(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មានប្រសាសន៍ថា ការអនុវត្តកាតព្វកិច្ចយោធា មិនត្រឹមតែជាការចូលរួមបម្រើជាតិ និងការពារមាតុភូមិប៉ុណ្ណោះទេ ប៉ុន្តែជាការបណ្តុះបណ្តាលធនធានមនុស្ស ដោយដាំក្នុងសាលាយោធា ហើយផ្លែផ្កានៅក្នុងសង្គម។ សម្តេចមហាបវរធិបតី ហ៊ុន ម៉ាណែត មានប្រសាសន៍បែបនេះ ក្នុងឱកាសអញ្ជើញប្រគល់សញ្ញាបត្រដល់និស្សិតសាកលវិទ្យាល័យអាស៊ី អឺរ៉ុប ចំនួន២,៥៧៣អង្គ/នាក់ នាព្រឹកថ្ងៃទី២ ខែតុលា ឆ្នាំ២០២៦។

សម្ដេចធិបតីនាយករដ្ឋមន្ត្រី មានប្រសាសន៍យ៉ាងដូច្នេះថា៖ «សម្រាប់កម្ពុជា គឺយើងវិនិយោគធនធានមនុស្សនៅក្នុងកងទ័ព ដាំនៅក្នុងកងទ័ព តែផ្លែផ្កាក្នុងសង្គម។ នេះគឺច្បាប់កាតព្វកិច្ចកងទ័ព។ ២ឆ្នាំ យកយុវជនដែលធ្លាប់តែដើរ ឬមិនទាន់ដើរ យកទៅលត់ ទោះបីគាត់មានជំនាញ បំណិនមួយចំនួន ឬជំនាញអ្វីក៏ដោយ ក៏អាចយកទៅបំពេញឥរិយាបថ នៃការទទួលខុសត្រូវ នៃភាពជាអ្នកដឹកនាំបាន។ ចឹងគាត់ចេញមកកាន់តែល្អ»។

បើតាមប្រសាសន៍របស់សម្ដេចមហាបវរធិបតី ហ៊ុន ម៉ាណែត, កម្ពុជា កំពុងវិនិយោគលើធនធានមនុស្ស តាមរយៈការអនុវត្តកាតព្វកិច្ចយោធា ដោយយុវជនដែលចូលបំពេញកាតព្វកិច្ច នឹងទទួលបានការបណ្តុះបណ្តាលទាំងជំនាញ ឥរិយាបថ ការទទួលខុសត្រូវ និងភាពជាអ្នកដឹកនាំ។

សម្ដេចមហាបវរធិបតីនាយករដ្ឋមន្ដ្រីនៃកម្ពុជា បានពន្យល់ថា ការបំពេញកាតព្វកិច្ចយោធារយៈពេល២ឆ្នាំ អាចជួយកែសម្រួលឥរិយាបថ និងបណ្តុះស្មារតីទទួលខុសត្រូវរបស់យុវជន ទោះបីពួកគេមានជំនាញ ឬបំណិនខុសៗគ្នាពីមុនក៏ដោយ។ ការបណ្តុះបណ្តាលនេះ នឹងជួយឲ្យយុវជនមានភាពរឹងមាំ និងត្រៀមខ្លួនបានកាន់តែល្អ សម្រាប់ការងារ និងការរស់នៅក្នុងសង្គម។

សម្តេចមហាបវរធិបតី ហ៊ុន ម៉ាណែត បានលើកឡើងទៀតថា នៅគ្រប់កន្លែងការងារ មិនថាក្នុងវិស័យណានោះទេ ការទទួលខុសត្រូវ និងឥរិយាបថរបស់បុគ្គល គឺជាកត្តាសំខាន់។ ការបណ្តុះបណ្តាលឲ្យមានទំនួលខុសត្រូវ និងឥរិយាបថល្អ គឺជាផ្នែកមួយដែលអាចជួយឱ្យបុគ្គលទទួលបានភាពជោគជ័យក្នុងការងារ។

សម្ដេចបានបន្តថា ក្នុងក្រុមមនុស្សមួយក្រុម មិនអាចមានមនុស្សគ្រប់គ្នាក្លាយជាអ្នកដឹកនាំទាំងអស់នោះទេ ប៉ុន្តែម្នាក់ៗអាចមានតួនាទី និងសមត្ថភាពខុសៗគ្នា។ អ្នកខ្លះអាចជាអ្នកផ្តួចផ្តើម អ្នកខ្លះអាចជាអ្នករត់ទៅមុខ ខណៈអ្នកខ្លះទៀតមានតួនាទីគាំទ្រ និងបំពេញការងារតាមសមត្ថភាពរបស់ខ្លួន។

