(ភ្នំពេញ)៖ សិស្ស-និស្សិត ជាយុវជនកាកបាទក្រហមកម្ពុជា អ្នកស្ម័គ្រចិត្ដ មកពីមជ្ឈដ្ឋានចម្រុះ ប្រមាណជាង ២០០នាក់ ក្នុងនោះមានអ្នកស្ម័គ្រចិត្ដមកពីខណ្ឌដូនពេញ នៅមូលដ្ឋានភ្នំពេញថ្មី និស្សិតមកពីសាកលវិទ្យាល័យចំនួន២​ និងវិទ្យាល័យចំនួនពីរនៅរាជធានីភ្នំពេញ មកទទួលចំណេះពីខ្លឹមសារ «ម ស្មើ ម» និងគោលដៅ៩៥-៩៥-៩៥នៃមេរោគអេដស៍- ជំងឺអេដស៍ ពីក្រុមការងារឥស្សរជនឆ្នើមថ្នាក់ជាតិនៃទីស្នាក់ការកណ្តាលកាកបាទក្រហមកម្ពុជា នាថ្ងៃទី៣០ ខែកញ្ញា ឆ្នាំ២០២៦ ដែលដឹកនាំដោយផ្ទាល់ពីលោកស្រី ម៉ែន នារីសោភ័គ អគ្គលេខាធិការរងទីកាកបាទក្រហមកម្ពុជា នាទីស្នាក់ការកណ្ដាលកាកបាទក្រហមកម្ពុជា។

តាមការបញ្ជាក់របស់លោកស្រី ម៉ែន នារីសោភ័គ បានឱ្យដឹងថា គោលបំណងនៃការរៀបចំពិធីអប់រំផ្សព្វផ្សាយស្តីពី «ម ស្មើ ម» និងគោលដៅ ៩៥-៩៥-៩៥ នៃមេរោគអេដស៍/ជំងឺអេដស៍ ជូនដល់អ្នកស្ម័គ្រចិត្ត និងយុវជនកាកបាទក្រហមកម្ពុជា គឺដើម្បី «លើកកម្ពស់ការយល់ដឹង ខ្លឹមសារ ម ស្មើ ម និង៩៥-៩៥-៩៥ នៃមេរោគអេដស៍/ជំងឺអេដស៍នៅកម្ពុជា» និងចង់បំផុសគំនិត និងបញ្ជ្រៀបពីអត្ថប្រយោជន៍ និងចំណុចគួរស្វែងយល់បន្ថែម ពិសេសការបង្ការ ការពារ ពីមេរោគអេដស៍ /ជំងឺអេដស៍ ដល់សិស្ស-និស្សិតឱ្យបានកាន់តែច្រើន។ ពិសេសជាងនេះទៅទៀត ដើម្បីត្រៀមលក្ខណៈ និងចូលរួមយ៉ាងសកម្មក្នុងយុទ្ធនាការដ៏ធំ «ម ស្មើ ម» លើកទី៥នៅថ្ងៃទី២២ ខែតុលា ឆ្នាំ២០២៦ ខាងមុខនេះ។

លោកស្រីអគ្គលេខាធិការរងទី១ បានលើកឡើងទៀតថា យុវជនគឺជាកម្លាំង ចលករដ៏មានឥទ្ធិពល ក្នុងការចូលរួមលុបបំបាត់ការរើសអើង និងការរីករាលដាលនៃមេរោគអេដស៍នៅក្នុងសង្គម។ ដូច្នេះលោកស្រីបានលើកទឹកចិត្តឱ្យសិស្ស-និស្សិតទាំងអស់ យកចិត្តទុកដាក់ក្រេបជញ្ជក់ចំណេះដឹងពីកម្មវិធីនេះ ដើម្បីយកទៅធ្វើការផ្សព្វផ្សាយបន្តទៅកាន់មិត្តភក្តិ គ្រួសារ និងសហគមន៍ ក្នុងស្មារតីរួមគ្នាឆ្ពោះទៅសម្រេចឱ្យបាននូវគោលដៅគ្មានអ្នកឆ្លងមេរោគអេដស៍ថ្មីនៅកម្ពុជា។

