(ភ្នំពេញ)៖ សម្តេចរាជបុត្រីព្រះអនុជ នរោត្តម អរុណរស្មី ឧត្តមប្រឹក្សាផ្ទាល់ព្រះមហាក្សត្រ និងសម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានយាង និងអញ្ជើញចូលរួមជាអធិបតីដ៏ខ្ពង់ខ្ពស់ ក្នុងពិធីវេនកាន់បិណ្ឌទី១២ នៅវត្តមុន្នីសុវណ្ណ ហៅវត្តចំពុះក្អែក ស្ថិតនៅភូមិចំពុះក្អែក សង្កាត់ព្រែកថ្មី ខណ្ឌមានជ័យ រាជធានីភ្នំពេញ នាព្រឹកថ្ងៃព្រហស្បតិ៍ ១២រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៨ ខែតុលា ឆ្នាំ២០២៦។

ក្នុងឱកាសនោះ សម្តេចកិត្តិសង្គហបណ្ឌិត ម៉ែន សំអន, លោកជំទាវអគ្គមហាឧបាសិកាពុទ្ធសាសនូបត្ថម្ភក៍ សទ្ធាលក្ខិណានុវឌ្ឍសិរី ហង់ ភារី អ៊ឹមសិទ្ធី, លោកជំទាវអគ្គមហាឧបាសិកាពុទ្ធសាស នូបត្ថម្ភក៍ ករុណាភិរ័ក្ខសីលវិសុទ្ធិ ឡៅ គឹមណៃ លីគឹមហាន, មហាឧបាសកពុទ្ធសាសនូបត្ថម្ភក៍ ឈី ឃាងសេង, មហាឧបាសិកាពុទ្ធសាសនូបត្ថម្ភក៍ គួច លាងប៊ួយ បានអញ្ជើញអុជទានធូប បូជាផ្កាភ្ញី ថ្វាយ និងបួងសួងរំលឹកដល់គុណព្រះពុទ្ធ ព្រះធម៌ និងព្រះសង្ឃ មុននឹងចាប់ផ្ដើមនមស្សការព្រះរតនត្រៃ បន្ទាប់មកក៏បានរាប់បាត្រជាកិច្ចបង្ហើយបុណ្យ។

គួររំលឹកថា វេនកាន់បិណ្ឌទី១២នេះ ជាវេនរបស់លោកស្រីអគ្គមហាឧបាសិកាពុទ្ធសាសនូបត្ថម្ភក៍ សទ្ធាលក្ខិណានុវឌ្ឍសិរី ហង់ ភារី អ៊ឹមសិទ្ធី, លោកស្រីអគ្គមហាឧបាសិកាពុទ្ធសាសនូបត្ថម្ភក៍ករុណា ភិររ័ក្ខសីលវិសុទ្ធិ ឡៅ គឹមណៃ លីគឹមហាន, មហាឧបាសកពុទ្ធសាសនូបត្ថម្ភក៍ ឈី ឃាងសេង និងមហាឧបាសិកាពុទ្ទសាសនូបត្ថម្ភក៍ គួច លាងប៊ួយ ព្រមទាំងលោកអ្នកឧកញ៉ា អ្នកឧកញ៉ា លោក លោកស្រី និងពុទ្ធបរិស័ទចំណុះជើងវត្ត បានប្រារព្ធពិធីជារៀងរាល់ឆ្នាំ។

ពិធីកាន់បិណ្ឌ និងភ្ជុំបិណ្ឌ ជាពិធីបុណ្យប្រពៃណីចម្បងមួយរបស់ជាតិក្នុងព្រះពុទ្ធសាសនា ប្រជាពលរដ្ឋជាពុទ្ធបរិស័ទកម្ពុជាគ្រប់ស្រទាប់វណ្ណៈ មានចិត្តអំណរសាទរយ៉ាងស្រុះស្រួល និងសាមគ្គីគ្នាធ្វើបុណ្យធ្វើទានដោយ សេចក្តីជ្រះថ្លាក្នុងការកាន់បិណ្ឌនេះ នៅតាមទីវត្តអារាមនានា ដើម្បីទទួលយកនូវកុសលផលបុណ្យរៀងៗខ្លួន និងជាការរួមចំណែកលើកស្ទួយ ក៏ដូចជាតម្កើងវិស័យព្រះពុទ្ធសាសនាឱ្យកាន់តែរីកចម្រើនសុះសាយផងដែរ។ ប្រជាពលរដ្ឋភាគច្រើនបានយកម្ហូបអាហារ និងផ្លែឈើ នំចំណីទៅប្រគេនដល់ព្រះសង្ឃ នៅតាមវត្តអារាម ពិធីបុណ្យភ្ជុំបិណ្ឌ តែងប្រារព្ធឡើងនៅរៀងរាល់ខែភទ្របទ នៅថ្ងៃ១ រោច រហូតដល់វេលា ១៥រោច ដែលគុណគូ ទៅតាមប្រតិទិន នៃចន្ទគតិ ដែលជាថ្ងៃឆ្លងបញ្ចប់ ឬគេហៅថា ថ្ងៃបុណ្យភ្ជុំបិណ្ឌ៕