(តាកែវ)៖ នៅក្នុងឱកាសពិធីបុណ្យភ្ជុំបិណ្ឌ ប្រពៃណីជាតិខ្មែររយៈពេល ៣ថ្ងៃ ចាប់ពីថ្ងៃទី១០ ដល់ថ្ងៃទី១២ ខែតុលា ឆ្នាំ២០២៦នេះ មានភ្ញៀវទេសចរជាតិ និងអន្តរជាតិយ៉ាងច្រើនកុះករបានអញ្ជើញមកទស្សនា និងលេងកម្សាន្តតាមរមណីយដ្ឋាននានាទូទាំងខេត្តតាកែវ។

លោក ឈូក ប៊ុនថន ប្រធានមន្ទីរទេសចរណ៍ខេត្តតាកែវ បានឱ្យដឹងថា ភ្ញៀវទេសចរដែលបានមកកម្សាន្តក្នុងរយៈពេល ៣ថ្ងៃនេះ មានចំនួនសរុប ៦០,៨១៣នាក់, ក្នុងនោះភ្ញៀវទេសចរជាតិមានចំនួន ៦០,៥៧៨ នាក់និងភ្ញៀវទេសចរបរទេសមានចំនួន ២៣៥នាក់។

លោកប្រធានមន្ទីរទេសចរណ៍ខេត្តតាកែវ បានលើកឡើងបន្ថែមថា បើប្រៀបធៀបទៅនឹងរយៈពេលដូចគ្នាក្នុងឱកាសបុណ្យភ្ជុំបិណ្ឌ កាលពីឆ្នាំ២០២៥ កន្លងទៅ ឃើញថាចំនួនភ្ញៀវទេសចរជាតិ មានការកើនឡើង ១៨,២៧៧ នាក់ ស្មើ(៣០%) ខណៈដែលភ្ញៀវទេសចរបរទេសមានការកើនឡើង ១៦ នាក់ ស្មើនឹង(៦.៨%)។

បើតាមលោក ឈូក ប៊ុនថន កំណើនភ្ញៀវទេសចរនាឱកាសបុណ្យភ្ជុំនេះ បានស្តែងឱ្យឃើញពីការចាប់អារម្មណ៍កាន់តែខ្លាំងឡើងមកលើតំបន់ទេសចរណ៍ប្រវត្តិសាស្ត្រធម្មជាតិ និងវប្បធម៌នៅក្នុងខេត្តតាកែវ ព្រមទាំងឆ្លុះបញ្ចាំងពីការរៀបចំសន្តិសុខ សណ្តាប់ធ្នាប់ និងសេវាកម្មទេសចរណ៍កាន់តែមានភាពល្អប្រសើរឡើងពីមួយឆ្នាំទៅមួយឆ្នាំ៕