(ភ្នំពេញ)៖ ក្រុមហ៊ុន Seenergy Capital និងក្រុមហ៊ុន Foresight Construction បានប្រារព្ធព្រឹត្តិការណ៍ដ៏សំខាន់មួយគឺ «ពិធីប្រកាសភាពជាដៃគូយុទ្ធសាស្ត្រ និងចុះហត្ថលេខាលើកិច្ចសន្យាសាងសង់» ផ្លូវការ។ ពិធីនេះបានប្រព្រឹត្តទៅក្រោមអធិបតីភាពរបស់ លោកបណ្ឌិត ញឹម កលរស្មី និង លោកជំទាវអ្នកឧកញ៉ា អាង ដាណែត ដែលជាប្រធានក្រុមប្រឹក្សាភិបាលនៃក្រុមហ៊ុន Seenergy Capital ព្រមទាំង លោក មុត ភូមា អគ្គនាយកក្រុមហ៊ុន Foresight Construction។

ការចុះហត្ថលេខានេះធ្វើឡើងនៅថ្ងៃទី០២ ខែតុលា ឆ្នាំ២០២៦កន្លងទៅថ្មីៗនេះ គឺជាការបញ្ជាក់ពីចក្ខុវិស័យរួមរបស់ក្រុមហ៊ុនទាំងពីរ ក្នុងការលើកកម្ពស់ស្តង់ដារអចលនទ្រព្យ លំនៅឋាន និងអគារពាណិជ្ជកម្មក្នុងរាជធានីភ្នំពេញ។ ភាពជាដៃគូយុទ្ធសាស្ត្រនេះ នឹងផ្តោតជាពិសេសទៅលើការអភិវឌ្ឍគម្រោងអគារពហុបំណង Seenergy 7 Makara ដែលរំពឹងថានឹងក្លាយជាសមិទ្ធផលដ៏លេចធ្លោមួយទៀតនៅក្នុងវិស័យសំណង់ និងអចលនទ្រព្យកម្ពុជា។

ក្រុមហ៊ុន Seenergy Capital និង Foresight Construction បានថ្លែងអំណរគុណយ៉ាងជ្រាលជ្រៅចំពោះភ្ញៀវកិត្តិយស និងដៃគូទាំងអស់ ដែលបានអញ្ជើញចូលរួមជា សាក្សីក្នុងព្រឹត្តិការណ៍ដ៏មានអត្ថន័យនេះ។ តាមរយៈកិច្ចសហប្រតិបត្តិការដ៏រឹងមាំនេះ ក្រុមហ៊ុនទាំងពីរមានបំណងនាំមកនូវគម្រោងដែលមានគុណភាពខ្ពស់ និងប្រកបដោយភាពច្នៃប្រឌិត ដើម្បីរួមចំណែកដល់ការរីកចម្រើននៃទីក្រុងភ្នំពេញ។ សូមរង់ចាំតាមដានសមិទ្ធផលថ្មីៗនៃគម្រោងរបស់យើងទាំងអស់គ្នា៕