លោកស្រី ម៉ែន នារីសោភ័គ បានគូសបញ្ជាក់កាន់តែច្បាស់ទៀតថា «ក្រោយពីយើងបានរំលេចនូវខ្លឹមសារ «ម ស្មើ ម» ដែលមានន័យថា «មិនរកឃើញ ស្មើ មិនចម្លង» ៩៥-៩៥-៩៥ នៃមេរោគអេដស៍/ជំងឺអេដស៍ គឺជាយុទ្ធសាស្ត្រសកលដែលកម្ពុជាកំពុងអនុវត្ត ដោយទី១ គឺ ៩៥% នៃអ្នកផ្ទុកមេរោគអេដស៍បានដឹងពីស្ថានភាពឆ្លងរបស់ខ្លួន, ទី២ គឺ ៩៥% នៃអ្នកដឹងពីស្ថានភាពបានទទួលការព្យាបាលដោយថ្នាំ ARV និងទី៣ គឺ៩៥% នៃអ្នកទទួលការព្យាបាល មានកម្រិតមេរោគធ្លាក់ចុះទាបបំផុត (សម្រេចបាន ម ស្មើ ម) ឃើញថាសិស្ស-និស្សិតមានការយល់ដឹងបានកាន់តែច្បាស់ជាងមុន ព្រោះថាការរៀបចំនេះគឺយើងបានធ្វើឡើងជាលើកទី៥ហើយ តាមរូបភាព និងតាមទីតាំង នៃមជ្ឈដ្ឋានផ្សេងៗកាលពីកន្លងទៅ»។

ក្នុងឱកាសអប់រំផ្សព្វផ្សាយនេះ ក៏មានបង្ហាញលម្អិតបន្ថែមពីអត្ថន័យនិងអត្ថប្រយោជន៍នៃ «ម ស្មើ ម» និង៩៥-៩៥-៩៥ នៃមេរោគអេដស៍/ជំងឺអេដស៍ ជូនដល់សិស្ស-និស្សិត និងអ្នកស្ម័គ្រចិត្ដផងដែរ ពីលោកបណ្ឌិត វ៉ា សុភ័ក្រ្ត ប្រធានការិយាល័យការពារជំងឺឆ្លង និងមិនឆ្លងនៃកាកបាទក្រហមកម្ពុជា និងជាលេខាធិការក្រុមការងារឥស្សរជនឆ្នើមថ្នាក់ជាតិ។

ជាមួយគ្នានោះលោកស្រី ព្រំ ដាលីស អ្នកគ្រប់គ្រងកម្មវិធីបណ្ដាញអ្នករស់នៅជាមួយមេរោគអេដស៍ ក៏បានចែករំលែកបទពិសោធន៍ជាក់ស្ដែង ដោយបានរៀបរាប់ពីដំណើរជីវិត និងការតស៊ូព្យាបាលដោយថ្នាំ ARV រហូត
ទទួលបានលទ្ធផល «ម ស្មើ ម» ដែលអាចរស់នៅ មានសុខភាពល្អ និងមានសុភមង្គលក្នុងសង្គមដោយគ្មានការចម្លង។ នេះជាសក្ខីភាពមួយដ៏រស់រវើក បង្ហាញថាអេដស៍លែងជាឧបសគ្គនៃការរស់នៅទៀតហើយ ប្រសិនបើយើង
ទទួលបានការព្យាបាលត្រឹមត្រូវ។ លោកស្រីក៏បានស្នើឱ្យគ្រប់មជ្ឈដ្ឋានទាំងអស់ ឈប់រើសអើងអ្នកជំងឺអេដស៍-អ្នកផ្ទុកមេរោគអេដស៍ ហើយបើជួបអ្នកជំងឺអេដស៍- អ្នកផ្ទុកមេរោគអេដស៍ ក៏ឈប់ហៅគាត់អ្នកកើតអេដស៍ អ្នកផ្ទុកមេរោគអេដស៍។

សូមជម្រាបថាការអប់រំផ្សព្វផ្សាយខាងលើនេះ ក៏មានកម្មវិធីសំណួរចម្លើយសម្រាប់ចូលរួម ដើម្បីបញ្ជាក់សារជាថ្មី និងបកស្រាយចម្ងល់ជុំវិញប្រធានខាងលើ ហើយក៏ជាការត្រៀមលក្ខណៈជាស្រេច ក្នុងការចូលរួមយ៉ាងសកម្មក្នុងយុទ្ធនាការដ៏ធំ «ម ស្មើ ម» លើកទី៥នៅថ្ងៃទី២២ ខែតុលា ឆ្នាំ២០២៦ ខាងមុខនេះ។ មុននឹងបញ្ចប់កម្មវិធីកាកបាទក្រហមកម្ពុជា ក៏បានប្រគល់ប័ណ្ណសរសើរ ប័ណ្ណថ្លែងអំណរគុណ និងវត្ថុអនុស្សាវរីយ៍ជូនដល់ លោកស្រី ព្រំ ដាលីស ដែលបានខិតខំប្រឹងប្រែងក្នុងសកម្មភាពមនុស្សធម៌នេះ និងវត្ថុអនុស្សាវរីយ៍លើកទឹកចិត្តដល់អ្នកចូលរួមសួរនិងឆ្លើយសំណួរពីកម្មវិធីផងដែរ៕