អគារបន្ទប់ទឹកនៅសាលាបឋមសិក្សាចំបក់ខាងជើង ស្រុកសន្ទុក ខេត្តកំពង់ធំ បានប្រគល់ជូនដើម្បីឲ្យសិស្សានុសិស្សប្រើប្រាស់
28-09-2026 10:58
(កំពង់ធំ)៖ អគារបន្ទប់ទឹកដ៏ស្អាតមួយខ្នងមានចំនួន៧បន្ទប់ នៅសាលាបឋមសិក្សាចំបក់ខាងជើង ក្នុងស្រុកសន្ទុក ខេត្តកំពង់ធំ បានកែលម្អ ហេដ្ឋារចនាសម្ព័ន្ធ ឲ្យក្លាយជាបន្ទប់ទឹកមានលក្ខណៈបរិយាបន្ន លើកកម្ពស់អនាម័យ គាំទ្រសុខុមាលភាពសិស្សានុសិស្ស និងបង្កើន លទ្ធភាពទទួលបានសេវាអនាម័យបរិស្ថាន និងអនាម័យផ្ទាល់ខ្លួនប្រកបដោយសុវត្ថិភាព។
លោក ស៊ុំ សន្និសិទ្ធ ទេសាភិបាលរងធនាគារជាតិនៃកម្ពុជា លើកឡើងនៅក្នុងពិធីប្រគល់-ទទួលអគារបន្ទប់ទឹកស្អាត នៅសាលាបឋមសិក្សាចំបក់ខាងជើង ក្នុងស្រុកសន្ទុក ខេត្តកំពង់ធំ នៅថ្ងៃទី២៦ ខែកញ្ញា ឆ្នាំ២០២៦ នេះថា រាជរដ្ឋាភិបាលកម្ពុជាថ្មីក្រោមការដឹកនាំ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បាននិងកំពុងធ្វើដំណើរទៅមុខ យ៉ាងស្វាហាប់ និងបន្តយកចិត្តទុកដាក់យ៉ាងខ្លាំងលើវិស័យសំខាន់ៗនានា ក្នុងការអភិវឌ្ឍសេដ្ឋកិច្ចជាតិ ក្នុងនោះរាជរដ្ឋាភិបាលកម្ពុជា បានចាត់ទុកផ្នែកអនាម័យ និងទឹកស្អាតជាអាទិភាពមួយ ជាមួយនឹងចក្ខុវិស័យជំរុញឲ្យមានការទទួលបានទឹកស្អាត និងសេវាអនាម័យជាសកលឲ្យបានត្រឹមឆ្នាំ២០៣០។
លោក ស៊ុំ សន្និសិទ្ធ បានចូលរួមអបអរសាទរ នៃការទទួលបានអគារបន្ទប់ទឹកដ៏ស្អាតមួយខ្នងនេះ មានចំនួន៧បន្ទប់ ជាមួយនឹងការកែលម្អហេដ្ឋារចនាសម្ព័ន្ធ ឲ្យក្លាយជាបន្ទប់ទឹកមានលក្ខណៈបរិយាបន្ន មានផ្លូវជម្រាល ទ្វារធំទូលាយ និងមានដៃទប់សម្រាប់សិស្សមានពិការភាព។
ការបែងចែក និងឯកជនភាព បំបែកបន្ទប់ទឹកប្រុស-ស្រី ឲ្យដាច់ដោយឡែកពីគ្នា ដោយ មានគន្លឹះទ្វារសុវត្ថិភាព និងជញ្ជាំងជិតល្អ ដើម្បីធានាភាពឯកជនខ្ពស់ ក្នុងនោះបន្ទប់អនាម័យសម្រាប់កុមារី, បានបង្កើតឲ្យមាន ជ្រុង អនាម័យកុមារី ដែលមានទឹកស្អាត សាប៊ូ និងធុងសំរាមមានគម្របបិទជិត ទាំងនេះជាសមិទ្ធផលថ្មីមួយបន្ថែមទៀតសម្រាប់សាលា បឋមសិក្សាចំបក់ខាងជើង។
លោកបានថ្លែងអំណរគុណ ចំពោះគណៈគ្រប់គ្រងធនាគារ PPC Bank ដែលបានគាំទ្រឧបត្ថម្ភផ្នែកហិរញ្ញវត្ថុ ក្នុងការ កសាងអគារបន្ទប់ទឹកស្អាតនេះឡើង ក្រោមការសម្របសម្រួលរបស់អង្គការរក្សាកុមារ ព្រមទាំងសូមថ្លែងអំណរគុណចំពោះអាជ្ញាធរមានសមត្ថកិច្ចគ្រប់លំដាប់ថ្នាក់ មន្ទីរអប់រំយុវជននិងកីឡា លោកស្រីនាយិកា លោកគ្រូអ្នកគ្រូ និងដៃគូអភិវឌ្ឍនានា ដែលបានផ្តល់កិច្ចសហប្រតិបត្តិការល្អ និងរួមសាមគ្គីគ្នាកសាងអគារបន្ទប់ទឹកស្អាត សម្រាប់លើកកម្ពស់អនាម័យ គាំទ្រសុខុមាលភាពសិស្សានុសិស្ស និងបង្កើនលទ្ធភាពទទួលបានសេវាអនាម័យបរិស្ថាន និងអនាម័យផ្ទាល់ខ្លួនប្រកបដោយសុវត្ថិភាព សម្រាប់សិស្សានុសិស្សទាំងអស់ នៅក្នុងសាលាបឋមសិក្សា។
លោកទេសាភិបាលរង ព្រមទាំងម្ចាស់ជំនួយ បាននាំយកនូវអំណោយចែកជូនលោកគ្រូ-អ្នកគ្រូ សិស្សានុសិស្ស រួមមាន៖ ឧបត្ថម្ភកម្មវិធីចំនួន ២ លានរៀល, ក្រុមការងារថ្នាក់ស្រុក ឃុំ និងភូមិចំនួន ២៤ រូប និងឧបត្ថម្ភមន្ត្រីការិយាល័យអប់រំ ស្រុក និងលោកគ្រូ-អ្នកគ្រូចំនួន ២១ រូប ក្នុងម្នាក់ៗទទួលបានសារុង ១ ថវិកា ៣ ម៉ឺនរៀល និងឧបត្ថម្ភដល់សិស្សានុសិស្សចំនួន ២៣២ រូប ក្នុងម្នាក់ៗទទួលបានឃីត១កញ្ចប់ និងថវិកា ១ ម៉ឺនរៀល៕
