(តាកែវ)៖ លោក កាន់ សុភារៈ អនុប្រធាននាយកដ្ឋានព័ត៌មាន និងទំនាក់ទំនងសាធារណៈ នៃអគ្គនាយកដ្ឋានអប់រំ ព័ត៌មាន និងទំនាក់ទំនងសាធារណៈ គ.ជ.ប រួមជាមួយលោកស្រី មុំ សុវណ្ណនី បានអញ្ជើញចូលរួមពិធីកាន់បិណ្ឌវេនទី១៤ នៅវត្តប្រាំបីមុំ ស្ថិតក្នុងឃុំប្រាំបីមុំ ស្រុកទ្រាំង ខេត្តតាកែវ នាព្រឹកថ្ងៃទី១០ ខែតុលា ឆ្នាំ២០២៦។

ពិធីបុណ្យនេះត្រូវបានរៀបចំឡើងក្នុងគោលបំណងឧទ្ទិសមហាកុសលផលបុណ្យជូនចំពោះដួងវិញ្ញាណក្ខន្ធបុព្វការីជន ញាតិមិត្តទាំងប្រាំពីរសន្តាន ព្រមទាំងបុព្វបុរសខ្មែរ និងវីរកងទ័ពដែលបានពលីជីវិត។

ក្នុងឱកាសដ៏មហានក្ខត្តឫក្សនេះ លោក កាន់ សុភារៈ និងលោកស្រី បានបូជាផ្កាភ្ញី ទៀន ធូប ថ្វាយចំពោះព្រះរតនត្រ័យ សូត្រមន្ត សមាទានសីល និងឧទ្ទិសមហាកុសលផលបុណ្យជូនដល់ដួងវិញ្ញាណក្ខន្ធបុព្វការីជន ញាតិមិត្តទាំងប្រាំពីរសន្តាន ព្រមទាំងបុព្វបុរសខ្មែរ និងវីរកងទ័ពដែលបានពលីជីវិតក្នុងបុព្វហេតុការពារជាតិ និងទឹកដីនៃកម្ពុជា។

ជាមួយគ្នានេះ លោក និងលោកស្រី ក៏បានប្រគេនទេយ្យទាន និងបច្ច័យមួយចំនួនជូនព្រះសង្ឃ ដើម្បីចូលរួមឧបត្ថម្ភគាំទ្រវិស័យព្រះពុទ្ធសាសនា និងរួមចំណែកកសាងសមិទ្ធផលនានានៅក្នុងទីវត្តអារាម ឱ្យមានការរីកចម្រើនបន្ថែមទៀត។

ការចូលរួមកាន់បិណ្ឌនេះ គឺជាការបង្ហាញនូវការគោរពប្រតិបត្តិយ៉ាងខ្ជាប់ខ្ជួនចំពោះប្រពៃណី វប្បធម៌ និងព្រះពុទ្ធសាសនា ដែលជាមរតកដ៏មានតម្លៃរបស់ជាតិខ្មែរ។

លោក កាន់ សុភារៈ និងលោកស្រី ក៏បានបួងសួងដល់វត្ថុស័ក្តិសិទ្ធិក្នុងលោក សូមជួយបីបាច់ថែរក្សាប្រជាពលរដ្ឋទូទាំងព្រះរាជាណាចក្រកម្ពុជា ឱ្យទទួលបានសេចក្តីសុខ សេចក្តីចម្រើន សម្បូរសប្បាយ និងធ្វើដំណើរទៅទីជិតទីឆ្ងាយប្រកបដោយសុវត្ថិភាពគ្រប់ៗគ្នា៕