សម្តេចមហាបវរធិបតី ហ៊ុន ម៉ាណែត បានបញ្ជាក់ថា ការរៀបចំច្បាប់ស្តីពីកាតព្វកិច្ចយោធា មិនត្រឹមតែផ្តល់ឱកាសឲ្យប្រជាពលរដ្ឋ និងយុវជនចូលរួមបម្រើជាតិប៉ុណ្ណោះទេ ប៉ុន្តែថែមទាំងផ្តល់ឱកាសឲ្យពួកគេទទួលបានការបណ្តុះបណ្តាល និងអភិវឌ្ឍសមត្ថភាពរបស់ខ្លួនផងដែរ។

យោងតាម Fresh AI បានឲ្យដឹងថា ច្បាប់ស្តីពីកាតព្វកិច្ចយោធា ត្រូវបានប្រកាសឲ្យប្រើប្រាស់ជាផ្លូវការនៅថ្ងៃទី២៣ ខែឧសភា ឆ្នាំ២០២៦ ដោយមាន៨ជំពូក និង២០មាត្រា។ ច្បាប់នេះកំណត់អំពីវិធាននៃការអនុវត្តកាតព្វកិច្ចយោធា ដើម្បីរួមចំណែកកសាងប្រទេសជាតិ និងការពារមាតុភូមិ ដែលជាកាតព្វកិច្ច និងជាកិត្តិយសរបស់ប្រជាពលរដ្ឋខ្មែរ។

ច្បាប់នេះតម្រូវឲ្យប្រជាពលរដ្ឋខ្មែរជាបុរស ដែលមានអាយុចាប់ពី១៨ ដល់២៥ឆ្នាំ ចូលហ្វឹកហាត់ក្នុងកងទ័ពរយៈពេល២៤ខែ។ ចំពោះប្រជាពលរដ្ឋខ្មែរជាស្ត្រី គឺអនុវត្តតាមគោលការណ៍ស្ម័គ្រចិត្ត។

អ្នកដែលបានបញ្ចប់កាតព្វកិច្ចយោធា ត្រូវក្លាយជាទ័ពបម្រុងរហូតដល់អាយុ៤៥ឆ្នាំ ហើយអាចត្រូវបានអញ្ជើញឱ្យបំពេញភារកិច្ចតាមការចាំបាច់របស់ប្រទេសជាតិ។

យុវជនដែលបំពេញកាតព្វកិច្ចយោធា នឹងទទួលបានប្រាក់ឧបត្ថម្ភចំនួន៤០ម៉ឺនរៀលក្នុងមួយខែ រួមជាមួយរបបផ្សេងៗទៀត ដូចជា ប្រាក់ម្ហូបប្រចាំថ្ងៃ ប្រាក់អាហារបំប៉នបន្ថែមពេលហ្វឹកហាត់ ប្រាក់បំណាច់ឧបត្ថម្ភគ្រួសារ និងកូន របបអង្ករប្រចាំថ្ងៃ និងរបបឯកសណ្ឋានប្រយុទ្ធ។

លើសពីនេះ យោធិនដែលមានជំងឺ ឬរងរបួស នឹងទទួលបានការសង្គ្រោះ ការព្យាបាល និងការថែទាំពីក្រសួងការពារជាតិ។ ច្បាប់នេះមានអត្ថប្រយោជន៍សំខាន់ៗចំនួន៣ គឺ ការពារជាតិ យុវជន និងគ្រួសារ ព្រមទាំងសង្គមជាតិ។

នៅថ្ងៃទី២ ខែតុលា ឆ្នាំ២០២៦ដដែលនេះ គឺជាថ្ងៃទី២ នៃការចាប់ផ្តើមអនុវត្តការងារបំពេញកាតព្វកិច្ចយោធា ប្រជាពលរដ្ឋខ្មែរទាំងពីរភេទ ដែលមានអាយុចាប់ពី១៨ ដល់២៥ឆ្នាំ បានស្ម័គ្រចិត្តបំពេញពាក្យសុំចូលបំពេញកាតព្វកិច្ចយោធា សម្រាប់ឆ្នាំ២០២៦ នៅតាមទីតាំងទទួលពាក្យ និងដាក់ពាក្យសុំចូលបំពេញកាតព្វកិច្ចយោធា ក្នុងមូលដ្ឋានកងរាជអាវុធហត្ថក្រុង ស្រុក ខណ្ឌ ទូទាំងប្រទេស៕