(ភ្នំពេញ)៖ លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានថ្លែងថាគ្រោះទឹកជំនន់អាចប៉ះពាល់បង្កជាផលវិបាកខ្លះដល់ប្រជាកសិករមួយចំនួន តែមិនប៉ះពាល់ដល់សន្តិសុខស្បៀង ឬការនាំចេញរបស់កម្ពុជាទេ។

យោងតាមរបាយការណ៍របស់គណៈកម្មាការជាតិគ្រប់គ្រងគ្រោះមហន្តរាយ បានឱ្យដឹងថាចាប់ពីថ្ងៃទី៨ ដល់ថ្ងៃទី៣០ ខែកញ្ញា បានឱ្យដឹងថា ចំនួនប្រជាពលរដ្ឋរងផលប៉ះពាល់បានកើនឡើងដល់ ៨០,៤៦០គ្រួសារ (កើនឡើង ៦,៥៣៨គ្រួសារ បើធៀបនឹងថ្ងៃម្សិលមិញ)។ ក្នុងនោះមានផ្ទះសម្បែងរងផលប៉ះពាល់ចំនួន ៦៨,៣៣៤ខ្នង និងគ្រួសារដែលត្រូវ បានជម្លៀសទៅកាន់ទីទួលសុវត្ថិភាពមានចំនួន ៨,០៤២គ្រួសារ។ ជាមួយគ្នានេះ ផ្ទៃដីបង្កបង្កើនផលស្រូវរបស់ប្រជាកសិករត្រូវបានទឹកជន់លិចអស់ប្រមាណ ១៥៦,១២៥ហិកតា។

អ្នកនំាពាក្យក្រសួងកសិកម្ម បញ្ជាក់ថា គ្រោះទឹកជំនន់អាចប៉ះពាល់ដល់ដំណាំបងប្អូនប្រជាកសិករ ប៉ុន្តែផលប៉ះពាល់ខុសពីការខូចខាត ដោយសារតែជាទូទៅគ្រោះទឹកជំនន់បើសិនជាយូរអាចប្រឈមនឹងការខូចខាត ប៉ុន្តែបើសិនជាវារយៈពេលខ្លីទេការប៉ះពាល់មួយចំនួនមិនដល់ការខូចខាតទេ។

លោក បន្តថា «បើតាមបទពិសោធន៍ដែលយើងធ្វើកន្លងមកនោះ ការខូចខាត់ជាក់ស្ដែងគឺមានទំហំតូចជាងផលប៉ះពាល់ឆ្ងាយ មានសំណួរសួរថាតើយើងមានការព្រួយអារម្មណ៍អត់? ឧទាហរណ៍ថាការនាំចេញរបស់យើង យើងរំពឹងថានាំចេញអង្ករច្រើនតើថាផលប៉ះពាល់នេះវាចេះឥទ្ធិពលមកដល់វិស័យស្រូវអង្ករយើងដែរឬទេ? ទំហំនៃផលប៉ះពាល់ បើធៀបទៅនឹងផ្ទៃដីផលិតកម្មដំណាំស្រូវនៅក្នុងរដូវវស្សារបស់យើង មានប្រហែលជា ៣លានហិកតា អញ្ចឹងបើយើងនិយាយលេខមូលផលប៉ះពាល់នេះវាប៉ះពាល់ប្រហែលជា ៥%នៃផ្ទៃដីផលិតកម្មយើងរដូវវស្សាប៉ុណ្ណោះ»។

ជាការវាយតម្លៃបឋម លោក ឃឹម ហ្វីណង់ បញ្ជាក់ថា ការខូចខាតអាចនៅកម្រិតទាបជាង ៥% ដូច្នេះមិនធ្វើឱ្យប៉ះពាល់ដល់សន្ដិសុខស្បៀង ឬការនាំចេញស្រូវ-អង្កររបស់កម្ពុជានោះទេ។ លោក បានគូសបញ្ជាក់ដូច្នេះថា «ក្រសួងជឿជាក់ថាគ្រោះធម្មជាតិនេះប៉ះពាល់បង្កជាផលពិបាកដល់បងប្អូនប្រជាកសិករកម្រិតបុគ្គល តែមិនប៉ះពាល់ដល់សន្តិសុខស្បៀងរបស់កម្ពុជាហើយក៏មិនប៉ះពាល់ដល់ការនាំចេញរបស់កម្ពុជាទេ ប្រាកដណាស់អ្វីដែលប៉ះពាល់ដល់បងប្អូនប្រជាកសិករ នេះជាយន្តការពីក្រសួងកសិកម្មគឺយើងមានការត្រៀមនៅពូជស្រូវ ដើម្បីជួយដល់កសិករសម្រាប់អ្នកដែលត្រូវដាំឡើងវិញ ហើយមានទឹកគ្រប់គ្រាន់ដើម្បីដាំឡើងវិញ»៕