(ភ្នំពេញ)៖ សម្តេចបវរធិបតី ហ៊ុន​​ ម៉ាណែត ប្រមុខរាជរដ្ឋាភិបាលកម្ពុជា បានសម្រេចអនុញ្ញាតឱ្យធនាគារជាតិនៃកម្ពុជា ចេញផ្សាយក្រដាសប្រាក់គំរូថ្មី ប្រភេទ ៥០០០០ រៀល និង ១០០០០០​ រៀល និងដាក់ឱ្យចរាចរទន្ទឹមគ្នានឹងក្រដាសប្រាក់គំរូចាស់ដែលកំពុងចរាចរ។

នៅថ្ងៃទី២៥ ខែកញ្ញា ឆ្នាំ២០២៦ ធនាគារជាតិនៃកម្ពុជា ប្រកាសដាក់ឲ្យចរាចរ និងប្រើប្រាស់ក្រដាសប្រាក់ថ្មី ៥០០០០រៀល និង ១០០០០០រៀល !

ធនាគារជាតិនៃកម្ពុជា សូមប្រកាសផ្សាយជាសាធារណៈនូវលក្ខណៈសម្គាល់នៃធនប័ត្រ ប្រភេទ ១០០០០០ រៀល គំរូថ្មី ដែលបានចេញផ្សាយអនុលោមតាមអនុក្រឹត្យលេខ ២០៦ អនក្រ.បក របស់រាជរដ្ឋាភិបាល ចុះថ្ងៃទី២៥ ខែកញ្ញា ឆ្នាំ២០២៦។ ធនប័ត្រថ្មីនេះ មានទំហំបណ្តោយ ១៧០ម.ម. និងទទឹង ៧៥ម.ម. ជាមួយពណ៌ចម្បងបៃតង និងប្រផេះ។ នៅលើផ្ទៃខាងមុខ ត្រូវបានរំលេចឡើងនូវព្រះឆាយាល័ក្ខណ៍អតីតព្រះមហាក្សត្រ ព្រះបរមរតនកោដ្ឋ និង សម្តេចព្រះមហាក្សត្រី នរោត្តម មុនិនាថ សីហនុ ព្រមទាំងលេខ-មាលា រូបភាពព្រះសង្ខារនៃព្រះរាជាណាចក្រកម្ពុជា និងរូបចម្លាក់នាគក្បាល ៩។ លើសពីនេះ ធនប័ត្រក៏មានហត្ថលេខារបស់ទេសាភិបាល និងអគ្គបេឡា រួមជាមួយលេខ «១០០០០០» ជាច្រើនកន្លែង។ ជាពិសេស នៅគែមខាងក្រោម ក៏មានអក្សរព្រមានថា “អ្នកក្លែងក្រដាសប្រាក់នឹងត្រូវផ្តន្ទាទោសតាមច្បាប់” ដើម្បីធានាសុវត្ថិភាពផងដែរ។

ធនាគារជាតិនៃកម្ពុជា បានប្រកាសជាសាធារណៈអំពីលក្ខណៈសម្គាល់នៃធនប័ត្រប្រភេទ ៥០០០០ រៀល គំរូថ្មី ដែលចេញផ្សាយអនុលោមតាមអនុក្រឹត្យរបស់រាជរដ្ឋាភិបាល ចុះថ្ងៃទី២៥ ខែកញ្ញា ឆ្នាំ២០២៦។ ធនប័ត្រថ្មីនេះមានទំហំបណ្តោយ ១៥៥ម.ម. ទទឹង ៧២ម.ម. និងមានពណ៌ចម្បងគឺស្លាទុំ និងត្នោត។ នៅផ្ទៃខាងមុខ ធនប័ត្រនេះរំលេចឡើងនូវព្រះឆាយាល័ក្ខណ៍អតីតព្រះមហាក្សត្រ ព្រះបរមរតនកោដ្ឋ ព្រមទាំងមានលេខ «៥០០០០» ហត្ថលេខា ជើងពានទ្រព្រះខ័ន រូបចម្លាក់នាគក្បាល៧ និងអក្សរព្រមានអ្នកក្លែងបន្លំ។ ដើម្បីធានាសុវត្ថិភាព ធនប័ត្រនេះក៏មានខ្សែសុវត្ថិភាពទំហំ ១,២ម.ម. កាត់ទទឹងក្រដាសប្រាក់ពីលើដល់ក្រោមផងដែរ។