និស្សិតវិទ្យាស្ថានជាតិពហុបច្ចេកទេសអង្គរ ៣រូប ដណ្តើមបានមេដាយក្នុងការប្រកួតជំនាញថ្នាក់ជាតិលើកទី១០ ឆ្នាំ២០២៦
05-10-2026 21:25
(សៀមរាប)៖ និស្សិតរបស់វិទ្យាស្ថានជាតិពហុបច្ចេកទេសអង្គរ (NPIA) ចំនួន៣រូប ដណ្តើមបានមេដាយមាស ប្រាក់និងសំរិទ្ធិ និងមេដាយកិតិ្តយស ក្នុងការប្រកួតប្រជែងជំនាញថ្នាក់ជាតិ លើកទី១០ ឆ្នាំ២០២៦ ដែលធ្វើឡើងនៅថ្ងៃទី២៩ ខែកញ្ញា ដល់ថ្ងៃទី៣ ខែតុលា ឆ្នាំ២០២៦ នៅរាជធានីភ្នំពេញ។
លោកបណ្ឌិត ម៉ប់ ស៉ីនួន នាយកវិទ្យាស្ថានជាតិពហុបច្ចេកទេសអង្គរ បានបង្ហាញអារម្មណ៍រីករាយ និងមោទនភាព។ លោកបណ្ឌិតបន្តថា នេះគឺជាជោគជ័យដ៏ធំធេងដែលបេក្ខជនរបស់វិទ្យាស្ថាន បានដណ្ដើមជ័យលាភីពីការប្រកួតប្រជែងជំនាញថ្នាក់ជាតិ ឆ្នាំ២០២៦ ដែលរៀបចំដោយក្រសួងការងារ និងបណ្តុះបណ្តាលវិជ្ជាជីវៈ។ ការប្រកួតនេះ មានការចូលរួមពីបណ្តាសាកលវិទ្យាល័យ និងវិទ្យាស្ថាននានាទូទាំងប្រទេសកម្ពុជា។
លោកបណ្ឌិត បានចាត់ទុកសមិទ្ធផលដ៏ត្រចះត្រចង់នេះ គឺកើតចេញពីការខិតខំប្រឹងប្រែងហ្វឹកហាត់យ៉ាងសកម្មរបស់បេក្ខជន រួមផ្សំជាមួយនឹងការយកចិត្តទុកដាក់បង្ហាត់បង្រៀនយ៉ាងដិតដល់ពីសំណាក់លោកគ្រូ អ្នកគ្រូ ជំជំនាញរបស់វិទ្យាស្ថានកន្លងមក។ វិទ្យាស្ថានជាតិពហុបច្ចេកទេសអង្គរ គឺជាវិទ្យាស្ថានដែលមានគុណភាព និងមានភាពប្រកួតប្រជែងខ្ពស់ ដូច្នេះហើយ ទើបទទួលដណ្តើមបានមេដាយមាស ប្រាក់ សំរិទ្ធិ នាពេលនេះ។
នាយកវិទ្យាស្ថានជាតិពហុបច្ចេកទេសអង្គរ បានអំពាវនាវដល់និសិ្សតទាំងអស់ ត្រូវខិតខំប្រឹងប្រែងរៀនសូត្រ ដើម្បីបង្ហាញនូវលទ្ធផលគួរជាទីមោទននេះ ជាពិសេស បានបង្ហាញពីសមត្ថភាព និងគុណភាពនៃការបណ្តុះបណ្តាលរបស់វិទ្យាស្ថាន។ ដូច្នេះហើយ ទើបសាធារណៈជន ក៏ដូចជាវិស័យឯកជននានា បានមើលឃើញពីសមត្ថភាពរបស់ប្អូនៗ ដែលសិក្សានៅវិទ្យាស្ថានជាតិពហុបច្ចេកទេសអង្គរ ពិតជាមានគុណភាព និងសមត្ថភាពនៃការបណ្តុះបណ្តាល។
លោកបណ្ឌិត ក៏បានសម្តែងនូវការអបអរសាទរចំពោះជ័យលាភីឆ្នើមទាំង៣រូប ដែលបានខិតខំប្រឹងប្រែងរហូតដណ្តើមបានមេដាយមាស ប្រាក់ សំរិទ្ធិ និងកិត្តិយសក្នុង «ការប្រកួតប្រជែងជំនាញថ្នាក់ជាតិ លើកទី១០ ឆ្នាំ២០២៦»។
ជ័យលាភីទាំងនោះរួមមាន៖ ទី១ មេដាយមាស និស្សិតឈ្មោះ ពុទ្ធី នារីរត្ន ជំនាញ Digital Construction, ទី២ មេដាយប្រាក់ និស្សិតឈ្មោះ រ៉ាក់វ៉ាន់ប្រាក់ខូន ខាត់ឌីយ៉ា ជំនាញ Digital Construction និងមេដាយសំរិទ្ធិ បានទៅនិស្សិតឈ្មោះ រម្យ គឹមអេង និងនិស្សិត សន សារ៉ូ ជំនាញ Mechatronic។
សូមបញ្ជាក់ថា បេក្ខជនជ័យលាភី នឹងតំណាងប្រទេសកម្ពុជា ដើម្បីឡើងបន្តទៅប្រកួតនៅអាស៊ានបន្តទៀតផងដែរ៕
