(ភ្នំពេញ)៖ លោកស្រី ហេង សំអូន អគ្គនាយករង នៃអគ្គនាយកដ្ឋានគយ និងរដ្ឋាករកម្ពុជា តំណាងលោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា និងលោកស្រី ប៉ាន់ ត្រាប្រណី រួមទាំងថ្នាក់ដឹកនាំ និងមន្ដ្រីគយ និងរដ្ឋាករ នារសៀលថ្ងៃទី២៩ ខែកញ្ញា ឆ្នាំ២០២៦ បានអញ្ជើញចូលរួមពិធីសូត្រមន្តនមស្ការព្រះរតនត្រ័យ សមាទានសីល និមន្តព្រះសង្ឃចម្រើនព្រះបរិត្ត និងស្តាប់ព្រះធម៌ទេសនា ក្នុងឱកាសកាន់បិណ្ឌវេនទី៤ នៅវត្តបទុមវតីរាជវរារាម រាជធានីភ្នំពេញ។

លុះដល់ព្រឹកថ្ងៃពុធ ៤រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៣០ ខែកញ្ញា ឆ្នាំ២០២៦ លោកស្រី ហេង សំអូន និងថ្នាក់ដឹកនាំ ព្រមទាំងមន្ដ្រីគយ និងរដ្ឋាករបានថ្វាយយាគូសម្ដេចសង្ឃ និងប្រគេនយាគូព្រះសង្ឃ ចំនួន ៤៥៧អង្គ ព្រមទាំងបាននាំយកនូវបច្ច័យ ទេយ្យទាន និងសាដកថ្វាយ សម្ដេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត នន្ទ ង៉ែត រួចនមស្ការព្រះរតនត្រ័យ សមាទានសីល រាប់បាត្រ បង្សុកូល វេរភត្ដាហារប្រគេនព្រះសង្ឃ និងពហូទេវាដារឆ្លង ជាកិច្ចបញ្ចប់ពិធីបុណ្យ។

នៅក្នុងឱកាសនោះ ក៏មានការចែកទានដល់លោកតាអាចារ្យវត្តចំនួន ១០នាក់ តាជី-យាយជី ចំនួន ២០នាក់ និងសិស្ស-និស្សិតបម្រើការងារចំនួន ២០នាក់ ផងដែរ។

ពិធីបុណ្យកាន់បិណ្ឌនេះ ធ្វើឡើងដើម្បីឧទ្ទិសកុសលផលបុណ្យដល់ដួងវិញ្ញាណក្ខន្ធមន្ដ្រីរាជការគយនិង រដ្ឋាករដែលបានចែកឋានទៅកាន់បរលោក និងឧទ្ទិសកុសល ដល់ដួងវិញ្ញាណក្ខន្ធវីរកងទ័ព និងវីរនគរបាលជាតិដែលបានពលីជីវិតក្នុងបុព្វហេតុការពារបូរណភាពទឹកដីនៅសមរភូមិមុខ ព្រមទាំងញាតិទាំង ៧សណ្ដាន និងតំណញាតិច្រើនមហាកប្បនោះផងដែរ៕