(ភ្នំពេញ)៖​ អាជ្ញាធរជាតិប្រយុទ្ធប្រឆាំងគ្រឿងញៀន រដ្ឋបាលរាជធានីភ្នំពេញ និងគ្រឹះស្ថានមីក្រូហិរញ្ញវត្ថុ អិលអូអិលស៊ី LOLC នៅថ្ងៃទី៩ ខែតុលា ឆ្នាំ២០២៦នេះ បានរួមគ្នាធ្វើសកម្មភាពផ្សព្វផ្សាយពីបញ្ហាគ្រឿងញៀននិង App NoDrug ដល់ប្រជាពលរដ្ឋដែលទៅលេងស្រុកកំណើត ដើម្បីទៅលេងបុណ្យភ្ជុំបិណ្ឌប្រពៃណីជាតិខ្មែរ តាមមធ្យោបាយរថយន្តក្រុង របស់រដ្ឋបាលរាជធានីភ្នំពេញ។

ក្នុងនាមលោក ឃួង ស្រេង អភិបាលរាជធានីភ្នំពេញ លោក កែវ ចាន់ណារិទ្ធ អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ បានសម្របសម្រួលសហការធ្វើសកម្មភាពផ្សព្វផ្សាយ បិទផ្សាយ Sticker Qr Code NoDrug ហើយលោកក៏បានជំរុញឱ្យអ្នកបើកបរ ក៏ដូចជាអ្នកបម្រើការនៅលើរថយន្តទាំងអស់ ឱ្យជួយផ្សព្វផ្សាយបំផុសប្រជាពលរដ្ឋទាញយក App NoDrug :https://nodrugsnacd.com/download_kh ប្រើប្រាស់។

លោកឧត្តមសេនីយ៍ឯក លឹម តុងហួត បានបញ្ជាក់ដែរថា ក្នុងឱកាសបុណ្យកាន់បិណ្ឌ ភ្ជុំបិណ្ឌ ក្រសួង ស្ថាប័ន គណៈកម្មាធិការត្រួតពិនិត្យគ្រឿងញៀនរាជធានី ខេត្ត ដៃគូMOU សមាគមវិទ្យុ ទូរទស្សន៍កម្ពុជា អង្គការមហាជន ព្រះសង្ឃ អាចារ្យ នឹងមានសកម្មភាពផ្សព្វផ្សាយអប់រំផ្ទាល់ និងមិនផ្ទាល់តាមរយៈវិទ្យុទូរទស្សន៍ បណ្ដាញផ្សព្វផ្សាយរដ្ឋ និងឯកជន ការដាក់តាំងបដា ពាក្យស្លោកប្រឆាំងគ្រឿងញៀន Qr Code NoDrug លើផ្ទាំងប៉ាណូធំៗ និងជំរុញការប្រើប្រាស់ទូរសព្ទដៃ NoDrug ក្នុងរាជធានី ខេត្ត ការផ្ញើសារតាមទូរសព្ទដៃ ។

ក្នុងនាមនាយឧត្តមសេនីយ៍ មាស វិរិទ្ធ អគ្គលេខាធិការ,​ ឧត្តមសេនីយ៍ឯក លឹម តុងហួត បាននាំយកការថ្លែងអំណរគុណ និងកោតសរសើរពីលោកសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជូនដល់ក្រសួង ស្ថាប័ន គណៈកម្មាធិការត្រួតពិនិត្យគ្រឿងញៀនរាជធានី-ខេត្ត អង្គការមហាជន វិស័យឯកជន វិស័យសាសនា ដៃគូMOU ដែលតែងតែយកចិត្តទុកដាក់ផ្សព្វផ្សាយពីបញ្ហាគ្រឿងញៀន និងបំផុសឱ្យប្រជាពលរដ្ឋប្រើប្រាស់ App NoDrug ក្នុងឱកាសបុណ្យកាន់បិណ្ឌ ភ្ជុំបិណ្ឌប្រពៃណីជាតិខ្មែរ និងសូមឱ្យការធ្វើដំណើររបស់បងប្អូនទៅគ្រប់ទីជួបតែសុខសុវត្ថិភាព ចៀសផុតបានពីឧបទ្រពចង្រៃទាំងឡាយ ទាំងពួង នាំមកនូវសេចក្តីសុខគ្រប់ប្រការ៕