(ភ្នំពេញ)៖ នាយករដ្ឋមន្ត្រីវៀតណាម លោក ឡេ មិញ ហ៊ឹង បានអញ្ជើញដល់ប្រទេស​កម្ពុជា​​ហើយនៅវេលាម៉ោង១២៖៣០នាទីរសៀលថ្ងៃសុក្រ ទី៩ ខែតុលា ឆ្នាំ២០២៦នេះ ដើម្បីបំពេញ​ទស្ស​នកិច្ចរយៈពេលពីរថ្ងៃ ដែលជាចំណែកដ៏សំខាន់ក្នុងការពង្រឹងទំនាក់ទំនង និងកិច្ច​សហប្រតិបត្តិការកម្ពុជា និងវៀតណាម។

ដំណើរអញ្ជើញដល់របស់លោកនាយករដ្ឋមន្ត្រីនៅព្រលានយន្តហោះអន្តរជាតិតេជោ ទទួលបានការស្វាគមន៍យ៉ាងកក់ក្តៅពីសំណាក់លោក ប៊ិន ត្រឈៃ រដ្ឋមន្ត្រីក្រសួងផែន លោក ឈិន កេតនា ព្រមទាំងមន្ត្រីជាន់​ខ្ពស់ក្រសួង​ការបរទេសកម្ពុជា។

ដំណើរទស្សនកិច្ចរបស់លោក ឡេ មិញ ហ៊ឹង នៅកម្ពុជានាពេលនេះ ធ្វើឡើងតប​តាម​ការអញ្ជើញរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

ក្រសួងការបរទេសកម្ពុជា បានឱ្យដឹងថា​ ដំណើរទស្សនកិច្ចពីថ្ងៃទី៩ ដល់ទី១០ ខែតុលា​នេះ លោក ឡេ មិញ ហ៊ឹង នឹងចូលគាល់ព្រះករុណា ព្រះបាទសម្តេច ព្រះបរមនាថ នរោ​ត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរនៅព្រះបរមរាជវាំង។

លោកនាយករដ្ឋមន្ត្រីវៀតណាម ក៏នឹងចូលជួបសម្តែងការគួរសមដាច់ដោយឡែកពីគ្នា​ជាមួយសម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងជួបពិភាក្សាទ្វេភាគីជាមួយសម្តេចមហាបវរធិបតី ហ៊ុន ម៉ាណែត។

ក្រសួងការបរទេស បានឱ្យដឹងថា ថ្នាក់ដឹកនាំនៃប្រទេសទាំងពីរ នឹងពិភាក្សាអំពីការ​ពង្រឹង​ទំនាក់ទំនង និងកិច្ច​សហប្រតិបត្តិការដែលផ្តល់ផលប្រយោជន៍ទៅវិញទៅមក ព្រមទាំងផ្លាស់ប្តូរយោបល់លើបញ្ហាតំបន់ និងអន្តរជាតិដែលជាការយកចិត្តទុកដាក់រួម។

ក្រសួងការបរទេសកម្ពុជា ចាត់ទុកដំណើរទស្សនកិច្ចរបស់ លោក ឡេ មិញ ហ៊ឹង នឹង​ពង្រឹងបន្ថែមទៀតនូវទំនាក់ទំនងជិតស្និទ្ធរវាងកម្ពុជា និងវៀតណាម ព្រមទាំងរឹតចំណងសាមគ្គីភាព និងបញ្ជាក់ពីការប្តេជ្ញារួមរបស់ប្រទេសទាំងពីរក្នុងការបន្តពង្រឹង និងធ្វើឱ្យកាន់តែស៊ីជម្រៅនូវទំនាក់ទំនងទ្វេភាគី។

សូមបញ្ជាក់ថា លោក ឡេ មិញ ហ៊ឹង អាយុ ៥៦ឆ្នាំ ត្រូវបានសភាវៀតណាម បោះឆ្នោត​ជ្រើស​តាំង​ជា​នាយក​រដ្ឋមន្ត្រីថ្មី កាលពីថ្ងៃទី៧ ខែមេសា ឆ្នាំ២០២៦ សម្រាប់អាណត្តិ​៥ឆ្នាំ ជំនួស​តំណែង​របស់លោក ផាម មិញ ជិញ។

នាយករដ្ឋមន្ត្រីដែលបានបញ្ចប់ការសិក្សាផ្នែកសេដ្ឋកិច្ចពីប្រទេសជប៉ុនរូបនេះ មុនពេល​ក្លាយ​ជានាយករដ្ឋមន្ត្រី ធ្លាប់កាន់តំណែងជាទេសាភិបាលធនាគារកណ្តាល​វៀតណាម ពី​ឆ្នាំ ២០១៦ ដល់ឆ្នាំ២០២០ ដោយបានក្លាយជាទេសាភិបាលវ័យក្មេងបំផុតក្នុងប្រវត្តិ​សាស្ត្រធ​នាគារកណ្តាលនៅអាយុ ៤៦ឆ្នាំ។ នៅក្នុងខែមករា ឆ្នាំ២០២៦ លោក ក៏ត្រូវបាន​ជ្រើស​រើសជាសមាជិកការិយាល័យនយោបាយ ដែលជាស្ថាប័នកំពូលរបស់បក្សកុ​ម្មុយ​នីស្ត​វៀតណាម។

ក្រោយឡើងកាន់តំណែងជានាយករដ្ឋមន្ត្រីកាលពីខែមេសា លោក ឡេ មិញ ហ៊ឹង ទើប​នឹង​ធ្វើដំណើរទស្សនកិច្ចជាផ្លូវការទៅកាន់ប្រទេសឡាវ កាលពីថ្ងៃទី៨ ខែតុលា ហើយ​បន្តដំណើរមកកាន់ប្រទេសកម្ពុជា នៅថ្ងៃទី៩ និងទី១០ ខែតុលានេះ។ ដំណើទស្សន​កិច្ច​នេះ ត្រូវបានគេមើលឃើញថា ជាគោលនយោបាយពង្រឹងទំនាក់ទំនងផ្នែកសេដ្ឋកិច្ច និង​នយោបាយរវាងវៀតណាម ឡាវ និងកម្ពុជា ដែលជាប្រទេសភូមិផងរបងជាប់គ្នាឱ្យកាន់​តែស៊ីជម្រៅ និងលើកកម្ពស់ទំនុកចិត្តរវាងគ្នាឱ្យកាន់តែខ្លាំងក្លា ដ្បិតប្រទេសទាំង៣​ប្រៀប​​ដូចមុំចង្ក្រានដែលតែងតែពូតដៃគ្នាជម្នះការលំបាក និងរំដោះខ្លួនចេញ​ពីអាណា​និគម​បារាំងកាលពីអតីតកាល៕