ២២ ០០០នាក់ មកពី ៣៨ប្រទេស ត្រូវបានចាប់បញ្ជូនទៅប្រទេសដើម ខណៈមនុស្សជាច្រើនផ្សេងទៀត កំពុងស្ថិតក្នុងដំណើរការ នៃការបញ្ជូនត្រឡប់ទៅប្រទេសដើមវិញ។
លើសពីនេះ សំណុំរឿងចំនួន៤៤៦ករណី ត្រូវបានបញ្ចូនទៅតុលាការ ពាក់ព័ន្ធជនត្រូវចោទ ៣,៩២៧នាក់ មាន ២៩សញ្ជាតិ ខណៈការស៊ើបអង្កេតបន្ថែមលើអ្នកជាប់ពាក់ព័ន្ធ និងកិច្ចខិតខំប្រឹងប្រែងក្នុងការស្វែងរកទ្រព្យសម្បត្តិខុសច្បាប់កំពុងបន្ត។
ជាមួយប្រតិបត្តិការបោសសំអាតបទឆបោកតាមប្រព័ន្ធបច្ចេកវិទ្យានេះ ថវិកាជាង ៣០០លានដុល្លារអាមេរិក នៅក្នុងគណនីធនាគារដែលពាក់ព័ន្ធបទល្មើសឆបោកតាមប្រព័ន្ធអនឡាញ ត្រូវបានបង្កក ខណៈទ្រព្យសម្បត្តិពាក់ព័ន្ធផ្សេងទៀត ត្រូវបានបន្តនីតិវិធីបង្កក និងវាយតម្លៃជាបន្តបន្ទាប់៕
