(ភ្នំពេញ)៖ ឯកឧត្តម ខៀវ មុត សមាជិកព្រឹទ្ធសភា ប្រធានក្រុមសមាជិកព្រឹទ្ធសភាប្រចាំភូមិភាគទី៥ (ខេត្តតាកែវ កំពត និងខេត្តកែប) និងជាអនុប្រធានគណៈកម្មការសិទ្ធិមនុស្ស ទទួលពាក្យបណ្តឹង និងអង្កេត និងអធិការកិច្ចនៃព្រឹទ្ធសភា ព្រមទាំងត្រូវជាឪពុកក្មេករបស់ ឯកឧត្តម ឧត្តមសេនីយ៍ឯក ម៉ឹង ពន្លក អគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងការពារជាតិ ដោយលោកបានទទួលមរណភាពក្នុងជន្មាយុ ៧៦ឆ្នាំ ដោយរោគាពាធ។

យោងតាមសេចក្តីជូនដំណឹងរបស់ព្រឹទ្ធសភា បានឱ្យដឹងថា ឯកឧត្តម ខៀវ មុត បានទទួលមរណភាពនៅថ្ងៃសៅរ៍ ១៤រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១០ ខែតុលា ឆ្នាំ២០២៦ វេលាម៉ោង ៧:០៣ នាទីព្រឹក នៅទីក្រុងប៉ារីស សាធារណរដ្ឋបារាំង ត្រូវនឹងម៉ោង ១២:០៣ នាទីថ្ងៃត្រង់ នៅប្រទេសកម្ពុជា។

សេចក្តីជូនដំណឹងនេះ ចាត់ទុកជាសេចក្តីទូលថ្វាយ និងជម្រាបជូនចំពោះ សម្តេច ព្រះអង្គម្ចាស់ ឯកឧត្តម លោកជំទាវ លោក លោកស្រី ញាតិមិត្តជិតឆ្ងាយនៃសព ព្រមទាំងក្រសួង ស្ថាប័នរដ្ឋនានា ឱ្យបានជ្រាបជាព័ត៌មាន។ ដោយឡែក ចំពោះកម្មវិធី និងពិធីប្រារព្ធបុណ្យសព ព្រឹទ្ធសភានៃព្រះរាជាណាចក្រកម្ពុជា នឹងទូលថ្វាយ និងជម្រាបជូនជាបន្តបន្ទាប់នៅពេលក្រោយ។

មរណភាពរបស់ ឯកឧត្តម ខៀវ មុត គឺជាការបាត់បង់នូវឥស្សរជនជាន់ខ្ពស់មួយរូបរបស់ព្រឹទ្ធសភាជាតិ ដែលកន្លងមកបានខិតខំបំពេញភារកិច្ចបម្រើជាតិ សាសនា ព្រះមហាក្សត្រ និងប្រជាពលរដ្ឋយ៉ាងសកម្ម ព្រមទាំងជាការបាត់បង់នូវឪពុក ឪពុកក្មេក និងជីតាជាទីគោរពស្រឡាញ់បំផុតប្រកបដោយព្រហ្មវិហារធម៌របស់ក្រុមគ្រួសារ៕