(កំពត)៖ លោក អ៉ឹម ច័ន្ទសោធន អភិបាលស្រុកទឹកឈូ អនុប្រធានសហភាពសហព័ន្ធយុវជនកម្ពុជាខេត្តកំពត និងជាប្រធានសហភាពសហព័ន្ធយុវជនកម្ពុជាស្រុកទឹកឈូ នៅថ្ងៃពុធ ទី៧ ខែតុលា ឆ្នាំ២០២៦ បានដឹកនាំក្រុមគ្រួសារសហភាពសហព័ន្ធយុវជនកម្ពុជាស្រុក ចូលរួមវេចនំអន្សមខ្មែរ ដើម្បីថែរក្សាវប្បធម៌ជាតិ ព្រមទាំងពិសារអាហារថ្ងៃត្រង់ជុំគ្នាប្រកបដោយសាមគ្គីភាព មុនពេលរដូវភ្ជុំបិណ្ឌចូលមកដល់។

ពិធីដ៏មានអត្ថន័យនេះ បានប្រព្រឹត្តទៅនៅសាលាស្រុកទឹកឈូ។

លោក អ៉ឹម ច័ន្ទសោធន បានលើកឡើងថា សកម្មភាព «វេចនំអន្សមខ្មែរ ថែវប្បធម៌ជាតិ» នេះ មិនត្រឹមតែជាការជួបជុំគ្រួសារ ស.ស.យ.ក ស្រុកប៉ុណ្ណោះទេ ប៉ុន្តែថែមទាំងមានអត្ថន័យយ៉ាងជ្រាលជ្រៅ ដែលឆ្លុះបញ្ចាំងអំពីការថែរក្សា ការពារ និងលើកស្ទួយអត្តសញ្ញាណវប្បធម៌ និងប្រពៃណីទំនៀមទម្លាប់ខ្មែរតាំងពីបុរាណកាលមក។ លោកបានបន្តទៀតថា ការរៀបចំវេចនំអន្សម ព្រមទាំងអាហារជួបជុំគ្នានេះ គឺជាការឧបត្ថម្ភគាំទ្រទាំងស្រុងពីលោក ព្រំ សៅរិទ្ធិ សមាជិកអចិន្ត្រៃយ៍ ស.ស.យ.ក ស្រុកទឹកឈូ។

ពិធីនេះបានបង្ហាញពីការប្តេជ្ញាចិត្តរបស់ថ្នាក់ដឹកនាំ និងសមាជិក ស.ស.យ.ក ស្រុកទឹកឈូ ក្នុងការចូលរួមចំណែកយ៉ាងសកម្មក្នុងការអភិរក្ស និងលើកកម្ពស់តម្លៃវប្បធម៌ជាតិ ពិសេសក្នុងឱកាសបុណ្យភ្ជុំបិណ្ឌ ដែលជាបុណ្យប្រពៃណីដ៏សំខាន់របស់ខ្មែរ៕