(សៀមរាប)៖ វិទ្យា​ស្ថាន​ជាតិពហុ​បច្ចេកទេស​អង្គរ (NPIA) នៅថ្ងៃទី៨ ខែតុលា ឆ្នាំ២០២៦ បានរៀបចំពិធីវេចនំអន្សមសាមគ្គី ឆ្នាំ២០២៦ ដើម្បីផ្សារភ្ជាប់រវាងវប្បធម៌ និងបច្ចេកទេស។ ជាពិសេសក្នុងគោលបំណងដើម្បីឲ្យសិស្ស និស្សិត បានចេះពីបច្ចេកទេសផង និងយល់ដឹងពីវប្បធម៌ ប្រពៃណីរបស់ខ្មែរផង។

លោកស្រី សេង កនិកា នាយិការង នៃវិទ្យា​ស្ថាន​ជាតិពហុ​បច្ចេកទេស​អង្គរ បានឲ្យដឹងថា នេះជាឆ្នាំទី២ហើយ ដែលវិទ្យា​ស្ថាន​រៀបចំពិធីវេចនំអន្សមសាមគ្គីនេះឡើង។ លោកស្រីបន្តថា នៅក្នុងឆ្នាំនេះមានសិស្ស និស្សិតប្រមាណជាង២០០នាក់ចូលរួម និងចែកជា ១២ក្រុម ដែលសិស្ស និស្សិតទាំងអស់ គឺមកពីគ្រប់ជំនាញនៅក្នុងវិទ្យាស្ថាន។ ក្នុងនោះ ក៏មានអ្នកជំនាញវេចនំអន្សម រួមជាមួយគ្រូៗមួយចំនួនជួយបង្ហាត់បង្រៀនផងដែរ។

លោកស្រី បានបន្តថា ក្រោយពីវេចនំអន្សមរួច ក៏មានការប្រកួតប្រជែង ក្នុងចំណោម ១២ក្រុម នឹងរជ្រើសរើសយក៣ក្រុម ដោយយកលេខ ១, ២ និង៣ ក្រុមដែលវេចនំអន្សមបានស្អាត និងមានភាពទាក់ទាញ ទទួលបានរង្វាន់ដើម្បីលើកទឹកចិត្ត។ ដោយឡែក ចំពោះនំអន្សមដែលចម្អិនរួច មួយចំនែកយកទៅវត្ត និងមួយចំណែកទៀតចែកតាមការិយាល័យ និងសិស្ស និស្សិតបរិភោគ។

អ្នកស្រី ណៃ ណាគ្រី ដែលជាសិក្ខាកាមកំពុងសិក្សានៅវិទ្យា​ស្ថាន​ជាតិពហុ​បច្ចេកទេស​អង្គរ (ផ្នែកនំ) បានឲ្យដឹងថា នេះជាលើកទីដំបូងដែលបានចូលរួមវេចនំអន្សមនេះ។ ការវេចនេះ បានផ្តល់ផលប្រយោជន៍​ជាច្រើនដល់យុវជនយុវតី ព្រោះបានយល់ដឹងពីរបៀបវេចនំអន្សម ដែលជានំប្រពៃណីរបស់ខ្មែរយើងជាយូរលង់មក ដែលយើងជាកូនខ្មែរគួរនាំគ្នាចេះវេចឱ្យបានគ្រប់ៗគ្នា ដើម្បីថែរក្សាមរតកនេះទុក។

អ្នកស្រីបានបន្តថា ការវេចនំអន្សមខ្មែរមិនមែនចេះតែវេចៗនោះទេ គឺមានបច្ចេកទេស និងរបៀបវេចទាំងការរៀបចំស្លឹកចេក បាយដំណើប ចេក និងស្នួល ធ្វើយ៉ាងណាឲ្យមានមានសោភ័ណខាងក្រៅ និងរសជាតិឆ្ងាញ់។

ជាមួយនេះ អ្នកស្រី ណាគ្រី បញ្ជាក់ថា អ្នកស្រីនឹងរៀនពីការវេចនំអន្សមបន្ថែមទៀត ដើម្បីបង្ហាត់បង្រៀនពីការវេចនំអន្សមនេះតទៅដល់ក្មេងៗជំនាន់ក្រោយ ឲ្យបានយល់ដឹង​ពីការវេចនំអន្សមរបស់ខ្មែរ។ ក្មេងៗជំនាន់ក្រោយ គាត់មិនសូវយល់ដឹងពីការវេចនំរបស់ខ្មែរយើងនោះទេ ដឹងតែទិញស្រាប់នៅផ្សារ៕