(ស្វាយរៀង)៖ លោកស្រីមហាឧបាសិកាពុទ្ធសាសនូបត្ថម្ភក៍ ហុឹម ម៉ាលី សមាជិកក្រុមការងារថ្នាក់កណ្តាលចុះជួយមូលដ្ឋានឃុំសង្កែ និងលោក ហេង ឡាលីន រដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់ ព្រមទាំងក្រុមការងារ នៅព្រឹកថ្ងៃទី២៨ ខែកញ្ញា ឆ្នាំ២០២៦នេះ បាននាំយកទេយ្យទាន និងបច្ច័យមួយចំនួនប្រគេនដល់ព្រះសង្ឃគង់នៅវត្តលក្ខរាជា ស្ថិតក្នុងឃុំកំពង់ចក ស្រុករំដួល ខេត្តស្វាយរៀង ក្នុងឱកាសបុណ្យភ្ជុំបិណ្ឌវេនទី២។

ក្នុងឱកាសដ៏មហានក្ខត្តឫក្សនេះ លោកស្រី ហុឹម ម៉ាលី បានពាំនាំនូវការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងសម្ដេចកិត្តិសង្គហបណ្ឌិត ម៉ែន សំអន ប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តស្វាយរៀង ជូនចំពោះលោកយាយ លោកតា ប្រជាពលរដ្ឋដែលជាពុទ្ធបរិស័ទចំណុះជើងវត្តទាំងអស់ ដោយក្តីនឹករលឹក និងការគិតគូរសុខទុក្ខប្រជាពលរដ្ឋនៅខេត្តស្វាយរៀង ក៏ដូចជាប្រជាពលរដ្ឋទូទាំងប្រទេស។

លោកស្រីមហាឧបាសិកា ហុឹម ម៉ាលី បានថ្លែងបញ្ជាក់ថា ជារៀងរាល់ឆ្នាំនៅពេលដល់ពិធីបុណ្យភ្ជុំបិណ្ឌ លោកស្រី និងក្រុមគ្រួសារតែងតែធ្វើដំណើរទៅជួបជុំគ្នា នៅស្រុកកំណើត ដើម្បីរៀបចំចង្ហាន់យកទៅប្រគេនព្រះសង្ឃ ដែលគង់នៅវត្តអារាមនានា ក្នុងគោលបំណងឧទ្ទិសកុសលផលបុណ្យជូនដល់ដួងវិញ្ញាណក្ខន្ធ ញាតិការទាំង ៧សណ្តាន និងបុព្វការីជន-បុព្វបុរសជាតិ ដែលបានលាចាកលោកនេះទៅកាន់លោកខាងមុខ។

ជាមួយគ្នានេះលោកស្រីក៏បានផ្តាំផ្ញើដល់ប្រជាពលរដ្ឋទាំងអស់ទៅត្រួតពិនិត្យបញ្ជីឈ្មោះ និងចុះឈ្មោះបោះឆ្នោតឱ្យបានត្រឹមត្រូវតាមការកំណត់របស់គណៈកម្មាធិការជាតិរៀបចំការបោះឆ្នោត ដើម្បីត្រៀមខ្លួនចូលរួមបោះឆ្នោតនាពេលខាងមុខ និងបន្តគាំទ្រគណបក្សប្រជាជនកម្ពុជា ក្នុងការដឹកនាំប្រទេសកម្ពុជាឱ្យកាន់តែរីកចម្រើនជាបន្តបន្ទាប់ទៀត ក្រោមការដឹកនាំដ៏ឈ្លាសវៃរបស់ថ្នាក់ដឹកនាំបក្ស និងរាជរដ្ឋាភិបាល។

សូមបញ្ជាក់ផងដែរថា ក្នុងឱកាសនោះលោកស្រីមហាឧបាសិកា ហុឹម ម៉ាលី និងកូនចៅ ក៏បានប្រគេនស៊ីម៉ង់ចំនួន ៥តោន ដល់វត្តលក្ខរាជា ព្រមទាំងចែកជូនសារុង១ និងថវិកាមួយចំនួនជូនដល់ពុទ្ធបរិស័ទ និងកងកម្លាំងស្រុក ដែលបានចូលរួមក្នុងពិធីកាន់បិណ្ឌវេនទី២នេះផងដែរ ដើម្បីជាការរួមចំណែកលើកកម្ពស់វិស័យព្រះពុទ្ធសាសនា និងសុខុមាលភាពសង្គម៕