ក្នុងជំនួបជាមួយសម្តេចតេជោ, ឯកអគ្គរដ្ឋទូតនូវែលសេឡង់ទើបតែងតាំងថ្មី ភ្ញាក់ផ្អើលភាពរីកចម្រើននៅកម្ពុជា ខុសគ្នាឆ្ងាយធៀបនឹង២០ឆ្នាំមុន (Video inside)
25-09-2026 20:39
(ភ្នំពេញ)៖ លោកស្រី រ៉េឡែន ស្យ៉ាល់ តាហ្គាឡ័រ លៀវហ្វាឡានី (Raylene Siale Tagaloa LIUFALANI) ឯកអគ្គរដ្ឋទូតរបស់នូវែលសេឡង់ប្រចាំនៅកម្ពុជា ដែលទើបតែងតាំងថ្មី បានបង្ហាញការភ្ញាក់ផ្អើលចំពោះការរីកចម្រើន និងការអភិវឌ្ឍនៅកម្ពុជាធៀបនឹងពេល២០ឆ្នាំមុន ពេលលោកស្រីមកលេងនៅកម្ពុជា។
លោកស្រីឯកអគ្គរដ្ឋទូត បានបង្ហាញការភ្ញាក់ផ្អើលចំពោះភាពរីកចម្រើន និងការអភិវឌ្ឍនៅកម្ពុជានេះ ក្នុងពេលលោកស្រីអញ្ជើញប្រគល់សារតាំងជូនសម្តេចតេជោ ហ៊ុន សែន ប្រមុខរដ្ឋស្តីទីនៅវិមានសាមគ្គីភាព នៃព្រឹទ្ធសភាកម្ពុជា នារសៀលថ្ងៃសុក្រ ទី២៥ ខែកញ្ញា ឆ្នាំ២០២៦។
លោក ជា ធីរិទ្ធ អ្នកនាំពាក្យព្រឹទ្ធសភា បានឱ្យថា ក្នុងជំនួបនោះ សម្ដេចតេជោ ហ៊ុន សែន បានសម្ដែងក្តីរីករាយក្នុងព្រះបរមនាមព្រះមហាក្សត្រនៃព្រះរាជាណាចក្រកម្ពុជា និងសូមអបអរសាទរចំពោះលោកស្រីត្រូវបានតែងតាំងជាឯកអគ្គរដ្ឋទូតរបស់នូវែលសេឡង់ប្រចាំនៅកម្ពុជា។ សម្ដេចតេជោ ចាត់ទុកវត្តមានរបស់លោកស្រីនៅពេលនេះ នឹងរួមចំណែកដល់ការពង្រីកទំនាក់ទំនងរវាងកម្ពុជា និងនូវែលសេឡង់ឱ្យកាន់តែរីកចម្រើនបន្ថែមទៀត។
លោកស្រីឯកអគ្គរដ្ឋទូតរបស់នូវែលសេឡង់ប្រចាំនៅកម្ពុជា ដែលទើបតែងតាំងថ្មីនេះ បានថ្លែងអំណរគុណសម្ដេចតេជោ ដែលបានបានអនុញ្ញាតឱ្យលោកស្រី ចូលជូនសារតាំង និងសម្ដែងការគួរសម។
លោកស្រីបានសម្ដែងនូវក្តីពេញចិត្តចំពោះទំនាក់ទំនងដ៏ល្អរវាងកម្ពុជា និងនូវែលសេឡង់ដែលកំពុងតែឈានទៅមុខ។ លោកស្រី បានកោតសរសើរចំពោះវឌ្ឍនភាពរបស់កម្ពុជា ដោយលោកស្រីបានរំលេចថា ប្រៀបនឹង២០ឆ្នាំមុន ពេលលោកស្រីអញ្ជើញមកទស្សនាប្រទេសកម្ពុជាជាមួយស្វាមី និង២០ឆ្នាំក្រោយនេះ លោកស្រីមិនគួរឱ្យជឿថា កម្ពុជាអាចអភិវឌ្ឍលឿនរហ័សទាល់តែសោះ។ លោកស្រី បានបង្ហាញការភ្ញាក់ផ្អើលចំពោះភាពរីកចម្រើនរបស់កម្ពុជា។
លោកស្រី ក៏បានលើកឡើងដែរថា កម្ពុជាគឺមានភាពធន់ខ្លាំងណាស់ ដែលគួរឱ្យសរសើរចំពោះការរីកចម្រើនរបស់ប្រទេសមួយនេះ។ បន្ថែមពីលើនេះ នៅក្នុងក្របខណ្ឌនៃកិច្ចសហប្រតិបត្តិការរវាងប្រទេសទាំងពីរ លោកស្រី បានលើកឡើងថា នូវែលសេឡង់ តែងជួយដល់កម្ពុជា ជាពិសេសការបោសសម្អាតមីន និងការផ្ដល់អាហារូបករណ៍ដល់និស្សិតកម្ពុជាទៅសិក្សានៅនូវែលសេឡង់ ដែលមកដល់ពេលនេះមាននិស្សិតកម្ពុជាប្រមាណ ១ ០០០នាក់ ទៅសិក្សានៅប្រទេសនូវែលសេឡង់។
សម្ដេចតេជោ ហ៊ុន សែន ប្រមុខរដ្ឋស្តីទី បានសម្ដែងនូវការពេញចិត្តចំពោះការលើកឡើងរបស់លោកស្រីឯកអគ្គរដ្ឋទូត ជាពិសេសទំនាក់ទំនងរវាងកម្ពុជា និងនូវែលសេឡង់។ សម្ដេចតេជោ បានអរគុណនូវែលសេឡង់ ដែលតែងតែចូលរួមចំណែកជួយដល់រដ្ឋាភិបាល និងប្រជាជនកម្ពុជានាពេលកន្លងមក ជាពិសេសការបណ្តុះបណ្តាលធនធានមនុស្សរបស់កម្ពុជា។
ចំពោះទំនាក់ទំនងរវាងប្រទេសទាំងពីរវិញ សម្ដេចតេជោ ក៏បានមានប្រសាសន៍ថា រដ្ឋាភិបាលនៃប្រទេសទាំងពីរគួរសិក្សាជាមួយគ្នា ទៅលើចំណុចណាដែលអាចមានសក្តានុពល នៅក្នុងការពង្រីកទំនាក់ទំនងរវាងកម្ពុជា និងនូវែលសេឡង់ ឱ្យកាន់តែរីកចម្រើន។ ទន្ទឹមនោះ សម្ដេចតេជោ ហ៊ុន សែន បានសង្កត់ធ្ងន់ទៅលើបញ្ហាធ្វើពាណិជ្ជកម្ម សេដ្ឋកិច្ច និងការវិនិយោគ ដែលជាចំណុចស្នូលមួយនៃទំនាក់ទំនងរវាងប្រទេសទាំងពីរ។
សម្ដេចតេជោ ក៏បានសម្ដែងក្តីរីករាយនៅពេលឃើញពាណិជ្ជកម្មរវាងកម្ពុជា និងនូវែលសេឡង់ កាន់តែកើនឡើង បើទោះបីជាមានចំនួនតិច ក៏ប៉ុន្តែមានការកើនឡើង ហើយសម្ដេចចង់ឃើញអ្នកវិនិយោគរបស់នូវែលសេឡង់មកវិនិយោគនៅកម្ពុជាកាន់តែច្រើន៕
