(ភ្នំពេញ)៖ លោកសាស្ត្រាចារ្យ គង់ សន្យា អគ្គនាយកមន្ទីរពេទ្យកាល់ម៉ែត នៅថ្ងៃទី៨ ខែតុលា ឆ្នាំ២០២៦នេះ បានបន្ដដឹកនាំមន្ដ្រី បុគ្គលិក ក្រុមគ្រូពេទ្យទាំងអស់ ចូលរួមសូត្រមន្ដ រាប់បាត្រ បង្សុកូល និងប្រគេនចង្ហាន់ ទេយ្យទាន ដល់ព្រះសង្ឃ ដើម្បីឧទ្ទិសកុសលផលបុណ្យជូនដល់ដួងវិញ្ញាណក្ខន្ធជីដូនជីតា ញាតិកាទាំង៧សន្តាន ដែលបានចែកឋានទៅ និងដួងវិញ្ញាណក្ខន្ធវីរយុទ្ធជនដែលបានបូជាសាច់ស្រស់ឈាមស្រស់ការពារបូរណភាពទឹកដី ។

ការរៀបចំពិធីបុណ្យសូត្រមន្តបង្សកុលឧទ្ទិសកុសល ប្រគេនចង្ហាន់ ទេយ្យទានដល់ព្រះសង្ឃ ក្នុងឱកាសពិធីបុណ្យភ្ជុំបិណ្ឌ គឺតែងតែរៀបចំឡើងជារៀងរាល់ថ្ងៃ មិនដែលដាច់នោះឡើយ ក្រៅពីឧទ្ទិសកុសលផលបុណ្យ ជូនដល់អ្នកដែលបានចែកឋានទៅ ក៏ដើម្បីបួងសួងសុំឱ្យអ្នកជំងឺ ដែលកំពុងសម្រាកព្យាបាល នៅក្នុងមន្ទីរពេទ្យកាល់ម៉ែត សូមឱ្យពួកគាត់ឆាប់បានជាសះស្បើយ ចេញពីមន្ទីរពេទ្យវិលត្រឡប់ទៅផ្ទះវិញ។

លោកសាស្ត្រាចារ្យ គង់ សន្យា ក៏បានគូសបញ្ជាក់ថា ក្នុងឱកាសពិធីបុណ្យភ្ជុំបិណ្ឌនេះ ក៏មិនខុសពីឆ្នាំមុនៗផងដែរ មន្ទីរពេទ្យគឺបានរៀបចំផែនការ ដើម្បីត្រៀមលក្ខណៈ២៤ម៉ោងលើ២៤ម៉ោង ក្នុងការបម្រើសេវាសុខាភិបាលជូនអ្នកជំងឺ ដែលអញ្ជើញមកព្យាបាល នៅក្នុងមន្ទីរពេទ្យ ហើយក្នុងករណីមានហេតុការណ៍ណាមួយកើតឡើង លើសពីការងារប្រចាំថ្ងៃ គឺអាចអញ្ជើញគ្រូពេទ្យមកបន្ថែមទៀត។ ជាងនេះទៅទៀតលោកសាស្ដ្រាចារ្យ បានអំពាវនាវដល់អ្នកប្រជាពលរដ្ឋទាំងអស់ ថែរក្សាសុខភាព និងអនាម័យខ្ពស់ ដើម្បីចៀសផុតពីជំងឺផ្សេងៗ ពិសេសការពុលអាហារ និងស្រាជាដើម។

សូមជម្រាបថា បុណ្យភ្ជុំបិណ្ឌ ជាពិធីបុណ្យមួយដែលធំជាងគេ នៅក្នុងចំណោមពិធីបុណ្យទាំងអស់ ចំពោះអ្នកកាន់ព្រះពុទ្ធសាសនា។ ជារៀងរាល់ឆ្នាំនៅពេលដល់ថ្ងៃខែ ដែលត្រូវប្រារព្ ពិធីបុណ្យភ្ជុំបិណ្ឌ គ្រប់បងប្អូនកូនចៅ សាច់ញាតិសន្ដានទាំងអស់ ទោះនៅទីជិត ឬទីឆ្ងាយ តែងតែធ្វើដំណើរទៅជួបជុំគ្នា ជាពិសេសឪពុកម្ដាយនៅស្រុកកណើត ដើម្បីរៀបចំម្ហូបអាហារ បាយសម្ល ចង្ហាន់យកទៅប្រគេនព្រះសង្ឃ ដែលគង់នៅវត្តអារាម។ ទាំងនេះ គឺជាទម្លាប់មួយដែលគេនិយមធ្វើតៗគ្នា របស់ជនជាតិខ្មែរជាយូរមកហើយ។

សូមជម្រាបថាបុណ្យភ្ជុំបិណ្ឌ ជាពិធីបុណ្យមួយដែលធំជាងគេ នៅក្នុងចំណោមពិធីបុណ្យទាំងអស់ ចំពោះអ្នកកាន់ព្រះពុទ្ធសាសនា។ ជារៀងរាល់ឆ្នាំនៅពេលដល់ថ្ងៃខែ ដែលត្រូវប្រារព្ធ ពិធីបុណ្យភ្ជុំបិណ្ឌ គ្រប់បងប្អូនកូនចៅ សាច់ញាតិសន្ដានទាំងអស់ ទោះនៅទីជិត ឬទីឆ្ងាយ តែងតែធ្វើដំណើរទៅជួបជុំគ្នា ជាពិសេសឪពុកម្ដាយនៅស្រុកកណើត ដើម្បីរៀបចំម្ហូបអាហារ បាយសម្ល ចង្ហាន់យកទៅប្រគេនព្រះសង្ឃ ដែលគង់នៅវត្តអារាម។ ទាំងនេះ គឺជាទម្លាប់មួយដែលគេនិយមធ្វើតៗគ្នា របស់ជនជាតិខ្មែរជាយូរមកហើយ។ ពិធីបុណ្យកាន់បិណ្ឌ និងភ្ជុំបិណ្ឌឆ្នាំ២០២៦នេះ ប្រព្រឹត្តទៅចាប់ពីថ្ងៃ១រោច ដល់ថ្ងៃ ១៥រោច ខែភទ្របទ ត្រូវនឹងថ្ងៃទី២៧ ខែកញ្ញាដល់ថ្ងៃទី១២ ខែតុលា៕