(កំពង់ចាម)៖ នៅរសៀលថ្ងៃសៅរ៍ ទី២៦ ខែកញ្ញា ឆ្នាំ២០២៦នេះ លោកបណ្ឌិត ងួន វិទូ អនុប្រធានក្រុមការងាររាជរដ្ឋាភិបាលចុះមូលដ្ឋានឃុំបុសខ្នុរ តំណាងលោក ឌួង ឧត្តម ប្រធានក្រុមការងាររាជរដ្ឋាភិបាលចុះមូលដ្ឋានឃុំបុសខ្នុរ និងថ្នាក់ដឹកនាំ មន្ត្រីរាជការនៃក្រុមការងារគ្រប់លំដាប់ថ្នាក់ លោកគ្រូ អ្នកគ្រូ ព្រមទាំងពុទ្ធបរិស័ទចំណុះជើងវត្ត បានអញ្ជើញចូលរួមពិធីសូត្រមន្តចម្រើនព្រះបរិត្ត សុំសេចក្តីសុខ សេចក្តីចម្រើន ក្នុងឱកាសថ្ងៃកាន់បិណ្ឌវេនទី១ នៅវត្តគិរីមង្គលភ្នំទែត្រក្រៅ (ហៅវត្តទួល) ស្ថិតក្នុងភូមិបុសខ្នុរ ឃុំបុសខ្នុរ ស្រុកចំការលើ ខេត្តកំពង់ចាម។

ពិធីបុណ្យបានប្រព្រឹត្តទៅតាមគន្លងប្រពៃណីព្រះពុទ្ធសាសនា យ៉ាងមហោឡារិក និងជ្រះថ្លាក្រៃលែង ដោយមានពិធីថ្វាយបង្គំនមស្ការព្រះរតនត្រ័យ សមាទានសីល និមន្តព្រះសង្ឃចម្រើនព្រះបរិត្ត។

​ក្នុងឱកាសដ៏ប្រពៃនេះ លោកបណ្ឌិត ងួន វិទូ និងក្រុមការងារ ព្រមទាំងពុទ្ធបរិស័ទទាំងអស់ សូមឧទ្ទិសនូវមហាកុសលផលបុណ្យ ជូនចំពោះដួងវិញ្ញាណក្ខន្ធបុព្វការីជន មានមាតាបិតា ជីដូន ជីតា ព្រមទាំងញាតិកាទាំងប្រាំពីរសន្តាន ដែលបានចែកឋានទៅកាន់លោកខាងមុខ សូមបានសោយសុខក្នុងសុគតិភពកុំបីឃ្លៀងឃ្លាតឡើយ ហើយក៏សូមបួងសួងប្រសិទ្ធពរជ័យ សិរីមង្គល វិបុលសុខ ជូនដល់បងប្អូនជនរួមជាតិទាំងអស់ ទទួលបាននូវមគ្គផលស្មើៗគ្នា។

​សូមបញ្ជាក់ថា ពិធីបុណ្យកាន់បិណ្ឌ និងភ្ជុំបិណ្ឌ ជាបុណ្យប្រពៃណីជាតិ និងសាសនាដ៏ធំមួយរបស់ខ្មែរ ដែលពុទ្ធសាសនិកជនទូទាំងប្រទេសតែងតែគោរពប្រតិបត្តិតាំងពីបុរាណកាលមក មានរយៈពេល ១៥ថ្ងៃ ចាប់ពីថ្ងៃ១រោច ដល់ថ្ងៃ១៥រោច ខែភទ្របទ ដោយថ្ងៃ១រោច ដល់ថ្ងៃ១៤រោច ជាថ្ងៃកាន់បិណ្ឌ (បិណ្ឌ១ ដល់បិណ្ឌ១៤) និងថ្ងៃ១៥រោច គឺជាថ្ងៃបុណ្យភ្ជុំបិណ្ឌធំ៕