(កំពត)៖ លោក ជីវ ចាន់តារា ព្រះរាជអាជ្ញានៃអយ្យការអមសាលាដំបូងខេត្តកំពត នៅព្រឹកថ្ងៃទី៨ ខែតុលា ឆ្នាំ២០២៦ ត្រូវនឹងថ្ងៃកាន់បិណ្ឌវេនទី១២ នៃពិធីបុណ្យភ្ជុំបិណ្ឌ បានដឹកនាំសហការី បាននាំយកទេយ្យទាន សម្ភារៈបរិក្ខារ គ្រឿងឧបភោគបរិភោគ និងបច្ច័យមួយចំនួន ទៅវេរប្រគេនជូនដល់ព្រះសង្ឃដែលកំពុងគង់ចាំព្រះវស្សាអស់ត្រីមាស នៅវត្តជយមង្គលារាម ហៅ វត្តវាលពួច ស្ថិតក្នុងភូមិទទឹងថ្ងៃ សង្កាត់បឹងទូក ក្រុងបូកគោ ខេត្តកំពត។

ពិធីប្រគល់ និងវេរទេយ្យទាននេះ ត្រូវបានរៀបចំឡើងយ៉ាងកក់ក្តៅ និងពេញដោយសទ្ធាជ្រះថ្លា ដោយមានការចូលរួមពីសំណាក់មន្ត្រីរាជការនៃអយ្យការអមសាលាដំបូងខេត្តកំពត និងពុទ្ធបរិស័ទ្ធចំណុះជើងវត្តយ៉ាងច្រើនកុះករ ដើម្បីរួមចំណែកទ្រទ្រង់ដល់ជីវភាពប្រចាំថ្ងៃរបស់ព្រះសង្ឃដែលកំពុងប្រតិបត្តិធម៌វិន័យក្នុងកំឡុងពេលចូលព្រះវស្សា។

នៅក្នុងឱកាសនោះលោក ជីវ ចាន់តារា បានគូសបញ្ជាក់ថា សកម្មភាពសប្បុរសធម៌ និងការបំពេញកុសលនាពេលនេះ គឺជាការចូលរួមចំណែកយ៉ាងសំខាន់ជាមួយរាជរដ្ឋាភិបាល ក្នុងការលើកស្ទួយវិស័យព្រះពុទ្ធសាសនា ដែលជាសាសនារបស់រដ្ឋ ឱ្យកាន់តែចម្រើនរុងរឿង។

បន្ថែមពីនេះ ការធ្វើបុណ្យទានក្នុងរដូវកាលនេះ ក៏ជាការថែរក្សា និងពង្រឹងនូវប្រពៃណី ទំនៀមទម្លាប់ និង វប្បធម៌ដ៏ល្អផូរផង់របស់ដូនតាខ្មែរយើង តាំងពីបុរាណកាលមក ក្នុងការសម្តែងនូវកតញ្ញូកតវេទិតាធម៌ចំពោះបុព្វការីជន និងញាតិសន្តានទាំងប្រាំពីរសន្តានដែលបានចែកឋានទៅកាន់លោកខាងមុខ។

ក្នុងបរិយាកាសប្រកបដោយសេចក្តីសោមនស្សរីករាយ ព្រះចៅអធិការ និងព្រះសង្ឃគ្រប់ព្រះអង្គ​គង់ចាំព្រះវស្សានៅវត្តជយមង្គលារាម បានសម្តែងនូវព្រះអរគុណយ៉ាងជ្រាលជ្រៅចំពោះ លោក ជីវ ចាន់តារា ព្រមទាំងសហការី ទាំងអស់ ដែលតែងតែយកចិត្តទុកដាក់ និងផ្តល់សទ្ធាជ្រះថ្លាចំពោះព្រះពុទ្ធសាសនាផងដែរ៕