កម្ពុជា ស្វាគមន៍យ៉ាងកក់ក្តៅចំពោះការអញ្ជើញមកចូលរួមរបស់ថ្នាក់ដឹកនាំរវ៉ាន់ដា ក្នុងកិច្ចប្រជុំកំពូលហ្វ្រង់កូហ្វូនី លើកទី២០ នៅរាជធានីភ្នំពេញ (Video inside)
26-09-2026 11:07
(ញូវយ៉ក, អាម៉េរិក)៖ រាជរដ្ឋាភិបាលកម្ពុជា បានបង្ហាញការស្វាគមន៍យ៉ាងកក់ក្តៅចំពោះវត្តមានរបស់ថ្នាក់ដឹកនាំជាន់ខ្ពស់នៃសាធារណរដ្ឋរវ៉ាន់ដា ក្នុងការអញ្ជើញមកចូលរួមកិច្ចប្រជុំកំពូលហ្វ្រង់កូហ្វូនី លើកទី២០ និងកិច្ចប្រជុំពាក់ព័ន្ធ ដែលកម្ពុជានឹងធ្វើជាម្ចាស់ផ្ទះ ចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦ ខាងមុខនេះ នៅរាជធានីភ្នំពេញ។
ការគូសបញ្ជាក់ពីការស្វាគមន៍នេះ បានធ្វើឡើងក្នុងជំនួបពិភាក្សាទ្វេភាគីរវាង លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា ជាមួយ លោក Olivier J.P. Nduhungirehe រដ្ឋមន្ត្រីការបរទេសនៃសាធារណរដ្ឋរវ៉ាន់ដា នៅរសៀលថ្ងៃទី២៥ ខែកញ្ញា ឆ្នាំ២០២៦ ក្នុងឱកាសនៃការអញ្ជើញចូលរួមកិច្ចពិភាក្សាទូទៅនៃមហាសន្និបាតអង្គការសហប្រជាជាតិ (អ.ស.ប.) លើកទី៨១ នៅទីក្រុងញូវយ៉ក សហរដ្ឋអាម៉េរិក។
ក្នុងជំនួបប្រកបដោយផ្លែផ្កានេះ ប្រមុខការទូតទាំងពីរ បានសម្តែងនូវការពេញចិត្តយ៉ាងខ្លាំងចំពោះសន្ទុះរីកចម្រើនជាលំដាប់នៃទំនាក់ទំនងមិត្តភាព និងកិច្ចសហប្រតិបត្តិការរវាងកម្ពុជា និងរវ៉ាន់ដា។ ទន្ទឹមនឹងនេះ ភាគីទាំងពីរក៏បានរំលឹកឡើងវិញនូវលទ្ធផលជាវិជ្ជមានកន្លងមក ជាពិសេសក្នុងដំណើរទស្សនកិច្ចផ្លូវការ និងការចូលរួមរបស់លោកឧបនាយករដ្ឋមន្ត្រី ប្រាក់ សុខុន ក្នុងសន្និសីទថ្នាក់រដ្ឋមន្ត្រីហ្វ្រង់កូហ្វូនី លើកទី៤៦ កាលពីខែវិច្ឆិកា ឆ្នាំ២០២៥ នៅរដ្ឋធានីគីហ្គាលី។ ដំណើរទស្សនកិច្ចនាពេលនោះ សម្រេចបាននូវការចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពីការបង្កើតកិច្ចពិគ្រោះយោបល់ទ្វេភាគីរវាងក្រសួងការបរទេសទាំងពីរ និងកិច្ចព្រមព្រៀងស្តីពីការលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងផ្លូវការ។
បន្ថែមលើកិច្ចសហប្រតិបត្តិការទ្វេភាគី និងក្របខ័ណ្ឌហ្វ្រង់កូហ្វូនី លោកឧបនាយករដ្ឋមន្ត្រី ប្រាក់ សុខុន ក៏បានឆ្លៀតឱកាសធ្វើបច្ចុប្បន្នភាព និងជម្រាបជូនភាគីរវ៉ាន់ដា អំពីស្ថានការណ៍វិវត្តចុងក្រោយនៅតាមបណ្តោយព្រំដែនកម្ពុជា-ថៃ ផងដែរ៕
