(ក្រចេះ)៖ នៅរសៀល ថ្ងៃទី០៥ ខែតុលា ឆ្នាំ២០២៦ មានករណីបាក់ស្រុតដី និងច្រាំងទន្លេយ៉ាងធ្ងន់ធ្ងរមួយបានកើតឡើងនៅភូមិព្រែកសណ្តាយ ឃុំព្រែកសាម៉ាន់ ស្រុកឆ្លូង ខេត្តក្រចេះ។ ហេតុការណ៍នេះបានបណ្តាលឲ្យផ្ទះប្រជាពលរដ្ឋមួយខ្នងធ្លាក់ចូលទៅក្នុងទន្លេ និងរងការខូចខាតទាំងស្រុង។

ក្រោយទទួលបានព័ត៌មានភ្លាម លោកស្រី គង់ លឹមហូ អភិបាលស្រុកឆ្លូង បានដឹកនាំកម្លាំងអាជ្ញាធរមូលដ្ឋាន និងផ្នែកពាក់ព័ន្ធ ចុះពិនិត្យស្ថានភាពជាក់ស្តែង និងចាត់វិធានការអន្តរាគមន៍ជាបន្ទាន់។

លោកស្រីអភិបាលស្រុកបានបញ្ជាក់ថា ដីច្រាំងទន្លេបានស្រុតបាក់ចូលមកផ្លូវបេតុងប្រវែង ៥០ម៉ែត្រ ទទឹង ៥ម៉ែត្រ និងមានជម្រៅប្រមាណ ៨៨ម៉ែត្រ។ ចំណែកផ្ទះដែលរងការខូចខាតនោះ ពុំមានមនុស្សរស់នៅ និងគ្មានសម្ភារៈឡើយ ដូច្នេះមិនមានគ្រោះថ្នាក់ដល់អាយុជីវិតមនុស្សទេ។

ជាមួយគ្នានេះ អាជ្ញាធរបានជម្លៀសប្រជាពលរដ្ឋចំនួន ៧គ្រួសារ សរុប ៣៦នាក់ ដែលមានផ្ទះនៅជាប់តំបន់គ្រោះថ្នាក់ ទៅស្នាក់នៅបណ្តោះអាសន្នជាមួយសាច់ញាតិ ដើម្បីធានាសុវត្ថិភាព។ បច្ចុប្បន្ន
អាជ្ញាធរស្រុកបានសម្រេចបិទចរាចរណ៍ជាបណ្ដោះអាសន្ន នៅលើកំណាត់ផ្លូវដែលរងការស្រុតបាក់នោះ ព្រមទាំងបានអំពាវនាវដល់ប្រជាពលរដ្ឋដែលរស់នៅក្បែរទីតាំងកើតហេតុ ត្រូវបន្តបង្កើនការប្រុងប្រយ័ត្នខ្ពស់ ដើម្បីចៀសវាងគ្រោះថ្នាក់ផ្សេងៗជាយថាហេតុ៕