(ព្រះវិហារ)៖ លោកឧត្តមសេនីយ៍ទោ សួស សុខដារ៉ា ស្នងការនគរបាលខេត្តព្រះវិហារ នៅព្រឹកថ្ងៃទី០២ ខែតុលា ឆ្នាំ២០២៦ បានដឹកនាំលោក លោកស្រី ស្នងការរង នាយ-នាយរងការិយាល័យ និងកងកម្លាំងនគរបាល នៃស្នងការដ្ឋាននគរបាលខេត្តព្រះវិហារ ព្រមទាំងពុទ្ធបរិស័ទ ជិត ឆ្ងាយ ជួបជុំគ្នាប្រារព្ធពិធីរាប់បាត្រ និងនិមន្តព្រះសង្ឃបង្សុកូល ដើម្បីបង្ហើយបុណ្យកាន់បិណ្ឌវេនទី៦ នៅវត្តឦសាន្តគិរីសាមគ្គីមានជ័យ ហៅវត្តប្រយុទ្ធ ស្ថិតក្នុងភូមិហ្មសែត សង្កាត់ប៉ាលហាល ក្រុងព្រះវិហារ ខេត្តព្រះវិហារ។

ពិធីនេះបានប្រព្រឹត្តទៅក្នុងបរិយាកាសប្រកបដោយសេចក្តីជ្រះថ្លា និងសាមគ្គីភាព ដោយលោកឧត្តមសេនីយ៍ទោ សួស សុខដារ៉ា រួមជាមួយថ្នាក់ដឹកនាំ កងកម្លាំងនគរបាល និងពុទ្ធបរិស័ទ បានចូលរួមប្រគេនចង្ហាន់ និងទេយ្យទានដល់ព្រះសង្ឃ ព្រមទាំងធ្វើពិធីបង្សុកូល ឧទ្ទិសកុសលជូនដល់បុព្វការីជន និងញាតិការដែលបានចែកឋានទៅកាន់លោកខាងមុខ ក៏ដូចជាវីរនគរបាលជាតិ វីរកងទ័ព ដែលបានពលីជីវិតដើម្បីបុព្វហេតុការពារទឹកដី សូមបានរួចផុតចាកទុក្ខទោស និងបានដល់សុខគតិភពកុំបីឃ្លៀងឃ្លាតឡើយ។

ការចូលរួមក្នុងពិធីបុណ្យកាន់បិណ្ឌរបស់ថ្នាក់ដឹកនាំ និងកងកម្លាំងនគរបាលខេត្តព្រះវិហារ មិនត្រឹមតែបង្ហាញពីការរក្សា និងលើកតម្កើងប្រពៃណីវប្បធម៌ និងព្រះពុទ្ធសាសនារបស់ខ្មែរ ប៉ុណ្ណោះទេ ប៉ុន្តែក៏ជាឱកាសមួយសម្រាប់បង្កើនសាមគ្គីភាព និងភាពស្និទ្ធស្នាលរវាងកងកម្លាំងនគរបាល និងប្រជាពលរដ្ឋក្នុងមូលដ្ឋានផងដែរ។

សូមបញ្ជាក់ថា ពិធីបុណ្យកាន់បិណ្ឌ គឺជាប្រពៃណីព្រះពុទ្ធសាសនាដ៏សំខាន់មួយរបស់ប្រជាជនកម្ពុជា ដែលពុទ្ធបរិស័ទតែងតែជួបជុំគ្នាធ្វើបុណ្យ រាប់បាត្រ ប្រគេនចង្ហាន់ព្រះសង្ឃ និងឧទ្ទិសកុសលផលបុណ្យជូនដល់បុព្វការីជន និងញាតិមិត្តដែលបានទទួលមរណភាព។ ពិធីនេះក៏ជាការបង្ហាញពីការគោរពដឹងគុណចំពោះអ្នកមានគុណ និងការរក្សាប្រពៃណីដ៏ល្អផូរផង់របស់ជាតិខ្មែរ ឱ្យបន្តស្ថិតស្ថេរពីជំនាន់មួយទៅជំនាន់មួយផងដែរ៕