(សៀមរាប)៖ លោក ហួត ហាក់ រដ្ឋមន្ត្រីក្រសួងទេសចរណ៍ បានដឹកនាំមហាគ្រួសារវិស័យទេសចរណ៍ អញ្ជើញចុះសួរសុខទុក្ខ សំណេះសំណាល និងនាំយកអំណោយដ៏ថ្លៃថ្លារបស់លោក ហ៊ុន ម៉ាណែត នាយករដ្ឋមន្ត្រី និងលោកស្រីបណ្ឌិត ជូននាយទាហាន នាយទាហានរង និងពលទាហាន នៃយោធភូមិភាគទី៤ ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ឆ្នាំ២០២៦។

ពិធីនេះធ្វើឡើងនៅព្រឹកថ្ងៃទី៦ ខែតុលា ឆ្នាំ២០២៦ នៅបញ្ជាការដ្ឋានយោធភូមិភាគទី៤ ខេត្តសៀមរាប ដោយមានការចូលរួមពីលោក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ លោក សំកុល សុចិត្រា អភិបាលរងខេត្ត តំណាងលោក ប្រាក់ សោភ័ណ អភិបាលខេត្តសៀមរាប ថ្នាក់ដឹកនាំ និងមន្ត្រីក្រសួងទេសចរណ៍ គ្រឹះស្ថានអង្គរ អាជ្ញាធរជាតិអប្សរា ព្រមទាំងនាយទាហាន នាយទាហានរង និងពលទាហាន នៃយោធភូមិភាគទី៤ សរុបប្រមាណ ៥០០នាក់។

ក្នុងឱកាសនេះ លោក ហួត ហាក់ បានថ្លែងអំណរគុណដល់លោក ពៅ ហេង ដែលបានផ្តល់ទីតាំង និងកិច្ចសហការរៀបចំឱ្យមហាគ្រួសារវិស័យទេសចរណ៍ បានចុះសួរសុខទុក្ខ និងសំណេះសំណាលជាមួយកងទ័ពនៃយោធភូមិភាគទី៤។

លោករដ្ឋមន្ត្រី បានគូសរំលេចពីគុណបំណាច់ និងគំរូវីរភាពរបស់លោក ហ៊ុន សែន ដែលបានយកជីវិតធ្វើជាដើមទុន ដើម្បីប្តូរយកសុខសន្តិភាពជូនប្រទេស និងប្រជាជន តាមរយៈការដាក់ចេញនូវ «នយោបាយឈ្នះ-ឈ្នះ» ដែលបាននាំមកនូវការបង្រួបបង្រួមជាតិ និងការឯកភាពទឹកដីពេញលេញ។

លោក ហួត ហាក់ ក៏បានសម្តែងការគោរព និងដឹងគុណយ៉ាងជ្រាលជ្រៅចំពោះថ្នាក់ដឹកនាំគណបក្សប្រជាជនកម្ពុជាគ្រប់ជំនាន់ ជាពិសេសកងយោធពលខេមរភូមិន្ទ និងកងកម្លាំងប្រដាប់អាវុធគ្រប់ប្រភេទ ដែលបានលះបង់សាច់ស្រស់ ឈាមស្រស់ និងធ្វើពលីកម្មគ្រប់បែបយ៉ាង ដើម្បីការពារអធិបតេយ្យជាតិ បូរណភាពទឹកដី ឯករាជ្យជាតិ និងសន្តិភាពជូនមាតុភូមិ និងប្រជាជន។

លោករដ្ឋមន្ត្រី បានបញ្ជាក់ថា លោក ហ៊ុន សែន និងលោក ហ៊ុន ម៉ាណែត បានណែនាំឱ្យគ្រប់ក្រសួង ស្ថាប័ន យកចិត្តទុកដាក់ចុះជួប និងសួរសុខទុក្ខដោយផ្ទាល់ដល់កងទ័ពដែលកំពុងឈរជើងការពារសន្តិសុខ និងសុខសន្តិភាពជូនប្រជាជននៅទូទាំងប្រទេស។

ជាក់ស្តែង ក្នុងឱកាសបុណ្យកាន់បិណ្ឌ និងភ្ជុំបិណ្ឌឆ្នាំនេះ មហាគ្រួសារវិស័យទេសចរណ៍ បាននាំយកអំណោយ និងថវិកាជូនដល់បញ្ជាការដ្ឋានយោធភូមិភាគទី៤ និងកងទ័ពដែលកំពុងបំពេញភារកិច្ចការពារទឹកដី ដោយសារភារកិច្ចរបស់ពួកគាត់មិនទាន់អាចវិលត្រឡប់ទៅជួបជុំគ្រួសារនៅស្រុកកំណើតបាន។

សម្រាប់អំណោយដែលនាំយកជូនក្នុងឱកាសនេះ រួមមាន៖ ថវិកាចំនួន ១០លានរៀល ជូនបញ្ជាការដ្ឋានយោធភូមិភាគទី៤, ថវិកាជូននាយទាហាន នាយទាហានរង និងពលទាហានដែលមានវត្តមានចំនួន ២៩០រូប ក្នុងម្នាក់ៗទទួលបាន ៥ម៉ឺនរៀល, អង្ករចំនួន ៣តោន, មីចំនួន ១០០កេស, ត្រីខខ្មែរចំនួន ៥កេសធំ ស្មើនឹង ៥០យួរ, ទឹកត្រី ១០០យួរ, ទឹកស៊ីអ៊ីវ ១០០យួរ, ទឹកសុទ្ធ ២១០កេស, ទឹកក្រូច ៤០០កេស និងសម្ភារៈផ្សេងៗ រួមមាន តង់ មុង ពិល ភួយ ធុងទឹក ម្សៅទឹកដោះគោ កាហ្វេ និងសម្ភារៈចាំបាច់មួយចំនួនទៀត។

លោក ហួត ហាក់ បានបញ្ជាក់ថា ការចុះសួរសុខទុក្ខ និងនាំអំណោយជូនកងទ័ពនេះ គឺជាស្មារតីនៃមហាគ្រួសារខ្មែរ និងជាការបង្ហាញពីការយកចិត្តទុកដាក់ ចំពោះវីរកងទ័ពដែលកំពុងបំពេញភារកិច្ចការពារជាតិ និងរក្សាសន្តិភាពជូនប្រជាជន៕