(តាកែវ)៖ នាព្រឹកថ្ងៃទី៨ ខែតុលា ឆ្នាំ២០២៦ លោក វ៉ី សំណាង អភិបាលខេត្តតាកែវ បានអញ្ជើញចូលរួមកាន់បិណ្ឌវេនទី១២ នៅវត្តលឹមពូលស្យារាម ស្ថិតក្នុងសង្កាត់រកាក្នុង ក្រុងដូនកែវ។ ក្នុងឱកាសដ៏សំខាន់នេះ លោកអភិបាលខេត្តបានធ្វើការបួងសួង និងឧទ្ទិសកុសលផលបុណ្យដល់វិញ្ញាណក្ខន្ធវីរៈកងទ័ពទាំងអស់ ដែលបានពលីជីវិតនៅសមរភូមិមុខ ដើម្បីបុព្វហេតុការពារបូរណភាពទឹកដី និងរក្សាបាននូវសុខសន្តិភាពជូនជាតិមាតុភូមិ។

ថ្លែងទៅកាន់បងប្អូនប្រជាពលរដ្ឋពុទ្ធបរិស័ទដែលបានចូលរួមក្នុងពិធីបុណ្យកាន់បិណ្ឌវេនទី១២ លោកអភិបាលខេត្តតាកែវ បានគូសបញ្ជាក់ពីគុណូបការៈដ៏ធំធេងរបស់វីរៈកងទ័ព ដែលបានបូជាសាច់ស្រស់ឈាមស្រស់ និងអាយុជីវិត ដើម្បីការពារជាតិមាតុភូមិពីការឈ្លានពានរបស់សត្រូវ។ ពលិកម្មដ៏អង់អាចក្លាហាននេះ ត្រូវបានប្រជាពលរដ្ឋទូទាំងប្រទេសចងចាំ និងគោរពដឹងគុណជានិច្ចចំពោះគុណបំណាច់ដ៏ថ្លៃថ្លារបស់វីរៈកងទ័ពជួរមុខរបស់យើង។

ជាមួយគ្នានេះ លោក វ៉ី សំណាង ក៏បានលើកឡើងពីការប្ដេជ្ញាចិត្តរបស់បងប្អូនប្រជាពលរដ្ឋក្នុងខេត្តតាកែវទាំងអស់ ដែលនៅតែបន្តរួមសាមគ្គីគ្នាជាមួយរាជរដ្ឋាភិបាល ផ្សារភ្ជាប់ និងផ្ដល់ការគាំទ្រដល់កងកម្លាំងប្រដាប់អាវុធ ដើម្បីពង្រឹងខឿនការពារជាតិឱ្យកាន់តែរឹងមាំ។

ជាពិសេស គឺការគាំទ្រដល់វីរៈកងទ័ពរបស់យើង ដែលកំពុងការពារបូរណភាពទឹកដីនៅតាមខ្សែបន្ទាត់ព្រំដែនជាមួយប្រទេសសៀម ប្រកបដោយជំហរលះបង់ និងការប្ដេជ្ញាចិត្តយ៉ាងមោះមុតបំផុតជូនជាតិមាតុភូមិ។ ការចូលរួមកាន់បិណ្ឌនេះ មិនត្រឹមតែជាការបំពេញបុណ្យតាមប្រពៃណីប៉ុណ្ណោះទេ ថែមទាំងជាការបង្ហាញនូវស្មារតីដឹងគុណ និងការបន្តគាំទ្រដល់កិច្ចការពារជាតិផងដែរ៕